ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានចាត់ទុកថា ការចូលរួមរបស់ស្ត្រីពិតជាមានតម្លៃមិនអាចកាត់ថ្លៃបានក្នុងការរក្សាសុខសន្តិភាព ក៏ដូចជាកំពុងចូលរួមយ៉ាងសកម្មក្នុងការ ពន្លឿនកិច្ចអភិវឌ្ឍលើគ្រប់វិស័យ រួមទាំងវិស័យអប់រំផងដែរ។
ថ្លែងក្នុងកម្មវិធីអបអរសាទរខួបលើកទី១១២ ទិវាអន្តរជាតិនារី ដែលរៀបចំឡើងកាលពីថ្ងៃទី១៦ ខែមីនា កន្លងទៅនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានបញ្ជាក់ថា ប្រធានបទ “ស្ត្រីរួមគ្នារក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល” បានគូសបញ្ជាក់អំពីតម្លៃស្មើភាពគ្នារវាងស្ត្រី និងបុរស ក្នុងការចូលរួមអភិវឌ្ឍលើគ្រប់វិស័យ និងលើកទឹកចិត្តឱ្យគ្រប់ដៃគូពាក់ព័ន្ធ បន្តអនុវត្តវិធានការផ្នែកគោលនយោបាយ កម្មវិធី និងសកម្មភាពជាក់លាក់។ ទន្ទឹមគ្នានេះ ដើម្បីលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី នៅគ្រប់របៀបវារៈនៃការស្តារសង្គម-សេដ្ឋកិច្ចរបស់ព្រះរាជាណាចក្រកម្ពុជា ក្រោយវិបត្តិកូវីដ-១៩ ព្រមទាំងលើកកម្ពស់ការរស់នៅតាមគន្លងប្រក្រតីភាពថ្មីក៏ដូចជាការកសាងភាពរឹងមាំ និងការអភិវឌ្ឍប្រកបដោយចីរភាព ជាពិសេសក្នុងយុគសម័យឌីជីថល។
ក្នុងឱកាសនោះ រដ្ឋមន្ត្រីក្រសួងអប់រំ បានវាយតម្លៃខ្ពស់ចំពោះកិច្ចខិតខំប្រឹងប្រែង និងការចូលរួមអស់ពីកម្លាំងកាយកម្លាំងចិត្ត របស់ថ្នាក់ដឹកនាំ និងអ្នកពាក់ព័ន្ធទាំងអស់ និងបានលើកទឹកចិត្តឱ្យបន្តកិច្ចខិតខំប្រឹងប្រែងបន្តទៀត ដើម្បីបន្តលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រីគ្រប់រូបនៅក្នុងវិស័យអប់រំ យុវជន និងកីឡា។
សូមជម្រាបថា ជារៀងរាល់ឆ្នាំ ក្រសួង ស្ថាប័នទាំងអង្គភាពសាធារណៈ និងឯកជននៅទូទាំងប្រទេស តែងតែរៀបចំកម្មវិធីអបអរទិវាអន្តរជាតិនារី ០៨ មីនា យ៉ាងផុសផុលដើម្បីបញ្ជាក់ពីតម្លៃរបស់ស្ត្រីនៅគ្រប់សសៃឈាមនៃការអភិវឌ្ឍសង្គម-សេដ្ឋកិច្ច ក៏ដូចជាការរស់នៅរបស់ប្រជាពលរដ្ឋគ្រប់គ្នា៕
