ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅពេលលឺពាក្យថា សមាធិ យើងនឹងនឹកគិតដល់ធម៌ ឬការប្រារព្ធបែបសាសនា ប៉ុន្តែរយៈពេលចុងក្រោយនេះ សមាធិត្រូវបានទទួលការស្វាគមន៍ពីសំណាក់ពិភពវេជ្ជសាស្រ្ត និងអ្នកវិទ្យាសាស្រ្ត ក្រោយគេរកឃើញថា សមាធិ មានគុណប្រយោជន៍ច្រើនសម្រាប់ការរស់នៅ និងសុខភាពផ្លូវចិត្ត ដូចជាកាត់បន្ថយភាពតានតឹងប្រចាំថ្ងៃ(ស្រ្តេស) រៀនគ្រប់គ្រងអារម្មណ៍នៅពេលមានកំហឹង ឬរំភើប និងបង្កើនការផ្ចង់អារម្មណ៍លើការសិក្សាផងដែរ។
អ្នកស្រី អ៊ុក សូនីតា នាយិកាសិក្សាធិការ នៃបណ្តាញគ្រឹះស្ថានអប់រំ វេសឡាញ គ្រុប លើកឡើងថា តាមការស្រាវជ្រាវ គេបានរកឃើញមានបញ្ហាប្រឈមនៃភាពតានតឹងចិត្ត បញ្ហាថប់បារម្ភ ធ្លាក់ទឹកចិត្ត និងបញ្ហារំខាន នៃអាកប្បកិរិយា បានកើតឡើងច្រើនចំពោះមនុស្សគ្រប់វ័យទាំងអស់ មិនថាក្មេងជំទង់ មនុស្សធំ ហើយក៏ដូចជាកុមារតូចផងដែរ គ្រាន់តែកុមារតូចពួកគេមិនអាចបង្ហាញតាមរយៈការនិយាយ ដូច្នេះពួកគេអាចបង្ហាញតាមរយៈការយំ ស្រែក និងរករឿងឪពុកម្តាយជាដើម ។
តើសមាធិត្រូវអនុវត្តយ៉ាងដូចម្តេចនៅសាលារៀន ?
បើតាម អ្នកស្រី អ៊ុក សូនីតា លោកគ្រូអ្នកគ្រូអាចអនុវត្តការសមាធិកសម្រាប់កុមារ ជារៀងរាល់៥ ទៅ១០នាទីមុនពេលចូលរៀន ឬក៏អនុវត្តនៅពេលដែលសង្កេតឃើញថា កុមារមានសកម្មភាពរំខាន ដូចជាអាការៈរពឹស រញ៉េរញ៉ៃខ្លាំង គ្រប់គ្រងស្ថានភាពមិនបាន ដែលពេលនោះហើយ គ្រូប្រចាំថ្នាក់អាចធ្វើការហាមឃាត់តាមរយៈការឱ្យធ្វើសមាធិ។
ចំពោះសិស្សធំ រាប់ចាប់ពីកម្រិតបឋមសិក្សា រហូតដល់វិទ្យាល័យ ការធ្វើសមាធិ អាចអនុវត្តរាល់ពេលចប់គោរពទង់ជាតិ ដើម្បីឱ្យសិស្សអាចផ្ចង់អារម្មណ៍នៅពេលសិក្សា ។ សកម្មភាពខ្លះទៀត គ្រូ អាចដឹកនាំធ្វើនៅពេលបង្រៀនក៏បានផងដែរ។
យ៉ាងណាក៏ដោយ ការធ្វើសមាធិនេះ គឺត្រូវធ្វើតាមបច្ចេកទេស និងទទួលបានការបណ្តុះបណ្តាលជាក់លាក់អ្នកជំនាញបច្ចេកទេស ដែលធ្វើការងារទាក់ទងនឹងសុខភាពផ្លូវចិត្ត ទើបមានសមត្ថភាពយល់ដឹងពីអារម្មណ៍ និងផ្លូវចិត្តរបស់សិស្ស អាចជួយពួកគេក្នុងការកាត់បន្ថយភាពតានតឹង ចេះផ្ចង់អារម្មណ៍ ដើម្បីទទួលបានសមត្ថភាពនៅក្នុងការរៀនសូត្រកាន់តែប្រសើរឡើង៕
