ក្នុងពិធីបើកពិព័រណ៍សៀវភៅកម្ពុជាលើកទី១០ នាព្រឹកថ្ងៃទី១៤ ខែធ្នូ ឆ្នាំ២០២៣ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា មានប្រសាសន៍ថា កម្មវីធីនេះ គឺជាឱកាសផ្តល់ឱ្យកវីនិពន្ធ ឬអ្នកមានភារកិច្ចបោះពុម្ភសៀវភៅ អាចផ្សព្វផ្សាយបានទូលំទូលាយ និងសង្ឃឹមថា ជាជង្រុកវប្បធម៌លើកកម្ពស់ការតែងនិពន្ធក្នុងសម័យបច្ចេកវិទ្យា។

ឯកឧត្តមបណ្ឌិតសភាចារ្យឧបនាយករដ្ឋមន្ត្រី បានរំលឹកដល់ប្រវត្តិសាស្ត្រខ្មែរតាំងពីបុរាណមក ដែលតែងតែគាំទ្រដល់ការសិក្សាស្រាវជ្រាវ តែងនិពន្ធដូចដែលមានបន្សល់ទុកលើសិលាចារឹកជាង ២០០០ផ្ទាំង និងការបន្តលើកកម្ពស់ការនិពន្ធចងក្រងនូវឯកសារអក្សរសិល្ប៍ជាច្រើនយ៉ាងសម្បូរបែបរហូតមកដល់ទសវត្សទី ៦០ ដោយសង្ឃឹមថា ពិព័រណ៍សៀវភៅកម្ពុជានេះ នឹងក្លាយជាជម្រុកវប្បធម៌មួយ សម្រាប់លើកកម្ពស់ការតែងនិពន្ធ និងការអាន ក្នុងយុគសម័យថ្មី សតវត្សទី២១ គឺជាការអានដែលចេះវិភាគទស្សនអ្នកនិពន្ធ ស៊ីជម្រៅ ដើម្បីទទួលយកបំណិនវិជ្ជា និង ជាការអានដើម្បីបង្កើតអ្វីដែលថ្មី។

យើងសង្ឃឹមថាពិព័រណ៍សៀវភៅកម្ពុជានឹងក្លាយទៅជាជង្រុកវប្បធម៌មួយ សម្រាប់ការលើកកម្ពស់ ការតែងនិពន្ធក្នុងយុគសម័យថ្មី គឺយុគសម័យបច្ចេកវិទ្យា

ឯកឧត្ដម​បណ្ឌិត​សភាចារ្យ ហង់ជួន ណារ៉ុន ឧបនាយក​រដ្ឋមន្ត្រី រដ្ឋមន្ត្រី​ក្រសួង​អប់រំ យុវជន និង​កីឡា

ឧបនាយក​រដ្ឋមន្ត្រី រដ្ឋមន្ត្រី​ក្រសួង​អប់រំ យុវជន និង​កីឡាបានឱ្យដឹងថា ក្រសួងបានរៀបចំកញ្ចប់អំណានដំបូង និងសហការជាមួយដៃគូជាច្រើន និងប្រមូលផ្តុំនូវវិធីសាស្រ្តអំពីការអាន ការរៀនភាសាឱ្យក្លាយទៅជាវិធីសាស្រ្តរួមមួយដើម្បីបង្រៀនកូនខ្មែរឱ្យឆាប់ចេះភាសាខ្មែរ។ ហើយវិធីសាស្រ្តដំបូងនេះមានរៀបជាវិធីបង្រៀនក៏ដូចជាសៀវភៅចំនួនសាមសិបចំណងជើងឱ្យកុមារអាន។ ទន្ទឹមគ្នានោះក៏មានការរៀបចំបណ្ណាល័យដោយមានសៀវភៅកម្រិតពីទីមួយ រហូតដល់ទីប្រាំមួយ គឺសម្រាប់កុមាររៀននៅបឋមសិក្សាឱ្យចេះអានភាសា។

 អំណានជាមូលដ្ឋានគ្រឹះដើម្បីចាប់យកចំណេះផ្សេងៗទៀត បើក្មេងមិនចេះអានគឺអត់អាចរៀនចប់! ហើយក៏មិនអាចចាប់យកជំនាញបានដែរ។ ដូច្នេះអំណានគឺជាកត្តាចាំបាច់មួយ ដើម្បីចាប់យកជំនាញសម្រាប់ទទួលយកបំណិនផ្សេងៗទៀតដូចជា វិជ្ជាសម្បទា បំណិនសម្បទា និងចរិយាសម្បទា

ឯកឧត្ដម​បណ្ឌិត​សភាចារ្យ ហង់ជួន ណារ៉ុន ឧបនាយក​រដ្ឋមន្ត្រី រដ្ឋមន្ត្រី​ក្រសួង​អប់រំ យុវជន និង​កីឡា

ឯកឧត្តម​រដ្ឋមន្ត្រីក៏បានសំណូមពរដល់មាតាបិតាស្វែងរកកញ្ចប់អំណានដំបូងនិងគណិតដំបូង ដើម្បីបង្រៀនកូនឱ្យចេះភាសាជាតិឱ្យបានច្បាស់លាស់។ បន្ទាប់ពីចេះភាសាជាតិច្បាស់ហើយ ទើបអាចរៀនភាសាបរទេសបានច្បាស់តាមក្រោយ។ ឯកឧត្តមមានប្រសាសន៍ថា ភាសាមិនត្រឹមតែមធ្យោបាយសម្រាប់ទំនាក់ទំនងនោះទេ ប៉ុន្តែសម្រាប់បង្ហាញអំពីបញ្ញត្តការរស់នៅក្នុងប្រទេសមួយគឺប្រើប្រាស់ភាសាបញ្ញត្ត។ ដូច្នេះបើមិនយល់ច្បាស់អំពីភាសាជាតិទេ នោះការទៅរៀនភាសាបរទេសក៏អត់ច្បាស់ដែរ។

ជាមួយគ្នា ឯកឧត្តមរដ្ឋមន្រ្តីក៏​បានផ្តល់ដំបូន្មានទៅដល់អ្នកនិពន្ធ ដោយថា យុវជននៅពេលបច្ចុប្បន្ននេះប្រើប្រាស់បច្ចេកវិទ្យាច្រើន ដូច្នេះបណ្តាញសង្គមក៏ជាដៃគូមួយរបស់អ្នកនិពន្ធដែរ និងជាដៃគូប្រណាំងប្រជែងដ៏មានប្រសិទ្ធភាព ដែលជាកត្តាតម្រូវឱ្យអ្នកនិពន្ធត្រូវចេះបង្កើតសកម្មភាពថ្មីៗ យុទ្ធសាស្រ្តទាក់ទាញថ្មីៗ ដើម្បីឱ្យយុវជនជំនាន់ថ្មីកាន់តែស្រឡាញ់សៀវភៅ ។

ដោយឡែកពាក់ព័ន្ធនឹងការអានវិញ ឯកឧត្ដម​បណ្ឌិត​សភាចារ្យ ក៏បានផ្តល់ដំបូន្មាន ដោយថា ក្នុងករណីខ្លះ ការអានដើម្បីភាពសប្បាយរីករាយ ប៉ុន្តែគួរអានឱ្យឆ្លើយតបនឹងបំណិនសតវត្សរ៍ទី២១ ដែលផ្តោតអំពីការចេះវិភាគទស្សនៈអ្នកនិពន្ធ ចេះបូកសរុបសេចក្ដីនៃសំណេរ បង្កើនជំនាញដោះស្រាយបញ្ហា និងចេះសម្របសម្រួលការងារជាក្រុម។ មួយវិញទៀតការអាន គឺដើម្បីលើកកម្ពស់សហគ្រិនភាព ភាពជាអ្នកដឹកនាំ។ ហើយទន្ទឹមគ្នានោះការអានក៏ត្រូវចេះចាប់យកជំនាញបច្ចេកវិទ្យាផង ឌីជីថលផង ដើម្បីទទួលយកបំណិននិងជាយុទ្ធសាស្រ្តមួយ ដែលក្រសួងអប់រំយុវជន និងកីឡាបានបញ្ចូលនៅក្នុងសាលារៀនជំនាន់ថ្មី។

ជាមួយគ្នានេះ ឯកឧត្តមបណ្ឌិតសភាចារ្យ ក៏​បានបង្ហាញក្ដីសោមនស្សចំពោះ សិស្សានុសិស្សសាលារៀនជំនាន់ថ្មី ទាំងវិទ្យាល័យស៊ីសុវត្ថិ និងសាលារៀនផ្សេងៗទៀត ដែលចាប់បង្កើតក្លឹបនិពន្ធ ពិភាក្សាគ្នាជាក្រុម ដើម្បីចែករំលែកបទពិសោធន៍នៅក្នុងការតែងនិពន្ធ និងការសរសេរសៀវភៅបោះពុម្ភផ្សាយ ខណៈពួកគាត់មានអាយុត្រឹមតែ១៣ និង១៤ ឆ្នាំប៉ុណ្ណោះ និងជាសិស្សកំពុងសិក្សានៅវិទ្យាល័យនៅឡើយ។

ការអាននៅក្នុងយុគសម័យបច្ចេកវិទ្យា ដើម្បីបង្កើតបណ្តាញស្រទាប់សង្គមមួយ គឺការអានដើម្បីបង្កើតថ្មី ការអានដើម្បីចាប់យកជំនាញពិតប្រាកដ ដើម្បីជួយឱ្យអ្នកអានទទួលបានជោគជ័យក្នុងជីវិត

ឯកឧត្ដម​បណ្ឌិត​សភាចារ្យ ហង់ជួន ណារ៉ុន ឧបនាយក​រដ្ឋមន្ត្រី រដ្ឋមន្ត្រី​ក្រសួង​អប់រំ យុវជន និង​កីឡា

រដ្ឋមន្ត្រី​ក្រសួង​អប់រំមានក្ដីសង្ឃឹមថា សាលារៀនជំនាន់ថ្មី និងការពិព័រណ៍សៀវភៅនឹងបង្កើតបាននូវក្ដីសុបិនមួយសម្រាប់យុវជនកម្ពុជា ដើម្បីឱ្យយុវជនកម្ពុជា ដាក់ចេញគោលដៅដ៏ជាក់លាក់មួយ ក្នុងការអភិវឌ្ឍខ្លួនឯង ហើយប្រែក្លាយខ្លួនទៅជាធនធានមនុស្សពិតប្រាកដ៕