ភ្នំពេញ – មានចំណូលចិត្តជាមួយការងារសង្គម ការងារស្ម័គ្រចិត្ត ការស្រាវជ្រាវនយោបាយ ការពិភាក្សា ការប្រកួតនិយាយសាធារណៈផ្សេងៗធ្វើឱ្យខ្ញុំដឹងថា ខ្លួនឯងចង់រៀនជំនាញទំនាក់ទំនងអន្តរជាតិ ។ នេះជាការលើកឡើងរបស់លោក វណ្ណ ប៊ុនណា សហស្ថាបនិកនៃ The Thinker Cambodia និងជាអតីតនិស្សិតបរិញ្ញាបត្រជំនាញទំនាក់ទំនងអន្តរជាតិ អតីតនិស្សិតបរិញ្ញាបត្រជាន់ខ្ពស់វិទ្យាសាស្ត្រនយោបាយនៅប្រទេសឥណ្ឌា និងបច្ចុប្បន្នជាអ្នកសិក្សាស្រាវជ្រាវមួយរូបនៅវិទ្យាស្ថានខ្មែរសំរាប់សហប្រតិបត្តិការនិងសន្តិភាព ។

លោក វណ្ណ ប៊ុនណា បានលើកឡើងថា ការជ្រើសរើសជំនាញសិក្សានៅមហាវិទ្យាល័យជាការសម្រេចចិត្តយ៉ាងសំខាន់របស់និស្សិតដែលកើតចេញពីការស្រលាញ់ ចំណង់ចំណូលចិត្ត ការស្រាវជ្រាវ ការជួបជាមួយមនុស្សខាងក្រៅឱ្យបានច្រើនដើម្បីជាមេរៀនថ្មីៗទើបនិស្សិតអាចបញ្ចប់បានដោយជោគជ័យ ។ ការសិក្សាជំនាញទំនាក់ទំនងអន្តរជាតិនេះ និស្សិតមិនគួររៀនតាមគ្នានោះទេ ព្រោះថាគោលដៅបុគ្គលម្នាក់ៗខុសគ្នា ការរំពឹងទុកខុសគ្នា និងឆន្ទៈក៏ខុសគ្នាផងដែរ ។

សហស្ថាបនិក The Thinker Cambodia រូបនេះបានបន្ថែមថា ប្អូនៗដែលកំពុងត្រៀមខ្លួនរៀនជំនាញនេះត្រូវមានការកំណត់លើខ្លួនឯងដូចជា ទាមទារឱ្យមានទម្លាប់ការសរសេរ និងអានព័ត៌មានដែលពាក់ព័ន្ធទៅនឹងបទវិភាគ នយោបាយ សង្គមឱ្យបានច្រើន ។ មួយវិញទៀត គឺការចេះភាសាអង់គ្លេស ព្រោះអត្ថបទដែលទាក់ទងជំនាញនេះភាគច្រើនត្រូវបានសរសេរឡើងជាភាសាអង់គ្លេស និងកម្មវិធីសិក្សាជាភាសាអង់គ្លេស ។ ជាបុគ្គលដែលមានបុគ្គលិកលក្ខណៈចូលចិត្តការងារសង្គម និងស្វែងយល់ពីប្រវត្តិសាស្ត្រផងដែរ ។

លោក វណ្ណ ប៊ុនណា បានបន្តថា ដើម្បីឱ្យការរៀនជំនាញអន្តរជាតិទទួលបានលទ្ធផលល្អសិស្សគួរមាន៣ចំណុចក្នុងខ្លួនដោយ ទីមួយ៖ និស្សិតត្រូវយល់ឱ្យបានច្បាស់អំពីទ្រឹស្ដីធំៗក្នុងមេរៀនបូកបញ្ចូលជាមួយការអាននិងតាមដានព័ត៌មានផ្សេងៗ ។ ទីពីរសូមលើកទឹកចិត្តដល់និស្សិតរៀនសូត្រក្នុងការសរសេរអត្ថបទ ព្រោះការសរសេរបន្តិចបន្តួចអាចធ្វើឱ្យសិស្សបើកគំនិតកាន់តែច្រើនទៅរកប្រភពនៃចំណេះដឹងថ្មី ។ ទីបី ការវិភាគ ការស្រាវជ្រាវ និងការប្រកួតនិយាយជាសាធារណៈជាគន្លឹះកាន់តែសំខាន់ដែលធ្វើឱ្យសិស្សកាន់តែទទួលបានចំណេះដឹងបន្ថែមសម្រាប់ការសិក្សារបស់សិស្ស ។

លោក វណ្ណ ប៊ុនណា

« យុវជនដើរតួនាទីយ៉ាងសំខាន់ទាំងកម្លាំងសេដ្ឋកិច្ច នយោបាយ និងជាកម្លាំងចលករក្នុងការអភិវឌ្ឍប្រទេស »

អតីតនិស្សិតជំនាញទំនាក់ទំនងអន្តរជាតិរូបនេះបានបន្តថា ការសិក្សាជំនាញទំនាក់ទំនងអន្តរជាតិបានផ្ដល់អត្ថប្រយោជន៍យ៉ាងទូលំទូលាយដល់អ្នកសិក្សា ដូចជាអាចមើលឃើញយ៉ាងទូលំទូលាយអំពីបរិបទនៃបញ្ហាសង្គម តំបន់ អន្តរជាតិ និងរូបភាពជាច្រើនទៀត ។ ជាមួយគ្នានេះ និស្សិតសិក្សាជំនាញទំនាក់ទំនងអន្តរជាតិបានបង្ហាញតាមរយៈរូបភាពជាអ្នកវិភាគ អង្គការសង្គមស៊ីវិល វិស័យការទូតស្រាវជ្រាវ និងការងារសង្គមផ្សេងៗជាច្រើនទៀត ។

លោក វណ្ណ ប៊ុនណា បានបន្ថែមថា លើសពីយល់ដឹងអំពីហេតុការណ៍ ព្រឹត្តិការណ៍ ក្នុងនិងក្រៅតំបន់ផ្សេងៗ និស្សិតក៏អាចស្វែងយល់អំពីដំណោះស្រាយនៃបញ្ហាក្នុងតំបន់តាមរយៈថ្នាក់ដឹកនៃតំបន់ និងក្លាយជាបុគ្គលដែលមានទស្សនៈវិស័យទូលំទូលាយ វែងឆ្ងាយ និងជាបុគ្គលដែលអាចស្វែងរកដំណោះស្រាយបានល្អប្រសើរសម្រាប់ការងារនៅថ្ងៃអនាគត ៕