ក្រុមហ៊ុន Toyota Tsusho Corporation ដែលជា​ក្រុមហ៊ុនវិនិយោគដំណើរការរោងចក្រដំឡើងរថយន្តរបស់ក្រុមហ៊ុនតូយ៉ូតានៅកម្ពុជា នឹងចាប់ផ្តើម​ដំណើរការ Toyota Academy នៅដើមឆ្នាំ២០២៦ខាងមុខ ដើម្បីជំរុញការអភិវឌ្ឍ ជំនាញក្នុងវិស័យមេកានិក និងយានយន្ត។

ក្នុងឱកាស​ទទួលទានអាហារការងារពេលព្រឹកជាមួយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅទីក្រុងអូសាកា លោក Harada Shigeru, Division CEO ក្រុមហ៊ុន Toyota Tsusho Co., LTD (Japan) បានលើកឡើងថា ក្រុមហ៊ុនយកចិត្តទុកដាក់ខ្ពស់ចំពោះការបណ្តុះបណ្តាលធនធានមនុស្ស ជាក់ស្តែងក្រុមហ៊ុននឹងដាក់ឱ្យដំណើរការ Toyota Academy នៅដើមឆ្នាំ២០២៦ ហើយជាមួយគ្នានេះ ​ដោយ​យោងតាមតម្រូវការបញ្ជាទិញខ្ពស់របស់អតិថិជន និងការជឿជាក់លើរាជរដ្ឋាភិបាលកម្ពុជា ក្រុមហ៊ុនក៏​នឹងពង្រីកខ្សែចង្វាក់ផលិតកម្មរបស់ខ្លួនបន្ថែមទៀតនាពេលខាងមុខនេះ។

គម្រោងនៃការ​បង្កើត Toyota Academy នៅ​ប្រទេស​កម្ពុជា ត្រូវ​បានផ្តើមកាលពីចុងឆ្នាំ២០២៤ ក្នុង​ជំនួបជាមួយ​សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា។

ក្នុងជំនួបនោះ រលោក Fujita Ryoji នាយកក្រុមហ៊ុន Toyota Tsusho Manufacturing (Cambodia) បានបញ្ជាក់ថា គម្រោងបង្កើតមជ្ឈមណ្ឌលបណ្តុះបណ្តាលជំនាញយានយន្តនេះ គឺក្នុងគោលបំណងមិនត្រឹមតែសម្រាប់ដំណើរការផលិតកម្មរថយន្តរបស់ក្រុមហ៊ុននោះទេ តែនឹងផ្តល់ការបណ្តុះបណ្តាញជំនាញក្នុងវិស័យយានយន្តដល់សិស្សនិស្សិត និងគ្រូបង្គោល ជាមួយនឹងបច្ចេកវិទ្យាថ្មីៗនៃវិស័យយានយន្តសម្រាប់កម្ពុជា។ គម្រោងមជ្ឈមណ្ឌលបណ្តុះបណ្តាលជំនាញយានយន្តនេះ នឹងមានកិច្ចសហប្រតិបត្តិការជាមួយគ្រឹះស្ថាន TVET កម្ពុជា ក្នុងការបណ្តុះបណ្តាលជំនាញដូចជា ជំនាញថែទាំជួសជុលរថយន្ត ជំនាញតោននិងបាញ់ថ្នាំរថយន្ត រួមនិងការផ្តល់នូវឧបករណ៍សម្ភារៈនានាពាក់ព័ន្ធនឹងវិស័យរថយន្ត ជាដើម។

លោកបណ្ឌិត យង់ ពៅ អគ្គលេខាធិការ​រាជបណ្ឌិតសភាកម្ពុជា មានប្រសាសន៍ថា ការ​បង្កើត​មជ្ឈមណ្ឌលបណ្តុះបណ្តាល​ជំនាញយានយន្តនៅកម្ពុជា (Toyota Academy) របស់​ក្រុមហ៊ុន Toyota គឺជា​ការ​បណ្តុះបណ្តាលវិជ្ជាជីវៈ​ប្រកប​ដោយ​គុណភាព​ទៅលើជំនាញ​បច្ចេកទេសតាមបែបជប៉ុន​ដល់យុវជន​កម្ពុជា ដែលក៏នឹងធ្វើ​ឱ្យ​ពួកគេ​ទទួល​បានឱកាស​ការងារ​ជាមួយ​ក្រុមហ៊ុន​ជប៉ុន ក៏​ដូចជា​ក្រុមហ៊ុន​ផ្សេងៗ​ទៀត។

បច្ចុប្បន្ន​ក្រុមហ៊ុន Toyota បានបើកដំណើរការ​រោងចក្រ​តម្លើង​រថយន្ត​នៅ​កម្ពុជា ដែល​មានទីតាំង​ស្ថិត​នៅ​ក្នុង​តំបន់សេដ្ឋកិច្ច​ពិសេស​រ៉ូយ៉ាល់​គ្រុប​ ភ្នំពេញ។ ក្នុងដំណាក់កាលដំបូង រោងចក្រ​នេះ​មានសមត្ថភាព​តម្លើង​រថយន្ត​ចំនួន២ប្រភេទ គឺប្រភេទ SUV ម៉ាក FORTUNER និងប្រភេទ Pick-UP ម៉ាក HILUX ដែលមាន​បុគ្គលិកជំនាញជាជនជាតិខ្មែរ និង​បរទេសសរុបចំនួន ១៥០នាក់៕