ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិស្សជាបេក្ខជនតំណាងប្រទេសកម្ពុជាចំនួន៣៧នាក់ បានទៅចូលរួមប្រកួតគណិតវិទ្យាអូឡាំព្យាដអន្តរជាតិ សិង្ហបុរីឆ្នាំ២០២៣ SIMOC (2023) ដែលប្រព្រឹត្តធ្វើឡើងចាប់ពីថ្ងៃទី២២ ដល់ថ្ងៃទី២៥ ខែកក្កដា ឆ្នាំ២០២៣ នៅប្រទេសសឹង្ហបុរី ។ ដោយជាលទ្ធផលសិស្សកម្ពុជាដណ្តើមបានពានចំនួន១ និងមេដាយចំនួន៤២ត្រឡប់មកកម្ពុជាវិញ។
ការប្រកួតគណិតវិទ្យាអូឡាំព្យាដអន្តរជាតិ សិង្ហបុរី ឆ្នាំ២០២៣នេះ មានបេក្ខជនចូលរួមសរុបចំនួន ១៦៣៣នាក់ មកពីបណ្តាប្រទេសចំនួន២៥ទូទាំងពិភពលោក ។ ការប្រកួតនេះ ត្រូវបានបែងចែកជា៣កម្មវិធី គឺ ១.Math Olympiad Contest (ការប្រកួតជាឯកជន), ២. Mind Sports Challenge (ការប្រកួតជាក្រុម) និង ៣. Maths Warriors Competition (ការប្រកួតជាក្រុម)។
នៅឆ្នាំនេះ បេក្ខជនតំណាងប្រទេសកម្ពុជាមានចំនួន៣៧នាក់មកពី១៤សាលារដ្ឋ និងឯកជនផ្សេងៗគ្នា។ ជាលទ្ធផលនៃបេក្ខជនកម្ពុជាទទួលបាន រង្វាន់នៃសិស្សលំដាប់ពិន្ទុខ្ពស់ទាំង៣កម្មវិធីបញ្ចូលគ្នាលំដាប់ទី២ប្រចាំថ្នាក់ទី១១ចំនួន១, មេដាយមាសសរុបចំនួន១៣ មេដាយប្រាក់ចំនួន៦ និងមេដាយសំរឹទ្ធចំនួន២៣។
លោក សាន គីមស័ង ជាគ្រូដឹកនាំសិស្សកម្ពុជាទៅចូលរួមការប្រកួតនោះ បានសម្តែងមោទនភាពចំពោះសិស្សកម្ពុជាដែលមានសមត្ថភាពក្នុងការប្រកួតប្រជែងផ្នែកគណិតវិទ្យាជាមួយសិស្សមកពីបណ្តាប្រទេសផ្សេងៗ និងទទួលបានជ័យលាភីមេដាយជាច្រើនជូនជាតិ។ លោក គីមស័ង សង្ឃឹមថា កូនសិស្សខ្មែរនឹងខិតខំរៀនសូត្រ ហើយចូលរួមប្រកួតលើឆាកអន្តរជាតិ ដោយទទួលបានជ័យលាភីមេដាយជាច្រើនបន្ថែមទៀតជូនដល់ជាតិមាតុភូមិ និងលើកមុខមាត់ប្រទេសកម្ពុជានៅពេលអនាគត។
ខ្ញុំបាទក៏សូមអរគុណដល់សាលារៀន និងគ្រួសាររបស់សិស្សានុសិស្សដែលគាំទ្រនិងបញ្ជូនបេក្ខជន ឲ្យចូលរួមប្រឡង និងសង្ឃឹមថាសមកម្មនេះនឹងមានការបន្តគាំទ្រពីសំណាក់សង្គមជាតិ សាលារៀន គ្រួសារ និងមហាជនទូទៅ
លោក សាន គីមស័ង
គួរបញ្ជាក់ថា នេះជាឆ្នាំទី១នៅក្នុងរយៈពេល៦ឆ្នាំចុងក្រោយដែលបេក្ខជនកម្ពុជាចូលរួមការប្រឡងកម្រិតអន្តរជាតិ គណិតវិទ្យាអូឡាំព្យាដ អន្តរជាតិ សិង្ហបុរី ទទួលបានរង្វាន់សិស្សលំដាប់ខ្ពង់ទាំង៣ និងមេដាយមាសពីការប្រកួតលើវិញ្ញាសាគណិតវិទ្យាជាឯកជននេះ៕
