ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមរបាយការណ៍ស្តីពីតម្រូវការកម្លាំងពលកម្ម របស់ទីភ្នាក់ងារជាតិមុខរបរ និងការងារ នៃក្រសួងការងារ បានបង្ហាញអំពីជំនាញសំខាន់ៗចំនួន១០ ដែលនិយោជក ឬម្ចាស់ក្រុមហ៊ុនត្រូវការពីបេក្ខជនដែលគ្មានបទពិសោធន៍ការងារ ឬទើបបញ្ចប់ការសិក្សានៅពេលដែលមកដាក់ពាក្យស្វែងរកការងារធ្វើ។
ជំនាញសំខាន់ៗចំនួន១០ ដែលនិយោជក ឬម្ចាស់ក្រុមហ៊ុនត្រូវការ រួមមាន ៖ ភាសាអង់គ្លេស, ភាសាចិន, ជំនាញបច្ចេកទេស, ការសម្របសម្រួល, ជំនាញអនុវត្តជាក់ស្តែង, ការគ្រប់គ្រងពេលវេលា, ការដោះស្រាយបញ្ហា, ការតាមដានត្រួតពិនិត្យប្រតិបត្តិការងារ, ការទំនាក់ទំនង និង ការសម្របសម្រួលជាមួយអតិថិជន។
ជាមួយគ្នានេះ បើតាមទីភ្នាក់ងារជាតិមុខរបរ និងការងារ គឺមានជំនាញទន់ចំនួន៧ទៀត ដែលទីផ្សារការងារកំពុងមានតម្រូវការខ្ពស់ ដែលអ្នកស្វែងរកការងារគួររៀន និងអ្នកដែលមានការងារត្រូវបន្តអភិវឌ្ឍដើម្បីទទួលបានឱកាសការងារកាន់តែប្រសើរ ដូចជា ៖ ជំនាញសម្របសម្រួលជាមួយអតិថិជន, ជំនាញធ្វើការងារជាក្រុម, ជំនាញរៀនការងារថ្មីបានលឿន និងឆាប់ចេះ, ជំនាញដោះស្រាយបញ្ហា, ជំនាញទំនាក់ទំនង, ជំនាញរៀបចំផែនការ និងជំនាញភាសាបរទេស។
ទីភ្នាក់ងារជាតិ មុខរបរ និងការងារ ក៏បានបញ្ជាក់ដែរថា ជំនាញក្នុងការរៀនការងារថ្មីបានលឿន និងឆាប់ចេះ គឺជាជំនាញដែលចាំបាច់ដើម្បីអភិវឌ្ឍន៍សមត្ថភាពរបស់ខ្លួន និងដើម្បីទទួលបាននូវជំនាញថ្មីបន្ថែមនៅកន្លែងធ្វើការ ខណៈដែលតម្រូវការជំនាញទៅតាមមុខតំណែង នៃការងារមានការផ្លាស់ប្តូរជាបន្តបន្ទាប់។
ក្នុងនោះ ទីភ្នាក់ងារជាតិ មុខរបរ និងការងារ ក៏បានបង្ហាញវិធីសាស្រ្តចំនួន៥ ដែលអាចជួយដល់អ្នកក្នុងការរៀនធ្វើការ និងអភិវឌ្ឍជំនាញថ្មីៗ ដែលរួមមាន ៖ រៀនតាមរយៈថ្នាក់លើពេលកំពុងអនុវត្តការងារផ្ទាល់ពេលធ្វើការ, រៀនតាមរយៈការសាកសួរ និងធ្វើការជាមួយមិត្តរួមការងារ, រៀនតាមរយៈការសាកល្បង និងអភិវឌ្ឍបន្តិចម្តងៗ, រៀនតាមរយៈការចូលរួមវគ្គបណ្តុះបណ្តាលនានា និង ស្វ័យសិក្សាបន្ថែមដោយខ្លួនឯង៕
