ចាប់ផ្តើម​កាលពីថ្ងៃទី១៥ ខែធ្នូ ក្រសួងអប់រំ យុវជន និងកីឡា បានរៀបចំយុទ្ធនាការ “សារដឹងគុណ និង​លើកទឹកចិត្តដល់កងយោធពលខេមរភូមិន្ទលើបណ្ដាញសង្គម” ក្នុងគោលបំណងលើកទឹកចិត្ត និងសម្ដែងការដឹងគុណចំពោះវីរៈភាពរបស់កងទ័ព ដែលបាននិងកំពុងបំពេញបេសកកម្មការពារទឹកដី សន្តិភាព និងសេចក្ដីសុខរបស់ប្រជាជន។

ក្រោយ​ការ​បើក​យុទ្ធនាការ​នេះ គេឃើញសិស្សានុសិស្ស លោកគ្រូ អ្នកគ្រូ ក៏​ដូចជា​សាធារណជន​ជាច្រើន​ បានចូលរួមផ្ញើសារខ្លីៗ ជា​អត្ថបទក្តី​ ​រូបគំនូរ ឬ​វីដេអូ​ ដោយ​បាន​សម្តែង​ទឹកចិត្តអរគុណ និងលើកទឹកចិត្តជូនវីរកងទ័ពនៅជួរមុខ​។ សកម្មភាពនេះត្រូវ​បានសាទរពីអ្នកឃ្លាំមើលសង្គម ដោយថា វាជាការចែករំលែកក្ដីស្រឡាញ់ សាមគ្គីភាព របស់ប្រជាជាតិខ្មែរ។

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា យល់ថា ការសរសេរជាសារដឹងគុណ និង​លើកទឹកចិត្តដល់កងយោធពលខេមរភូមិន្ទលើបណ្ដាញសង្គម គឺជាការបណ្ដុះស្មារតីជាតិនិយម ស្មារតីស្នេហាជាតិ ក៏ដូចជាជួយផ្ដល់កម្លាំងចិត្តដល់វីរកងទ័ពខ្មែរជួរមុខ ឱ្យទទួលបានជ័យជំនះ។ លោកថា ការផ្ញើសារបែបនេះ ឆ្លុះបញ្ចាំងឱ្យឃើញថា ប្រជាជនខ្មែរ ជាពិសេសយុវជនជំនាន់ក្រោយ នៅតែបន្តដឹងគុណ និងគោរពចំពោះវីរៈភាពដ៏អង់អាចក្លាហានរបស់វីរកងទ័ពខ្មែរ។

ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា ក៏បានជំរុញឱ្យយុវជនខ្មែរទាំងអស់ បន្តចែករំលែកក្ដីស្រឡាញ់ សាមគ្គីភាព និងការដឹងគុណ តាមរយៈការផ្ញើសារលើកទឹកចិត្តទាំងនេះ ដើម្បីរួមចំណែកជាកម្លាំងស្មារតីដ៏ធំធេងដល់បងប្អូនកងទ័ពយើង។

ជាមួយគ្នានេះ លោក ពៅ សារឿន សាស្រ្តាចារ្យជំនួយ ផ្នែកនីតិសាស្រ្ត នៃសាកលវិទ្យាល័យ​ភូមិន្ទ​នីតិសាស្រ្ត និងវិទ្យាសាស្រ្តសេដ្ឋកិច្ច (RULE) យល់ឃើញដែរថា យុទ្ធនាការនេះ មិនត្រឹមតែជាការផ្ដល់កម្លាំងចិត្តដល់កងទ័ពប៉ុណ្ណោះទេ តែវាក៏ជាសកម្មភាពមួយដែលបង្ហាញពីការរួបរួមគ្នារបស់ប្រជាជាតិខ្មែរ និងជួយលើកស្ទួយសីលធម៌សង្គម ឱ្យកូនខ្មែរចេះដឹងគុណ និងឱ្យតម្លៃចំពោះអ្នកដែលបានធ្វើពលីកម្មដើម្បីជាតិ។ វាជាការអប់រំដ៏មានប្រសិទ្ធភាពមួយ តាមរយៈបណ្ដាញសង្គម។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ បានផ្តួចផ្តើមយុទ្ធនាការនេះឡើង ដោយសារយើងមើលឃើញពីតួនាទីដ៏សំខាន់របស់កងយោធពលខេមរភូមិន្ទ ក្នុងការថែរក្សាសន្តិភាព និងការពារបូរណភាពទឹកដី។ លោកជំទាវ​បន្តថា ក្រសួងអប់រំចង់ឱ្យសិស្សានុសិស្ស និងយុវជនទាំងអស់ ចូលរួមបង្ហាញពីការដឹងគុណ និងផ្ដល់កម្លាំងចិត្តដល់វីរកងទ័ព ដើម្បីបង្ហាញពីការចូលរួមចំណែកពីគ្រប់ស្រទាប់វណ្ណៈ៕