ក្រុមហ៊ុននាំចូល និងដំឡើងរថយន្តដ៏ធំនៅស្រុកខ្មែរ អ អឹម អេ (ខេមបូឌា) បានអំពាវនាវឱ្យយុវជនងាកមកសិក្សាជំនាញបច្ចេកទេសវិជ្ជាជីវៈកម្រិតធម្យម និងកម្រិតខ្ពស់ ព្រោះបច្ចុប្បន្ននេះក្រុមហ៊ុនធំៗ កំពុងមានតម្រូវការជំនាញបច្ចេកទេសទាំងនេះដើម្បីបំពេញទីផ្សារការងារ។ 

ថ្លែងក្នុងសន្និសីទសារព័ត៌មានស្តីពីពិព័រណ៍ការងារ និងផលិតភាពជាតិឆ្នាំ២០២៣ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈកាលពីពេលថ្មីៗនេះ លោក សាយ រតនៈ ប្រធាននាយកដ្ឋានបណ្តុះបណ្តាលធនធានមនុស្ស តំណាងក្រុមហ៊ុន អ អឹម អេ (ខេមបូឌា) មានប្រសាសន៍ថា ក្រុមហ៊ុនធំៗជាពិសេសក្រុមហ៊ុនរបស់លោកកំពុងមានតម្រូវការបុគ្គលិកដែលមានជំនាញបច្ចេកទេសកម្រិតមធ្យម និងខ្ពស់ សម្រាប់បម្រើការក្នុងសង្វាក់ផលិតកម្មដែលមានឱកាសការងាររាប់រយកន្លែងក្នុង១ខែៗ។ 

បើតាមលោក សាយ រតនៈ ជាមធ្យមក្រុមហ៊ុនរបស់លោកត្រូវការបុគ្គលិក១០០ទៅ២០០នាក់ក្នុងមួយខែ ក្នុងនោះភាគច្រើនក្រុមហ៊ុនជ្រើសរើសអ្នកជំនាញបច្ចេកទេសមធ្យម និងខ្ពស់ៗ។

ខ្ញុំលើកទឹកចិត្តឱ្យយុវជនត្រៀមលក្ខណៈក្នុងការចាប់ជំនាញបច្ចេកទេស ព្រោះទីផ្សារបច្ចុប្បន្នមានតម្រូវការខ្លាំង ខណៈដែលកម្លាំងពលកម្មបច្ចុប្បន្នត្រូវការបណ្តុះបណ្តាល…

លោក សាយ រតនៈ ប្រធាននាយកដ្ឋានបណ្តុះបណ្តាលធនធានមនុស្ស ក្រុមហ៊ុន RMA

សម្រាប់ប្រធាននាយកដ្ឋានបណ្តុះបណ្តាលធនធានមនុស្សរូបនេះ ប្រទេសកម្ពុជាកំពុងប្រែក្លាយពីប្រទេសប្រើប្រាស់រថយន្តមកជាប្រទេសដំឡើងរថយន្ត ហើយថ្ងៃខាងមុខ គឺឆ្ពោះបន្តទៅប្រទេសផលិតរថយន្ត ដូចនេះ តម្រូវការលើអ្នកជំនាញបច្ចេកទេសកម្រិតមធ្យម និងខ្ពស់គឺជាអាទិភាពដែលក្រុមហ៊ុនត្រូវការ ខណៈដែលក្រុមហ៊ុនបានចំណាយថវិកាមិនតិចជាងកន្លះលានដុល្លារជារៀងរាល់ឆ្នាំដើម្បីបណ្តុះបណ្តាល និងហ្វឹកហ្វឺនជំនាញបន្ថែមដល់បុគ្គលិកដែលមានជំនាញកម្រិតទាបឱ្យចាប់យកជំនាញកម្រិតធម្យម និងខ្ពស់ដើម្បីបំពេញចន្លោះខ្វះខាត។ 

មិនតែប៉ុណ្ណោះ ការមានជំនាញមធ្យម និងខ្ពស់នេះ គឺនឹងធ្វើឱ្យប្រជាពលរដ្ឋមានចំណូលខ្ពស់មានជីវភាពធូធារ ហើយអាចចូលរួមជាមួយរដ្ឋាភិបាលក្នុងការប្រែក្លាយកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០។

សូម​បញ្ជាក់ថា បើយោង​តាម​ប្រសាសន៍​របស់ ឯកឧត្តម កត្តា អ៊ន រដ្ឋលេខាធិការ និងជាអ្នក​នាំពាក្យ​ក្រសួងការងារ និងបណ្តុះបណ្តាលវិជ្ជាជីវៈ នៅ​ក្នុង​មួយឆ្នាំៗកម្ពុជា​មាន​តម្រូវ​ការ​កម្លាំងពលកម្មដែលមានជំនាញបច្ចេកទេស និងវិជ្ជាជីវៈ​ប្រមាណចន្លោះពី៣០ ទៅ​៥០ម៉ឺននាក់, ដោយសារតែមានតម្រូវការកម្លាំងជំនាញសម្រាប់ទីផ្សារ​ការងារ​កម្ពុជា ទើបរាជរដ្ឋាភិបាល​បានដាក់​ផែនការឱ្យ​ក្រសួងការងារ​ចាប់ពីឆ្នាំ​២០២៣នេះទៅ ត្រូវ​បណ្តុះបណ្តាលយុវជន ១លាន៥សែននាក់ ដើម្បីឆ្លើយតបទៅនឹងតម្រូវការទីផ្សាររបស់ប្រទេសកម្ពុជា ជាពិសេស​នៅក្នុងវិស័យ​ឧស្សាហកម្ម និង​វិស័យផ្សេងៗ​ទៀតដែលកំពុងមានសព្វថ្ងៃនេះ៕