ក្រោយ​ការ​ប្រកួតប្រជែង​អស់ជាច្រើនខែ ទីបំផុតទៅ គេបានរកឃើញបេក្ខជន៤ក្រុម ដែលនឹង​បន្តទៅវគ្គពាក់កណ្ដាលផ្ដាច់ព្រ័ត្រក្នុងកម្មវិធីជជែកដេញដោលយុវជនថ្នាក់ជាតិ២០២៤ ដែលនឹងប្រព្រឹត្តទៅនៅថ្ងៃទី០៦ ខែកក្កដា​ ឆ្នាំ២០២៤ខាងមុខ ។

ក្រុមជ័យលាភីទាំង ៤ក្រុម ដែលបានឈ្នះក្នុងការ​ប្រកួតជម្រុះវគ្គទី៣ និង​ឈានទៅកាន់វគ្គពាក់កណ្តាលផ្តាច់ព្រ័ត្រ រួមមាន ទី១. ក្រុមបេក្ខជនមកពី វិទ្យាល័យ ហ៊ុនសែន កំពង់ចាម សាលារៀនជំនាន់ថ្មី, ទី២. ក្រុមបេក្ខជនមកពី សាលា ប៊ែលធី អន្តរជាតិ រាជធានីភ្នំពេញ, ទី៣. ក្រុមបេក្ខជនមកពី វិទ្យាល័យ ពោធិ៍សាត់ ខេត្តពោធិ៍សាត់ និងទី៤. ក្រុមបេក្ខជនមកពី សាលារៀនវ៉េស្ទឡាញន៍ រាជធានីភ្នំពេញ។

នៅក្នុងវគ្គពាក់កណ្ដាលផ្ដាច់ព្រ័ត្រនៃកម្មវិធីជជែកដេញដោលយុវជនថ្នាក់ជាតិ២០២៤ខាងមុខនេះ​ ក្រុមជ័យលាភីទាំង ៤ក្រុម នឹងឡើងទៅប្រកួតលើប្រធានបទចំនួន២ផ្សេងគ្នា រួមមាន ប្រធានបទទី១៖ “សហគមន៍កសិកម្មទំនើបគឺជាយន្តការដ៏មានប្រសិទ្ធភាពបំផុតក្នុងការអភិវឌ្ឍវិស័យកសិកម្មនៅកម្ពុជា”។ ក្នុងនោះ ក្រុមបេក្ខជនមកពី វិទ្យាល័យ ពោធិ៍សាត់ ខេត្តពោធិ៍សាត់ (ក្រុមស្រប) ប្រកួតជាមួយ ក្រុមបេក្ខជនមកពី វិទ្យាល័យ ហ៊ុនសែន កំពង់ចាម សាលារៀនជំនាន់ថ្មី ខេត្តកំពង់ចាម (ក្រុមបដិសេធ)។

ដោយឡែកសម្រាប់ ប្រធានបទទី២៖ “ដំណើរការដោះស្រាយវិវាទដោយតុលាការជាយន្តការស្វែងរកយុត្តិធម៌តែមួយគត់ប្រកបដោយប្រសិទ្ធភាព” ក្នុងនោះ ក្រុមបេក្ខជនមកពី សាលា ប៊ែលធី អន្តរជាតិ រាជធានី (ក្រុមបដិសេធ) ប្រកួតជាមួយ ក្រុមបេក្ខជនមកពី សាលារៀនវ៉េស្ទឡាញន៍ រាជធានីភ្នំពេញ (ក្រុមស្រប)។ ម៉្យាងវិញទៀត ក៏មានបេក្ខជន៤ រូបផ្សេងទៀត ដែលគណៈកម្មការបានជ្រើសរើស នឹងឡើងប្រកួតនិយាយជាសាធារណៈ ប្រធានបទផ្ដោតសំខាន់លើ វិស័យអប់រំផងដែរ។

លោក ម៉ិល ផនសីហា ប្រធាននាយកដ្ឋានយុវជន មានប្រសាសន៍ថា  កម្មវិធីជជែកដេញដោលយុវជនថ្នាក់ជាតិ ត្រូវបានរៀបចំឡើងក្នុងគោលបំណងផ្តល់នូវ “វេទិកាសម្តែងមតិ” និង “សង្វៀនវោហាសព្ទ” ដើម្បីបណ្តុះបណ្តាលសមត្ថភាពយុវជនកម្ពុជា លើបំណិនសតវត្សរ៍ទី២១ ពោលគឺពង្រឹងបំណិនស្រាវជ្រាវ បំណិនត្រឹះរឹះពិចារណា នវានុវត្តន៍ ការនិយាយជាសាធារណៈ មូលដ្ឋានចំណេះដឹង ឌីជីថល ការដោះស្រាយបញ្ហា ការធ្វើការងារជាក្រុម ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីក្លាយខ្លួនជាពលរដ្ឋល្អដែលមានទំនួលខុសត្រូវក្នុងសង្គមជាតិ។

ប្រធាននាយកដ្ឋានយុវជន បញ្ជាក់បន្ថែមថា នៅឆ្នាំ២០២៤នេះ គឺជារដូវកាលទី៥ នៃកម្មវិធីជជែកដេញដោលយុវជនថ្នាក់ជាតិ ដោយឆ្នាំនេះមានវិទ្យាល័យរដ្ឋ និងឯកជន ចំនួន៣២ មកពីរាជធានី ៨ក្រុម និងខេត្តទាំង២៤ (១ខេត្ត ១ក្រុម) មានបេក្ខជនសរុប ១៦០នាក់ គ្រូដឹកនាំ ៣២នាក់ គ្រូបង្វឹក ៣២នាក់ ត្រូវបានជ្រើសរើសឱ្យចូលរួមក្នុងកម្មវិធី “ជជែកដេញដោលយុវជនថ្នាក់ជាតិ ឆ្នាំ២០២៤”។ នៅរដូវកាលទី៥នេះ ក្រុមការងារក៏បានកែសម្រួលខ្លឹមសារកម្មវិធីដោយបន្ថែម កម្មវិធីថ្មីមួយទៀត គឺការប្រកួតនិយាយជាសាធារណៈដែលនឹងប្រព្រឹត្តទៅចាប់ពីការប្រកួតជម្រុះវគ្គទី៣។

យុវតី សេង សុគន្ធនីសា ជាសមាជិកក្រុមប្រកួតមកពី វិទ្យាល័យពោធិ៍សាត់ ដែលជាក្រុមមួយក្នុងចំណោមក្រុមទាំង៤ ឈានទៅដល់វគ្គពាក់កណ្តាលផ្តាច់ព្រ័ត្រនិយាយថា ក្រុមរបស់ខ្លួនមានទំនុកចិត្តនៅពេលឡើងប្រកួតលើប្រធានបទដែលស្របទៅតាមគំនិត និងការយល់ឃើញរបស់ក្រុមខ្លួន។ ទន្ទឹមគ្នានេះ សមាជិកក្រុមនីមួយមានការសហការគ្នាល្អ ចេះជួយគ្នាទៅវិញទៅមកដើម្បីទទួលបានលទ្ធផលល្អ។

សុគន្ធនីសា បន្តថា ក្រុមរបស់ខ្លួនមានអារម្មណ៍សប្បាយរីករាយដែលបានចូលរួមប្រកួតក្នុងកម្មវិធីនេះ និងកោតសរសើរដល់ក្រសួងអប់រំដែលបានរៀបចំកម្មវិធីនេះឡើង ដើម្បីឱ្យយុវជនកម្ពុជាអាចអភិវឌ្ឍសមត្ថភាព ពង្រឹងភាពក្លាហាន ទទួលបានចំណេះដឹងថ្មីៗជាច្រើនក្រោយពេលចូលរួមកម្មវវិធីនេះ។

ដោយឡែកយុវសិស្ស ហែម ចាន់ឡា ជាសមាជិកក្រុមប្រកួតមកពី វិទ្យាល័យពោធិ៍សាត់ ក៏បានលើកឡើងដែរថា ជាការរំពឹងទុករបស់ក្រុមខ្លួនក្នុងកម្មវិធីនេះ គឺជ័យជំនះ និងចំណេះដឹង បទពិសោធន៍ថ្មីៗដែលអាចយកទៅអភិវឌ្ឍខ្លួននាពេលអនាគត។ យុវជនរូបនេះ ក៏បានលើកទឹកចិត្តដល់យុវជន និងសិស្សានុសិស្សទាំងអស់ដែលមានបំណងចូលរួមប្រកួតក្នុងកម្មវិធីនេះ ត្រូវត្រៀមខ្លួនឱ្យបានច្រើន ស្រាវជ្រាវឯកសារឱ្យបានច្រើន ហ្វឹកហាត់ការនិយាយ មានការសហការក្រុម និងពង្រឹងទំនាក់ទំនងឱ្យបានល្អ៕