ជំនាញគិតបែបយុទ្ធសាស្ត្រ (Strategic thinking) គឺជាជំនាញចាំបាច់ សម្រាប់ភាពជោគជ័យក្នុងជីវិត ប៉ុន្តែជំនាញនេះ ជាជំនាញមួយ ដែលមិនងាយស្រួលប៉ុន្មានទេ ក្នុងការសិក្សា អភិវឌ្ឍ និងពង្រឹង។ ការគិតបែបយុទ្ធសាស្ត្រ ពាក់ព័ន្ធនឹងការវិភាគស្ថានភាពស្មុគស្មាញ, ការកំណត់អត្តសញ្ញាណ និងនិន្នាការអ្វីមួយ, ការគិត ឬបង្កើតសេណារីយ៉ូអ្វីមួយសម្រាប់អនាគត, ការធ្វើសេចក្ដីសម្រេចចិត្ត ដែលស្របទៅនឹងគោលដៅ និងគុណតម្លៃរបស់អ្នក។

យ៉ាងណាក៏ដោយ ពេលខ្លះអ្នកអាចមានអារម្មណ៍ថា ជាប់គាំង ហត់នឿយ ឬច្របូកច្របល់ អំឡុងពេលដោះស្រាយបញ្ហាចំពោះមុខ ហើយទាមទារឱ្យមានការអភិវឌ្ឍ និងពង្រឹងសមត្ថភាពគិតបែបយុទ្ធសាស្ត្របន្ថែម។ ខាងក្រោមនេះ ជាជំហាន ៤ ដែលអ្នកអាចអនុវត្ត ដើម្បីពង្រឹងសមត្ថភាពគិតបែបយុទ្ធសាស្ត្រ ឱ្យកាន់តែប្រសើរ ៖

១. វាយតម្លៃកម្រិតសមត្ថភាពបច្ចុប្បន្នរបស់អ្នក ៖ ជំហានដំបូងក្នុងការជំរុញជំនាញគិតបែបយុទ្ធសាស្ត្រ គឺត្រូវវាយតម្លៃកម្រិតសមត្ថភាពគិតបច្ចុប្បន្ន និងកំណត់ចំណុចខ្លាំង-ចំណុចខ្សោយរបស់អ្នក។ អ្នកអាចវាយតម្លៃកម្រិតសមត្ថភាពខ្លួនឯង ដោយប្រើ កម្រងសំណួរវាស់ស្ទង់ជំនាញគិតបែបយុទ្ធសាស្ត្រ (ចក្ខុវិស័យ ការវិភាគ ការសំយោគ និងការអនុវត្ត)។ អ្នកក៏អាចស្នើសុំមតិកែលម្អពីមិត្តភ័ក្តិ អ្នកណែនាំ (Mentor) ឬអ្នកគ្រប់គ្រង ដែលអាចណែនាំ និងបង្ហាញផ្លូវ ដើម្បីអភិវឌ្ឍសក្តានុពលរបស់អ្នកបានផងដែរ។ តាមរយៈការវាយតម្លៃពីកម្រិតសមត្ថភាពបច្ចុប្បន្ន អ្នកអាចដឹងថា បច្ចុប្បន្ន អ្នកស្ថិតនៅកម្រិតណា ហើយត្រូវការពង្រឹងចំណុចអ្វីខ្លះ។

២. ពង្រីកចំណេះដឹង ៖ ជំហានទីពីរ ដើម្បីពង្រឹងជំនាញគិតបែបយុទ្ធសាស្ត្រ (Strategic thinking) គឺទាមទារឱ្យមានការពង្រីកវិសាលភាពនៃចំណេះដឹង និងបើកចិត្តស្វែងយល់អំពីទស្សនៈចម្រុះ និងព័ត៌មានដែលមានច្រើនប្រភព។ ការពង្រីកចំណេះដឹង អាចធ្វើបានតាមរយៈការអានសៀវភៅ អត្ថបទ ផតខាស់ ដែលពាក់ព័ន្ធនឹងការងារជំនាញ ឬចំណាប់អារម្មណ៍របស់អ្នក។ ក្រៅពីនេះ អ្នកក៏អាចចូលរួមសិក្ខាសាលា វគ្គសិក្សាខ្លី ឬកម្មវិធីបណ្ដុះបណ្ដាល ដែលជួយជំរុញ ការគិត។ អ្នកក៏អាចបង្កើតទំនាក់ទំនង ជាមួយបុគ្គល ដែលមានប្រវត្តិ បទពិសោធន៍ ឬគំនិត ដែលអ្នកអាចរៀនសូត្រពីគេបានដែរ។

៣. អនុវត្តអ្វីដែលអ្នកបានរៀន ៖ ជំហានទីបី ត្រូវអនុវត្តអ្វីដែលអ្នកបានរៀន ក្នុងស្ថានភាព ឬការងារជាក់ស្ដែង។ អ្នកអាចស្វែងរកឱកាស ដើម្បីទទួលយកគម្រោង កិច្ចការ ឬតួនាទី ដែលតម្រូវឱ្យមានការគិតបែបយុទ្ធសាស្ត្រ ហើយអនុញ្ញាតឱ្យអ្នកអាចបង្ហាញសមត្ថភាព និងសក្តានុពលរបស់អ្នក។ តាមរយៈសកម្មភាព និងលទ្ធផល ដែលអ្នកបានធ្វើ អ្នកអាចឆ្លុះបញ្ចាំងចំណុចខ្វះខាត និងអ្វីដែលអ្នកត្រូវកែលម្អ។ លើសពីនេះ អ្នកក៏អាចពង្រឹងសមត្ថភាព និងកសាងទំនុកចិត្តខ្លួនឯង​ផងដែរ។

៤. បណ្ដុះផ្នត់គំនិតអភិវឌ្ឍសមត្ថភាព ៖ ជំហានទីបួន ដែលជាចំណុចចុងក្រោយ, ដើម្បីបង្កើនជំនាញគិតបែបយុទ្ធសាស្ត្រ គឺត្រូវមានទម្លាប់បណ្ដុះផ្នត់គំនិត​ ទទួលយកការរៀនសូត្រ និងមតិកែលម្អ។ ផ្នត់គំនិតអភិវឌ្ឍខ្លួន គឺជាជំនឿ ដែលជឿថា អ្នកអាចអភិវឌ្ឍសមត្ថភាព និងសក្តានុពលរបស់អ្នក តាមរយៈការខិតខំប្រឹងប្រែង សិក្សា ស្រាវជ្រាវ រៀនសូត្រ និងទទួលយកការណែនាំពីមនុស្សជុំវិញខ្លួន៕