ការរៀបចំឯកសារដើម្បីទៅសិក្សានៅប្រទេសចិនដោយឥតគិតថ្លៃ ឬហៅថា ការសិក្សាអាហារូបករណ៍នៅប្រទេសចិន គឺតម្រូវឱ្យបេក្ខជនដាក់ពាក្យស្នើសុំអាហារូបករណ៍ និងរៀបចំឯកសារចាំបាច់ឱ្យបានត្រឹមត្រូវបំផុត​តាមអាហារូបករណ៍តម្រូវ ទើប​អាច​ជាប់បាន ។

លោក ស៊ូ សិទ្ធគុណ សមាជិកក្រុមប្រឹក្សាភិបាល នៃសមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន (ស.ន.ក.ច) លើកឡើងថា ឯកសាររៀបចំក្នុងការដាក់ពាក្យអាហារូបករណ៍ដែលចាំបាច់សម្រាប់បេក្ខជន ដោយ​ត្រូវត្រៀម រួមមាន៖ សញ្ញាបត្រមធ្យមសិក្សាទុតិយភូមិ, ព្រឹត្តិបត្រពិន្ទុរយៈពេល៣ឆ្នាំចុងក្រោយ, ពាក្យស្នើសុំអាហារូបករណ៍, រូបថតអេឡិចត្រូនិច៤x៦ផ្ទៃពណ៌ស, ផែនការការសិក្សា, លិខិតអនុសាសន៍២ច្បាប់, លិខិតថ្កោលទោស, លិខិតបញ្ជាក់សមត្ថភាពភាសាដែលមាន ភាសាអង់គ្លេស TOEFL/IELTS និងភាសាចិន HKS និង HKSS, ឯកសារពិនិត្យសុខភាព និងលិខិតឆ្លងដែន ។ លោកបន្តថា លិខិតខ្លះតម្រូវឱ្យបកប្រែជាភាសាចិន ឬអង់គ្លេសដែលតម្រូវតាមសាកលវិទ្យាល័យនីមួយៗ ។

បើលោក សិទ្ធគុណ ជំនាញដែលនិស្សិតសិក្សាអាហារូបករណ៍ជ្រើសរើសមានជាច្រើនជំនាញដូចជា ផ្នែកវេជ្ជសាស្ត្រ ផ្នែកវិស្វកម្ម និងបច្ចេកវិទ្យា ផ្នែកកុំព្យូទ័រ ផ្នែកអប់រំ ផ្នែកវិទ្យាសាស្ត្រសង្គម ផ្នែកសិល្បៈ និងផ្នែកអាជីវកម្ម ។

សមាជិកក្រុមប្រឹក្សាភិបាលរូបនេះបន្តថា និស្សិតក៏អាចស្វែងរកដំណឹងអាហារូបករណ៍បានតាមរយៈ សមាគមននិស្សិតកម្ពុជាប្រចាំសាធារណរដ្ឋប្រជាមានិតចិន, គេហទំព័រសាកលវិទ្យាល័យផ្ទាល់, នាយកដ្ឋានទំនាក់ទំនងវប្បធម៌ និងអាហារូបករណ៍នៃក្រសួងអប់រំ យុវជន និងកីឡា, និងស្ថានទូតចិនប្រចាំកម្ពុជា ។

លោក ស៊ូ សិទ្ធគុណ បន្ថែមថា បេក្ខជនជ័យលាភីនឹងទទួលបានអត្ថប្រយោជន៍ពីអាហារូបករណ៍ដូចជា ថ្លៃសាលា ថ្លៃស្នាក់នៅ ប្រាក់ប្រចាំខែ ថ្លៃធានារ៉ាប់រងសុខភាព បន្ទប់ស្នាក់នៅ(ស្នាក់នៅ២នាក់) មានឱកាសធ្វើការងារនៅក្នុងសាលារៀននិងមានប្រាក់ឧបត្ថម្ភ ការសិក្សារយៈពេល៥ឆ្នាំបូកជាមួយការសិក្សាភាសាចិន១ឆ្នាំ និងដំណើរទស្សនកិច្ចដោយឥតគិតថ្លៃផងដែរ ។

គួរបញ្ជាក់ដែរថា នេះជាការលើកឡើងរបស់លោក ស៊ូ សិទ្ធគុណ ក្នុងសិក្ខាសាលាស្ដីពី « ការផ្សព្វផ្សាយអាហារូបករណ៍ និងវគ្គបណ្ដុះបណ្ដាលបន្តការសិក្សានៅសាធារណរដ្ឋប្រជាមានិតចិន» កាលពីថ្ងៃទី០៤ ខែកក្កដា ឆ្នាំ២០២៣កន្លងទៅនៅវិទ្យាស្ថានបច្ចេកវិទ្យាកម្ពុជា ៕