ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ក្នុងឆ្នាំ២០២៤នេះ សាលារៀនចំនួន ៣៤៧ ត្រូវបានជ្រើសរើសជាសាលាគោលដៅ ហើយក្រសួងអប់រំ កំពុងបន្តការសិក្សា ក៏ដូចជាគាំទ្រធ្វើយ៉ាងណាជំរុញឱ្យសាលាគោលដៅទាំងនេះ បានក្លាយទៅជាសាលារៀនគំរូក្នុងពេលឆាប់ៗខាងមុខ ដើម្បីធានាថា ការអប់រំមានគុណភាពកាន់តែប្រសើរឡើង ឆ្លើយតបទៅនឹងតម្រូវការនាសតវត្សទី២១។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍បញ្ជាក់ថា ការប្រែក្លាយសាលារៀនទៅជាសាលារៀនគំរូ ក្នុងគោលដៅលើកកម្ពស់ការអប់រំ ដោយក្រសួងអប់រំ យុវជន និងកីឡា បានដាក់ចេញជាស្តង់ដាសាលារៀនគំរូ តាំងពីដើមឆ្នាំសិក្សា២០២៤ ក្នុងនោះ “ស្តង់ដាសាលារៀនគំរូ” សម្រាប់មត្តេយ្យសិក្សារហូតដល់មធ្យមសិក្សា ត្រូវបានកំណត់ស្តង់ដាចំនួន៥ រួមមាន ស្តង់ដាទី១ ផ្តោតលើលទ្ធផលសិក្សារបស់សិស្ស, ស្តង់ដាទី២ ផ្តោតលើការបង្រៀននិងរៀន, ស្តង់ដាទី៣ ផ្តោតលើការចូលរួមរបស់សហគមន៍, ស្តង់ដាទី៤ ផ្តោតលើដំណើរប្រតិបត្តិការ និងរដ្ឋបាលសាលារៀន និងស្តង់ដាទី៥ ផ្តោតលើ គណនេយ្យភាពរបស់សាលារៀន។
លោកជំទាវ ឃួន វិច្ឆិកា បញ្ជាក់បន្ថែមថា ដើម្បីសម្រេចបានគោលដៅនេះ ក្រៅពីការដាក់ចេញស្តង់ដាសាលារៀនគំរូ និងចេញសេចក្ដីណែនាំលម្អិតទៅកាន់សាលារៀននីមួយៗ ក៏ដូចជាដាក់ចេញស្តង់ដាហើយផ្សព្វផ្សាយទៅដល់សាលារៀននីមួយៗ គឺក្រសួងអប់រំ បានរៀបចំជាក្រុមការងារបច្ចេកទេសដែលមានអ្នកជំនាញពាក់ព័ន្ធនឹងស្តង់ដាសាលារៀនគំរូ ចុះទៅគាំទ្រ ពិនិត្យ តាមដាន វាយតម្លៃ ស្វែងរកចំណុចដែលត្រូវគាំទ្របន្ថែម ដើម្បីលើកកម្ពស់ការអប់រំ។ លោកជំទាវបន្តថា ក្រៅពីនោះ ក្រសួងអប់រំ កំពុងអនុវត្តនូវអាទិភាពជាច្រើនចំណុចទៀតដើម្បីគាំទ្រនិងជំរុញឱ្យការដាក់ជាស្តង់ដាសាលារៀនគំរូនេះទទួលបានជោគជ័យ មិនថាជាការជំរុញ ឬកែលម្អសាលាគរុកោសល្យ ឬការលើកកម្ពស់ការអប់រំកម្រិតឧត្តមសិក្សា ដើម្បីឱ្យក្លាយទៅជាមជ្ឈមណ្ឌលឧត្តមភាព។ ថ្មីៗនេះ ក្រសួងអប់រំ ក៏បានដាក់សម្ពោធឱ្យប្រើប្រាស់បណ្ដាញសាកលវិទ្យាល័យសាយប័រ ដើម្បីជំរុញឱ្យសាលារៀនមានគុណភាពកាន់តែប្រសើរឡើង។
គួរជម្រាបជូនថា លក្ខណៈសម្បត្តិ នៃសាលារៀនគំរូ រួមមាន ទី១.សាលារៀនមានគណនេយ្យភាពជាមួយសហគមន៍ និងសម្រេចបានស្តង់ដាសាលារៀនគំរូ, ទី២. សាលារៀនមានស្វ័យភាពក្នុងការងារផែនការកែលម្អសាលារៀន ផែនការកែលម្អថ្នាក់រៀន និងផ្តល់ការអភិវឌ្ឍវិជ្ជាជីវៈជាប្រចាំដល់ គណៈគ្រប់គ្រងនិងគ្រូបង្រៀន, ទី៣. សិស្សត្រូវបានធ្វើតេស្តស្តង់ដាប្រកបដោយតម្លាភាព និងយុត្តិធម៌ ដើម្បីបម្រើដល់ការកែលម្អការបង្រៀន និងរៀន ការជួយសិស្សរៀនយឺត និងផ្តល់ព័ត៌មានដល់មាតាបិតា ឬអ្នកអាណាព្យាបាលនិងសហគមន៍, ទី៤. គ្រូបង្រៀនប្រើប្រាស់លទ្ធផលតេស្ត ដើម្បីកែលម្អការបង្រៀន និងទទួលបានការអភិវឌ្ឍគុណវុឌ្ឍិជាប្រចាំ, ទី៥. ការបង្កើតសកម្មភាពក្រៅម៉ោងសិក្សា ដើម្បីការអប់រំចរិយាធម៌ និងសីលធម៌, ទី៦. ការយកចិត្តទុកដាក់ដលើសុខភាពសិក្សា និង ទី៧. ការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការគាំទ្រ និងអភិវឌ្ឍសាលារៀន៕
