ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ក្រសួងអប់រំ យុវជន និងកីឡា សហការជាមួយអង្គការចលនាដើម្បីសុខភាពកម្ពុជា បានរៀនចំកម្មវិធីប្រកួតវោហារស័ព្ទជាក្រុម ក្រោមប្រធានបទ ការហាមឃាត់ការប្រើប្រាស់បារីអេឡិចត្រូនិកនិង ផលិតផលអេចឈ៍ ធី ភី នៅកម្ពុជា។
កម្មវិធីប្រកួតវោហារស័ព្ទជាក្រុមនេះ ធ្វើឡើងក្នុងគោលបំណងផ្តល់ឱកាសឱ្យយុវជនបញ្ចេញសមត្ថភាពក្នុងការប្រកួតវោហារស័ព្ទជាក្រុម អំពីប្រធានបទ ការលុបបំបាត់ការប្រើប្រាស់បារី អេឡិចត្រូនិក (E-Cigarette or Vape) និងផលិតផលអេចឈ៍ ធី ភី (HTPs) ដើម្បីលើកកម្ពស់សុខភាពសិក្សា។ លើសពីនេះ លើកកម្ពស់ការសិក្សាស្រាវជ្រាវជាក្រុម និងសីលធម៌នៃការជជែកជាសាធារណៈ។
សម្រាប់លក្ខខណ្ឌចូលរួមយុវជនដែលមានចំណាប់អារម្មណ៍ចង់ចូលរួមប្រកួត ត្រូវបង្កើតក្រុមដែលមានចំនួន៣នាក់ ដោយយ៉ាងហោចមានបេក្ខនារីម្នាក់ ។ បេក្ខជនត្រូវមានអាយុ១៥ឆ្នាំ ដល់២៥ឆ្នាំ និងមិនមែនជាភ្នាក់ងារក្រុមហ៊ុនគ្រឿងស្រវឹងនិងថ្នាំជក់។
ជាមួយគ្នានេះ បេក្ខជនត្រូវសរសេរអត្ថបទត្រូវប្រើទំហំ A4 ពុម្ពអក្សរ Khmer OS Siemreap ទំហំ 12pt និងមិនលើសពី២ទំព័រ ស្ដីពី ការហាមឃាត់ការប្រើប្រាស់បារីអេឡិចត្រូនិក និង ផលិតផលអេចឈ៍ ធី ភី នៅកម្ពុជា ដោយបង្ហាញនូវចំណុចសំខាន់ៗរួមមាន ការស្គាល់ និងយល់ដឹងពីបារីអេឡិចត្រូនិក និងផលិតផលអេចឈ៍ ធី ភី, ផលប៉ះពាល់នៃការប្រើប្រាស់បារីអេឡិចត្រូនិក និង ផលិតផលអេចឈ៍ ធី ភី, យុទ្ធសាស្ត្រផ្សព្វផ្សាយពាណិជ្ជកម្ម ចែកចាយ និងលក់ ផលិតផលបារីអេឡិចត្រូនិក និង ផលិតផលអេចឈ៍ ធី ភី របស់អ្នកផលិត និងឈ្មួញ, ដំណោះស្រាយឆ្លើយតបរបស់រាជរដ្ឋាភិបាល/ក្រសួងអប់រំ យុវជន និងកីឡា ដើម្បីលុបបំបាត់ការប្រើប្រាស់បារីអេឡិចត្រូនិកនិងផលិតផលអេចឈ៍ ធី ភី និងការលើកកម្ពស់សុខភាពសិក្សានៅកម្ពុជា ក៏ដូចជាអនុសាសន៍ និងសំណូមពរ។
ចំពោះ ក្រុមបេក្ខជនជ័យលាភីលេខ១ ទទួលបាន មេដាយមាស ថវិកា៣លានរៀល និងវិញ្ញាបនបត្របញ្ជាក់ជ័យលាភី, ក្រុមជ័យលាភីលេខ២ ទទួលបាន មេដាយប្រាក់ ថវិកា២លាន៤០ម៉ឺនរៀល និងវិញ្ញាបនបត្របញ្ជាក់ជ័យលាភី, ក្រុមជ័យលាភីលេខ៣ ទទួលបាន មេដាយសំរឹទ្ធ ថវិកា១លាន៨០ម៉ឺនរៀល និងវិញ្ញាបនបត្របញ្ជាក់ជ័យលាភី និងរង្វាន់លើកទឹកចិត្ត ទទួលបាន ថវិកា៨០ម៉ឺនរៀល និង វិញ្ញាបនបត្របញ្ជាក់ការចូលរួម។
បេក្ខជនដែលចាប់អារម្មណ៍អាចដាក់អត្ថបទប្រកួតចាប់ពីថ្ងៃជូនដំណឹងនេះ រហូតដល់ ថ្ងៃសុក្រ ទី១០ ខែកុម្ភៈ ឆ្នាំ២០២៣ ដោយផ្ញើអត្ថបទចូលរួមមកកាន់កម្មវិធី និងសួរព័ត៌មានតាមរយៈតេឡេក្រាម ០៩៦ ៣១១៣ ៩៥៧/០១៦ ៤៧៩ ៤២៩/០១២ ៧២៧ ៥៣៣។ ឯកសារជំនួយស្មារតីសូមចូលទៅកាន់តំណភ្ជាប់ https://t.me/ESDs_Ban_P5G ៕
