ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជំនាញកុំព្យូទ័រ ឬ ការសិក្សាផ្សេងៗរបស់កុំព្យូទ័រជាតម្រូវការចាំបាច់ និងមានទីផ្សារខ្ពស់នៅក្នុងប្រទេសកម្ពុជានាពេលបច្ចុប្បន្ន និងពេលអនាគត។ នេះជាការយល់ឃើញរបស់លោក គឹម សុរ៉ន ជាសិក្ខាកាមកំពុងសិក្សាជំនាញរចនាក្រាហ្វិក នៅវិទ្យាស្ថានពហុបច្ចេកទេសខេត្តកំពង់ឆ្នាំង តាមគម្រោងកម្មវិធីបណ្ដុះបណ្ដាលវិជ្ជាជីវៈ និងបច្ចេកទេស ១.៥លាននាក់។
លោក គឹម សុរ៉ុន បានឱ្យដឹងថា ការសិក្សាជំនាញរចនាក្រាហ្វិកនេះនឹងផ្ដល់ចំណេះដឹងមួយច្បាស់លាស់បន្ថែមទៀតដើម្បីលោកអាចយកទៅប្រើប្រាស់ក្នុងការងារប្រចាំថ្ងៃ។ លោកបន្តថា កម្មវីធីសិក្សាដែលលោកកំពុងរៀននេះមានរយៈពេល៤ខែដែលរៀបចំដោយរដ្ឋាភិបាលកម្ពុជាក្រោមគម្រោង ១,៥លាននាក់ ដែលផ្ដល់ដោយក្រសួងការងារ និងវគ្គសិក្សាដែលលោកសិក្សាផ្ទាល់នៅវិទ្យាស្ថានពហុបច្ចេកទេសខេត្តកំពង់ឆ្នាំង។
ជាក់ស្ដែងសព្វថ្ងៃនេះ លោក គឹម សុរ៉ុន ជាគ្រូបង្រៀនក្នុងសហគមន៍គ្រឹះបរិស័ទ្ធតូចមួយ ដែលតែងតែចុះបង្ហាត់បង្រៀនសិស្សក្នុងសហគមន៍ឱ្យចេះភាសាអង់គ្លេស បច្ចេកទេសមួយចំនួន និងការប្រើប្រាស់កុំព្យូទ័រពីកម្មវិធីផ្សេងៗផងដែរ។
លោក សុរ៉ុន បន្ថែមថា កម្មវិធីសិក្សានេះមានរយៈពេល៤ខែ ហើយឥឡូវនេះលោកទទួលបានការបណ្ដុះបណ្ដាលរយៈពេល៣ខែមកហើយ ដោយ៣ខែមកនេះលោកអាចសិក្សាបានជំនាញជាច្រើនពីលោកគ្រូអ្នកគ្រូដែលអាចឱ្យលោកមានជំនាញកាន់តែច្បាស់លាស់ មានការទទួលស្គាល់ពីការបង្រៀន និងមេរៀនពីក្រសួងផងដែរ។
មានវ័យ៤៣ឆ្នាំទៅហើយក្តី ប៉ុន្តែលោក គឹម សុរ៉ុន នៅតែចង់រៀនពីជំនាញផ្សេងៗដែលលោកស្រលាញ់ និងចង់ចេះបើទោះបីជាមានអាយុច្រើនជាងគេក្នុងថ្នាក់រៀនក្ដី។ លោកបន្តថា អាយុលោកមិនសំខាន់នោះទេ អ្វីដែលសំខាន់នោះ គឺលោកអាចយកចំណេះដឹងទាំងនេះទៅចែករំលែកបន្តទៅកាន់ក្មេងៗនៅជាយស្រុកដែលមិនមានលទ្ធភាពបានទៅសាលារៀន ឬក្មេងកំព្រារដែលសហគមន៍បានចិញ្ចឹមជាដើម។
ជាមួយគ្នានេះ លោក សុរ៉ុន ក៏មានក្ដីស្រមៃបន្តនឹងបើកថ្នាក់បង្រៀនកុំព្យូទ័រដល់ក្មេងៗផងដែរ ដោយការបើកថ្នាក់នេះនឹងអាចជាចំណូលមួយចំណែកសម្រាប់គ្រួសារ ហើយសម្រាប់អ្នកដែលមិនមានលទ្ធភាពសិក្សាលោកនឹងផ្ដល់ការសិក្សាឥតគិតថ្លៃដល់ពួកគាត់ផងដែរ។
គួរបញ្ជាក់ដែរថា លោក គឹម សុរ៉ុន ជាសិក្ខាកាមម្នាក់ក្នុងចំណោមសិក្ខាកាមដទៃទៀតដែលទទួលបានការសិក្សាជំនាញវិជ្ជាជីវៈដោយឥតគិតថ្លៃ ពីកម្មវិធី ១,៥លាននាក់របស់រាជរដ្ឋាភិបាល ក្នុងការបណ្តុះបណ្តាលយុវជន បងប្អូនប្រជាពលរដ្ឋនៅសេដ្ឋកិច្ចក្រៅប្រពន្ធ និងក្នុងប្រព័ន្ធដើម្បីទទួលបានជំនាញមួយប្រចាំជីវិត៕
