អ្នកស្រី ជា សូលីន នាយកអនុលោមបញ្ញត្តិ នៃធនាគារ ផេនដាខមមើសលប៊ែង, លោក តាំង លីមឈួង នាយកប្រតិបត្តិវិនិយោគ នៃ ក្រុមហ៊ុន អមរា ឃែភីថល និង អ្នកស្រី សំ ចន្ទ្រា ប្រធានផ្នែកគណនាវាយតម្លៃធានារ៉ាប់រង នៃក្រុមហ៊ុនធានារ៉ាប់រងហ្វតតេ ដែលជាវាគ្មិន​ឆ្លង​កាត់បទពិសោធន៍​ច្រើន​ឆ្នាំ​ក្នុងវិស័យធនាគារ និងហិរញ្ញវត្ថុ នឹង​ចែក​រំលែកបទពិសោធន៍​ និង​គន្លឹះធ្វើការងារ​ក្នុងវិស័យ​ហិរញ្ញវត្ថុរបស់ខ្លួន ដល់សិស្សនិស្សិត​ក្នុងសិក្ខាសាលា​ប្រចាំឆ្នាំដែលរៀបចំឡើងដោយក្លឹបធនាគារ និង​ហិរញ្ញវត្ថុផារ៉ាហ្គន ក្រោម​ប្រធានបទ “Beyond Traditional Accounting and Finance Roles”។

កញ្ញា ទឹម ម៉ាស៊ូណា ប្រធានផ្នែកទំនាក់ទំនង​សាធារណៈ ក្លឹបធនាគារ និងហិរញ្ញវត្ថុផារ៉ាហ្គន ឱ្យដឹងថា សិក្ខាសាលាធនាគារ និងហិរញ្ញវត្ថុឆ្នាំ២០២៤ ត្រូវបានបង្កើតឡើង ក្នុងគោលបំណងចម្បងមួយ គឺការបើកឱកាស ជូនដល់សិស្ស និស្សិត ឱ្យឈ្វេងយល់ពីអាជីព៣ ដែលមិនសូវមានការស្គាល់ និងចាប់អារម្មណ៍ច្រើន ក្នុងស្រទាប់សិក្ខាជន នោះគឺអ្នកគណនាវាយតម្លៃធានារ៉ាប់រង（Actuary）, មន្ត្រីប្រតិបត្តិអនុលោមបញ្ញត្តិ (Compliance officer), និងអ្នកវិភាគវិនិយោគ (Investment analyst)។

បើតាម កញ្ញា ម៉ាស៊ូណា វាគ្មិនទាំង៣នាក់ខាងលើ ដែលឆ្លងកាត់បទពិសោធន៍យូរវស្សាក្នុងវិស័យធនាគារ និងហិរញ្ញវត្ថុ នឹងបង្ហាញខ្លួនលើវេទិកា ដើម្បីធ្វើបទបង្ហាញដោយលម្អិត ទៅលើតួនាទី និងកាតព្វកិច្ចនៃអាជីពប្រចាំថ្ងៃ របស់ពួកគាត់រៀងៗខ្លួន។ លើសពីនេះទៀតសោត ទស្សនិកជន និងភ្ញៀវកិត្តិយសទាំងអស់ នឹងទទួលបានឱកាសសណ្ដាប់ និងដកស្រង់ពុទ្ធិ និងគន្លឹះការងារ ពីវាគ្មិន ថាតើការងារទាំង៣នេះ ត្រូវមានទំនួលខុសត្រូវបែបណាខ្លះ? មានគុណសម្បត្តិ និងផលលំបាកយ៉ាងណាខ្លះ? ទាមទារអ្វីខ្លះ ដើម្បីក្លាយជាអ្នកជំនាញគណនាវាយតម្លៃធានារ៉ាប់រង ឬមន្ត្រីអនុលោមបញ្ញត្តិ ឬអ្នកវិភាគវិនិយោគដ៏ល្អម្នាក់?

កញ្ញា ទឹម ម៉ាស៊ូណា ក៏​មានក្តីរំពឹងដែរថា សិក្ខាសាលាមួយនេះ នឹងធ្វើ​ឱ្យ​ សិស្ស និស្សិត ទទួលបានចំណេះដឹងថ្មីៗបន្ថែមទៀតអំពីអាជីពដ៏សម្បូរបែប និងមានសក្ដានុពលក្នុងទីផ្សារការងារធនាគារ និងហិរញ្ញវត្ថុ ក៏ដូចជាដកស្រង់បទពិសោធន៍ សិក្សាពីជំនាញដែលត្រូវដុសខាត់ មុននឹងចូលប្រយុទ្ធក្នុងសមរភូមិការងារ និងគន្លឹះជោគជ័យលើការងារទាំង៣។ លើសពីនេះទៅទៀត ទស្សនិកជនដែលចូលរួម នឹងមានឱកាសផ្សារភ្ជាប់ទំនាក់ទំនង (networking) ជាមួយវាគ្មិនចំណានទាំង៣ ផងដែរ។

សិក្ខាសាលា នឹងធ្វើឡើងនៅថ្ងៃទី១៣ ខែកក្កដា ឆ្នាំ២០២៤ វេលាម៉ោង ១:០០ ដល់ ៣:៣០ រសៀល នៅសាកលវិទ្យាល័យអន្តរជាតិ ផារ៉ាហ្គន សាលសន្និសីទ (ជាន់ផ្ទាល់ដី)។ ក្នុងនោះសិស្សានុសិស្ស និងនិស្សិតមកពីគ្រប់គ្រឹះស្ថានសិក្សា ព្រមទាំងនិយោជិត និយោជក ត្រូវបានលើកទឹកចិត្តឱ្យចូលរួម ដោយឥតគិតថ្លៃឡើយ។ សម្រាប់ការចូលរួម សូមចុះឈ្មោះតាមរយៈតំណភ្ជាប់ https://forms.gle/exT7w9yJ35XagKfSA ៕