សម្រាប់មន្រ្តីនគរបាល​ ឬមន្រ្តីពន្ធនាគារ ដែលចង់បន្តការសិក្សាថ្នាក់បរិញ្ញាបត្រជាន់ខ្ពស់ និង​ថ្នាក់បណ្ឌិត ពេលនេះ បណ្ឌិត្យសភានគរបាលកម្ពុជា បានប្រកាសជ្រើសរើស​និស្សិត​អាហារូបករណ៍សរុបចំនួន៤០កន្លែង, ក្នុងនោះថ្នាក់បណ្ឌិត​វិទ្យាសាស្ត្រ​នគរបាល ចំនួន ១០កន្លែង លើជំនាញដឹកនាំបញ្ជាការងារសន្តិសុខ និងថ្នាក់បរិញ្ញាបត្រជាន់ខ្ពស់​វិទ្យាសាស្ដ្រ​នគរបាល ចំនួន ៣០កន្លែង លើជំនាញគ្រប់គ្រងនិងដឹកនាំបញ្ជា ជំនាញស៊ើបអង្កេតព្រហ្មទណ្ឌ និងជំនាញប្រឆាំង​បទល្មើស​បច្ចេកវិទ្យា។

លក្ខខណ្ឌនៃការជ្រើសរើស សម្រាប់ថ្នាក់បរិញ្ញាបត្រជាន់ខ្ពស់ ត្រូវ​ជាមន្រ្តីនគរបាលជាតិ ឬមន្រ្តីពន្ធនាគារ (បម្រើ​ការងារ​ក្នុង​ក្របខណ្ឌ​ក្រសួងមហាផ្ទៃ), បានឆ្លងកាត់​វគ្គបណ្តុះបណ្តាល​កម្រិតបឋម​វិជ្ជាជីវៈនគរបាល, មានបទពិសោធន៍ការងារ​យ៉ាង​តិច ៣ឆ្នាំ, មានសញ្ញាបត្រ​បរិញ្ញាបត្រ ឬសញ្ញាបត្រ​ដែលមាន​តម្លៃស្មើ ដោយ​ត្រូវភ្ជាប់​នូវ​ព្រឹត្តិបត្រពិន្ទុ, មានសញ្ញាបត្រ​មធ្យមសិក្សា​ទុតិយភូមិ (បាក់ឌុប) ឬសញ្ញាបត្រ​មានតម្លៃស្មើ, មានប្រវត្តិការងារល្អ គោរពវិន័យ មានសីលធម៌ល្អ និង​មាន​អាយុក្រោម ៤៥ឆ្នាំ (គិតត្រឹមថ្ងៃចូលរៀន), មានសុខភាពល្អ កាយសម្បទាមាំមួន មិនធ្លាប់មានពិរុទ្ធភាព និងឆ្លង​កាត់ការប្រឡង​វាយតម្លៃ និង​វាស់ស្ទង់សមត្ថភាព។

ការទទួលពាក្យ ចាប់ផ្តើមពីថ្ងៃជូនដំណឹងនេះ រហូតដល់ថ្ងៃទី៣០ ខែមេសា ឆ្នាំ២០២៦។ ទីកន្លែងទទួលពាក្យ នៅ​ច្រក​ចេញចូលតែមួយ (អគារប៉ុស្តិ៍យាម) នៃបណ្ឌិតសភានគរបាល​កម្ពុជា។ សម្រាប់ព័ត៌មានបន្ថែម​សូមទាក់ទងទៅកាន់លេខទូរស័ព្ទ 097 344 4066។

លក្ខខណ្ឌជ្រើសរើស សម្រាប់ថ្នាក់បណ្ឌិត ៖ ជាមន្រ្តីនគរបាល​ជាតិ ឬមន្រ្តីពន្ធនាគារ (បម្រើ​ការងារ​ក្នុងក្របខណ្ឌ​ក្រសួងមហាផ្ទៃ), មានបទពិសោធន៍ការងារយ៉ាងតិច ៨ឆ្នាំ, មានសញ្ញាបត្រ​បរិញ្ញាបត្រជាន់ខ្ពស់ ឬសញ្ញាបត្រ​ដែលមាន​តម្លៃស្មើ ដោយ​ត្រូវភ្ជាប់​នូវ​ព្រឹត្តិបត្រ​ពិន្ទុ, មានសញ្ញាបត្របរិញ្ញាបត្រ សញ្ញាបត្រ​មធ្យមសិក្សា​ទុតិយភូមិ (បាក់ឌុប) ឬសញ្ញាបត្រ​មានតម្លៃស្មើ, មានចំណេះដឹងភាសាបរទេស និង​មានសមត្ថភាព​សរសេរ​គម្រោង​ស្រាវជ្រាវ, មានអាយុ​ក្រោម ៤៨ឆ្នាំ (គិតត្រឹមថ្ងៃចូលរៀន), មានសុខភាពល្អ កាយសម្បទាមាំមួន មិន​ធ្លាប់​មានពិរុទ្ធភាព និងឆ្លង​កាត់ការប្រឡង​វាយតម្លៃ និង​វាស់ស្ទង់សមត្ថភាព។

សម្រាប់ថ្នាក់បណ្ឌិតនេះ ចាប់ទទួលពាក្យ​ពីថ្ងៃជូនដំណឹងនេះ រហូត​ដល់ថ្ងៃទី៣០ ខែមេសា ឆ្នាំ២០២៦។ សម្រាប់ព័ត៌មានបន្ថែម សូមទំនាក់ទំនងទៅកាន់ទូរស័ព្ទលេខ 012 299 453 ឬក្រុមតេលេក្រាម https://t.me/PACRegPhD ៕