របាយការណ៍ប្រចាំឆ្នាំ ដែលសិក្សាអំពីសទ្ទស្សន៍និន្នាការការងារ ក្រុមហ៊ុនបច្ចេកវិទ្យាយក្ស Microsoft បានស្ទង់មតិមនុស្សចំនួន ៣,១០០០ នាក់ក្នុង ៣១ ប្រទេស និងបានរកឃើញថា បុគ្គលិកជាច្រើនកំពុងច្របូកប្រចល់ចិត្តជាមួយយុគសម័យឌីជីថល។ ស្ទើរតែ ២ ភាគ ៣ នៃអ្នកដែលបានស្ទាបស្ទង់មតិបាននិយាយថា ពួកគេកំពុងមានវិបត្តិក្នុងការគ្រប់គ្រងពេលវេលា និងថាមពលរាងកាយ ដើម្បីធ្វើការងារឱ្យមានប្រសិទ្ធភាព ដោយសារត្រូវចំណាយក្នុងការប្រជុំអនឡាញ ផ្ញើអ៊ីម៉េល និងការហៅទូរស័ព្ទ ច្រើនជាងមុន។

តើអ្នកមានអារម្មណ៍ថាការងាររបស់អ្នកកាន់តែពិបាកដែរមែនទេ? បើដូច្នេះ រឿងនេះប្រហែលជាមិនមែនកើតឡើងចំពោះតែអ្នកម្នាក់ឯងនោះទេ ព្រោះការសិក្សាដែលធ្វើឡើងដោយ Microsoft ក៏បានបង្ហាញដែរថា បុគ្គលិកជាច្រើនផ្សេងទៀត ក៏កំពុងមានអារម្មណ៍ដូច្នេះដែរ។

បច្ចេកវិទ្យាជាបញ្ហា ប៉ុន្តែក៏ជាដំណោះស្រាយ

Microsoft បានបង្ហាញថា ត្បិតថាបច្ចេកវិទ្យាបង្កើតឱ្យមានបញ្ហាមួយចំនួន ប៉ុន្តែវាក៏កំពុងបង្កើតដំណោះស្រាយជាច្រើនសម្រាប់មនុស្សដែរ។ បញ្ញាសិប្បនិម្មិតជំនាន់ថ្មី ដែល Microsoft ហៅថា «Copilots» អាចជួយមនុស្សបំពេញការងារបានកាន់តែមានប្រសិទ្ធភាព ដោយអាចសម្រាលបន្ទុកការងារ និងជំរុញភាពច្នៃប្រឌិតកាន់តែប្រសើរ។ លោក Satya Nadella ប្រធាន និងជានាយកប្រតិបត្តិរបស់ Microsoft បានលើកឡើងថា AI ជំនាន់ថ្មីនឹងកាត់បន្ថយបញ្ហាជាច្រើននៅពេលបំពេញការងារ និងជួយឱ្យអ្នកធ្វើការមានភាពច្នៃប្រឌិតខ្ពស់ជាងមុន។

យោងតាម របាយការណ៍ដែលមានឈ្មោះថា អនាគតនៃទីផ្សារការងារ របស់ WE Forum ក្នុងឆ្នាំ ២០២៣ បានបង្ហាញថា ស្ទើរតែបីភាគបួននៃក្រុមហ៊ុនចំនួន ៨០០ជុំវិញពិភពលោក នឹងដាក់ឱ្យប្រើប្រាស់បច្ចេកវិទ្យា AI ក្នុងរយៈពេល ៥ឆ្នាំ ខាងមុខ។ ជាមួយនឹងការគ្រប់គ្រងដ៏ត្រឹមត្រូវ បច្ចេកវិទ្យានេះនឹងក្លាយទៅជាដៃគូការងារដ៏ឆ្នើមរបស់មនុស្ស ព្រមទាំងផ្ដល់ពេលវេលាបន្ថែមទៀត សម្រាប់មនុស្សស្វែងរកបង្កើតគំនិតថ្មីៗ។

AI នឹងជួយមនុស្សឱ្យកាន់តែផលិតភាពការងារ

Microsoft Work Trend Index បានពន្យល់អំពីមូលហេតុដែលធ្វើឱ្យការងារកាន់តែពិបាក និង បង្ហាញពីរបៀបដែល AI អាចជួយមនុស្សបង្កើនភាពច្នៃប្រឌិត និងរីករាយជាមួយការងារឡើងវិញ។ ក្នុងនោះ មូលហេតុធំៗ ដែលនាំឱ្យមានឧបសគ្គបំពេញការងារ មាន ៥ដូចជា ១. មានកិច្ចប្រជុំដែលគ្មានប្រសិទ្ធភាពច្រើន, ២. គ្មានគោលដៅការងារច្បាស់លាស់, ៣. មានការប្រជុំច្រើនពេក, ៤. ភាពគ្មានកម្លាំងជំរុញពីខាងក្នុង, និង ៥. ពិបាកស្វែងរកព័ត៌មានដែលត្រូវការ។

ចំពោះបញ្ហា ដែលលើកឡើងក្នុងដំណើរការស្ទង់មតិ បុគ្គលិកជាងពាក់កណ្ដាលបានលើកឡើងថា ពួកគេមិនច្បាស់ថា ត្រូវធ្វើអ្វីបន្ទាប់ពីប្រជុំរួច ហើយ ៥៦ភាគរយ និយាយថា ពួកគេពិបាកក្នុងការសង្ខេបខ្លឹមសារ និងចំណុចសំខាន់ៗក្នុងកិច្ចប្រជុំ។ លើសពីនេះ មួយភាគបួននៃបុគ្គលិក បានលើកឡើងថា ពួកគេចំណាយពេលដល់ទៅ ៧ម៉ោងកន្លះក្នុងមួយសប្ដាហ៍សម្រាប់ការប្រជុំ និងមានអ្នកខ្លះទៀតចំណាយពេលជិត ៩ម៉ោងទៅលើអ៊ីម៉ែល និងស្ទើរតែ ពីរភាគបី បាននិយាយថា ពួកគេត្រូវចំណាយច្រើន ក្នុងការស្វែងរកព័ត៌មាន។

ទន្ទឹមនឹងការលើកឡើងនេះ ក្រុមហ៊ុន Microsoft បាននិយាយថា AI អាចជួយដោះស្រាយបញ្ហាប្រឈមទាំងអស់នេះដោយការវិភាគ និងតម្រៀបព័ត៌មាន ព្រមទាំងធ្វើឱ្យមានការផ្ដោតអារម្មណ៍ជាងមុនក្នុងកិច្ចប្រជុំ។ អ្នកស្រាវជ្រាវបានលើកឡើងថា «AI អាចបង្ហាញពីគន្លឹះក្នុងការគ្រប់គ្រងពេលវេលា និងថាមពល សម្រាប់ការងារសំខាន់ៗដល់មនុស្ស ព្រមទាំងជួយជំរុញឱ្យមានគំនិតបង្កើតថ្មី»។

AI អាចជួយឱ្យមនុស្សកាន់តែពេញចិត្តនឹងការងារ

ក្រុមអ្នកស្ទង់មតិ បានសួរទៅកាន់បុគ្គលិកអំពីការផ្លាស់ប្ដូរដែលពួកគេចង់ឃើញ ដើម្បីពង្រឹងជីវីតការងារបស់គេ។ បន្ទាប់មក ធ្វើការផ្គូផ្គងចម្លើយទៅនឹងអ្វីដែលបញ្ញាសិប្បនិម្មិតអាចធ្វើបាន។ ជាលទ្ធផល គេបានរកឃើញថា បញ្ញាសិប្បនិម្មិតអាចជួយឱ្យមនុស្សទំនេរច្រើនជាងមុន និងកាន់តែពេញចិត្តនឹងជីវិតការងាររបស់ខ្លួន។ លើសពីនេះ ក្រុមអ្នកស្ទង់មតិក៏បានសួរទៅកាន់នយោជកទៅលើការយល់ឃើញអំពីវត្តមានបញ្ញាសិប្បនិម្មិតផងដែរ។ ក្នុងនោះមាន ១៦ភាគរយ យល់ឃើញថា បញ្ញាសិប្បនិម្មិតនឹងបង្កើតឱ្យមានអត្រាគ្មានការងារកើនឡើង។ ខណៈមួយភាគបី យល់ថា វានឹងធ្វើឱ្យមនុស្សកាន់តែមានផលិតភាព និងកាត់បន្ថយការងារសមញ្ញ និងដដែលៗ។ ចំណែក មួយភាគបួន ជឿថា បច្ចេកវិទ្យានេះ នឹងធ្វើឱ្យសុខុមាលភាពបុគ្គលិកប្រសើរឡើង។

ជាមួយគ្នានេះ បុគ្គលិកភាគច្រើនបាននិយាយថា ពួកគេរីករាយនឹងប្រើ AI សម្រាប់ការងាររដ្ឋបាល ហើយមួយភាគបាននិយាយថា ពួកគេនឹងប្រើប្រាស់ AI សម្រាប់ការងារវិភាគ ឬសូម្បីតែការងារដែលពាក់ព័ន្ធនឹងគំនិតច្នៃប្រឌិត ក៏ដូចជាការស្វែងរកព័ត៌មាន សង្ខេបការប្រជុំ និងការរៀបចំផែនការប្រចាំថ្ងៃជាដើម៕