ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីពង្រឹងសមត្ថភាពសិស្សានុសិស្សក្នុងការរៀបចំផែនការសិក្សាឱ្យស្របតាមគោលដៅអាជីពនាពេលអនាគត ក្រសួងអប់រំ យុវជន និងកីឡា កំពុងបង្កើនសកម្មភាពជំរុញការអនុវត្ត “ប្រព័ន្ធគាំទ្រការងារមគ្គុទ្ទេសក៍អាជីព និងការផ្ដល់ប្រឹក្សា” នៅតាមសាលារៀនទូទាំងប្រទេស។
លោកជំទាវសាស្ត្រាចារ្យបណ្ឌិត បូ ច័ន្ទគុលិកា អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ការរៀបចំប្រព័ន្ធគាំទ្រការងារមគ្គុទ្ទេសក៍អាជីព និងការផ្ដល់ប្រឹក្សា ពិតជាមានភាពចាំបាច់ ដើម្បីពង្រឹងសមត្ថភាពយុវជនលើការរៀបចំផែនការសិក្សារៀនសូត្រដោយផ្សារភ្ជាប់នឹងគោលដៅអាជីពនាពេលអនាគត។
អនុរដ្ឋលេខាធិការក្រសួងអប់រំ បញ្ជាក់ថា ប្រព័ន្ធដែលក្រសួងគ្រោងនឹងរៀបចំដើម្បីគាំទ្រតាមសាលាគោលដៅ គឺបានរៀបចំក្របខណ្ឌ និងប្រព័ន្ធគាំទ្រជាច្រើនតាមរយៈគម្រោងសំខាន់ៗ ដូចជា គម្រោងវិទ្យាសាស្រ្ត និងបច្ចេកវិទ្យានៅកម្រិតអប់រំមធ្យមសិក្សា (STEP UP) និងគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC)។
លោកជំទាវសាស្ត្រាចារ្យបណ្ឌិត បូ ច័ន្ទគុលិកា បន្ថែមថា ក្រសួងនឹងអនុវត្តប្រព័ន្ធគាំទ្រការងារមគ្គុទ្ទេសក៍អាជីព និងការផ្ដល់ប្រឹក្សានៅសាលារៀនទូទាំងប្រទេស។ ដោយឡែក សាលារៀននៅក្នុងគម្រោង STEP UP និង SE4HC មានវិទ្យាល័យចំនួន២៥៩ ទទួលបានការគាំទ្រផ្នែកហរិញ្ញវត្ថុ និងបច្ចេកទេស លើការតម្រង់ទិសវិជ្ជាជីវៈ និងមគ្គុទេសក័អាជីពដែលពាក់ព័ន្ធនឹងវិទ្យាសាស្រ្ត បច្ចេកទេស និងបច្ចេកវិទ្យា។
បើតាម អនុរដ្ឋលេខាធិការក្រសួងអប់រំ ប្រព័ន្ធគាំទ្រនានាត្រូវបានបង្កើតឡើងរួមមាន៖ ទី១. ប្រព័ន្ធបណ្ដុះបណ្ដាល និងទទួលស្គាល់ ៖ រៀបចំឱ្យមានគ្រូប្រឹក្សាតាមសាលារៀន និងគ្រូឧទ្ទេសថ្នាក់ជាតិ ដែលមានសមត្ថភាព និងគុណវុឌ្ឍិត្រឹមត្រូវ ។ ទី២. វេទិកាបច្ចេកវិទ្យាតម្រង់ទិសវិជ្ជាជីវៈ៖ ការប្រើប្រាស់កម្មវិធី (Platform) “ត្រីវិស័យ” (Trey Visay) ដើម្បីជួយសិស្សថ្នាក់ទី៩ ដល់ទី១២ ក្នុងការតម្រង់ទិសអាជីព។ ទី៣. បង្កើតយន្តការភាពជាដៃគូរវាងសាលារៀន និងវិស័យឯកជន៖ សាលារៀនរដ្ឋ និងវិស័យឯកជនចុះកិច្ចព្រមព្រៀង និងអនុស្សារណៈនៃការយោគយល់លើការអនុវត្តកម្មវិធីសិក្សាស្តែម និងការអនុវត្តកម្មវិធីមគ្គុទេសក៍អាជីព។
ទី៤. យន្តការហិរញ្ញវត្ថុ (School Fund) ៖ ផ្ដល់ថវិកាគាំទ្រដល់សាលារៀនសម្រាប់អនុវត្តសកម្មភាពមគ្គុទ្ទេសក៍អាជីព សកម្មភាពភាពជាដៃគូរវាងរដ្ឋនិងឯកជន និងការអនុវត្តកម្មវិធីក្រៅម៉ោងលើការអប់រំស្តែមជាមួយវិស័យឯកជន និង ទី៥. ប្រព័ន្ធពិនិត្យតាមដាន និងវាយតម្លៃ៖ បង្កើតយន្តការវាយតម្លៃសមិទ្ធផលការងារ និងការផ្ដល់ការលើកទឹកចិត្តដល់ប្រតិបត្តិករតាមសាលារៀន៕
