ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមនិស្សិតមកពីសាកលវិទ្យាល័យវិទ្យាសាស្រ្តសុខាភិបាល បានឈ្នះជ័យលាភីលេខ១ ក្នុងការប្រកួតបង្កើតស្នាដៃផលិតវីដេអូស្តីពីផលប៉ះពាល់ នៃការប្រើប្រាស់ឧបករណ៍អេឡិចត្រូនិក និងសារធាតុគីមីសម្រាប់ជក់ ដោយមានការចូលរួមប្រកួតពីគ្រឹះស្ថានសិក្សាចំនួន៣៦។
ក្នុងពិធីប្រកាស និងប្រគល់ពានរង្វាន់ដល់ម្ចាស់ជ័យលាភី កាលពីព្រឹកថ្ងៃទី១០ ខែតុលា ឆ្នាំ២០២៥ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា មានប្រសាសន៍ថា ការប្រកួតនេះ មិនត្រឹមតែជាការប្រកួតទេ ប៉ុន្តែផលជះបានមកពីស្នាដៃវីដេអូនេះ ពិតជាធំធេញណាស់។ លោកជំទាវថា ជ័យលាភី និងរង្វាន់គឺជាមោទនភាពមួយ ប៉ុន្តែយុវជនយើងបានរួមចំណែកក្នុងការផ្សព្វផ្សាយបញ្ហាប៉ះពាល់ដល់សង្គម ចូលរួមធ្វើអំពើល្អ ក៏ដូចជាចូលរួមកសាងនូវមូលធនមនុស្សសម្រាប់កម្ពុជា។
ឆ្លៀតក្នុងឱកាសនោះ លោកជំទាវបណ្ឌិត គឹម សេដ្ឋានី ក៏បានអំពាវនាវដល់ប្អូនៗសិស្សានុសិស្សទាំងអស់ បន្តអនុវត្តឱ្យបានខ្ជាប់ខ្ជួន ដោយត្រូវនៅឱ្យឆ្ងាយ ហើយត្រូវឆ្លើយថាទេចំពោះបារីអេឡិចត្រូវនិច ដើម្បីសុខភាពយើង អនាគតជាតិយើង និងប្រទេសជាតិយើង ហើយត្រូវធ្វើជាអ្នកនាំសារពីផលប៉ះពាល់នៃបារីអេឡិចត្រូនិចទៅដល់មិត្តភក្ដិដទៃទៀត។
កញ្ញា គឹម សុខឡេង មកពីសាកលវិទ្យាល័យវិទ្យាសាស្រ្តសុខាភិបាល ជាតំណាងក្រុមជ័យលាភីលេខ១ បានប្រាប់ថា គោលបំណងធំដែលក្រុមរបស់ខ្លួនចូលរួមប្រកួតនេះ គឺ ទី១.ចង់ចូលរួមជាចំណែកក្នុងការផ្សព្វផ្សាយបន្ថែមអំពីផលប៉ះពាល់នៃការប្រើប្រាស់បារីអេឡិចត្រូនិច យុវជនភាគច្រើនតែងតែយល់ខុសថា បារីអេឡិចត្រូនិចមិនសូវមានផលប៉ះពាល់ដូចបារីធម្មតា និង ទី២.ចង់ផ្សព្វផ្សាយដល់និស្សិតឱ្យបានដឹងថា បារីអេឡិចត្រូនិចផ្ដល់ផលប៉ះពាល់ខ្លាំង។
កញ្ញា សុខឡេង ក៏បានឱ្យដឹងដែរថា កត្តាដែលជំរុញឱ្យក្រុមខ្លួនទទួលបានជ័យលាភីលេខ១នេះ គឺដោយសារការធ្វើការងារស្រុះគ្នាជាក្រុម មានការចូលរួមពីសមាជិកនីមួយៗ ដឹងអំពីតួនាទីរបស់ខ្លួនជាដើម។ លើសពីនេះ ក្រុមរបស់ខ្លួនក៏ចង់បញ្ជ្រាបសារដោយសង្កត់ធ្ងន់ទៅលើផលប៉ះពាល់អំពីសារធាតុដែលមានក្នុងបារីអេឡិចត្រូនិច ផ្ដល់សារអប់រំ និងមានការសំណូមពរក្នុងខ្លឹមសារវីដេអូផងដែរ។ ហើយចំណុចសំខាន់នោះ វីដេអូអប់រំមួយនេះ ធ្វើយ៉ាងណាឱ្យខ្លឹមសារខ្លីហើយខ្លឹម។
ជាមួយគ្នានេះ កញ្ញា គឹម សុខឡេង ក៏អំពាវនាវដល់សិស្ស និស្សិត និងយុវជនទាំងអស់សូមកុំសាកល្បង ឬប្រើប្រាស់បារីអេឡិចត្រូនិច ប្រសិនចង់ក្លាយជាមូលធនមនុស្សដែលមានសុខភាពល្អ។ ហើយកញ្ញាក៏អំពាវនាវដល់អ្នកដែលមានឥទ្ធពលនៅលើបណ្ដាញសង្គម សូមកុំផ្សព្វផ្សាយអំពីបារីអេឡិចត្រូនិចគ្រប់រូបភាពទាំងអស់ទាំងនៅលើបណ្ដាញសង្គម ឬនៅតាមទីសាធារៈ។ កញ្ញា ក៏សូមណូមពរដល់រាជរដ្ឋាភិបាល សូមចាត់វិធានការច្បាប់ឱ្យបានតឹងរឹងទៅលើអ្នកប្រើប្រាស់បារីអេឡិចត្រូនិច អ្នកផ្សព្វផ្សាយលក់ និងអ្នកចែកចាយជាដើម។
យោងតាមអង្គការសុខភាពពិភពលោក និងស្ថាប័នសុខភាពធំៗនៅលើពិភពលោកបានរកឃើញថា បារីអេឡិចត្រូនិក មានផ្ទុកជាតិនីកូទីន ដែលជាសារធាតុញៀន និងសារធាតុពុលផ្សេងទៀត ដែលបង្កឱ្យមានជំងឺផ្លូរដង្ហើមរ៉ាំរ៉ៃ ហើយធ្វើឱ្យប៉ះពាល់ដល់ការអភិវឌ្ឍខួរក្បាលរបស់មនុស្សវ័យក្មេង ប៉ះពាល់ដល់ ការចងចាំ ការសិក្សា និងបង្កឱ្យកើតមានជំងឺថប់អារម្មណ៍។ ការសាកល្បងប្រើឧបករណ៍អេឡិចត្រូនិកនិងសារធាតុគីមីសម្រាប់ជក់ ជាផ្លូវនាំឱ្យក្រុមមនុស្សវ័យជំទង់ ឈានទៅរកការប្រើប្រាស់គ្រឿងញៀនផ្សេងទៀតនាពេលអនាគត៕
