ក្នុងជួបសម្តែងការគួរសមជាមួយសម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា នៅវិមានព្រឹទ្ធសភា កាលពីថ្ងៃទី៩ ខែកញ្ញា ឆ្នាំ២០២៥ លោកសាស្ត្រាចារ្យបណ្ឌិត Konstantin Novoselov ម្ចាស់ពានរង្វាន់ណូបែលរូបវិទ្យា ឆ្នាំ២០១០ និងជាសាស្ត្រាចារ្យនៃសាកលវិទ្យាល័យជាតិសិង្ហបុរី បានបង្ហាញពីការ​ចាប់អារម្មណ៍​ក្នុង​ការ​បង្កើតមន្ទីរពិសោធន៍ AI នៅកម្ពុជា ដើម្បីផ្តល់ឱកាសដល់យុវជនកម្ពុជា ដែលមានសមត្ថភាពអាចពង្រីកខ្លួន និងបង្កើនសមត្ថភាពក្នុងផ្នែកបច្ចេកវិទ្យានេះ។

លោកសាស្ត្រាចារ្យបណ្ឌិត Konstantin Novoselov បានលើកថា បច្ចុប្បន្ននេះ លោកបានមើលឃើញពីសក្តានុពលរបស់ប្រទេសកម្ពុជា ក្នុងនោះយុវជនកម្ពុជាដែលមានសមត្ថភាព ហើយក្នុងបេសកកម្មរបស់លោកនៅពេលនេះ កំពុងស្វែងរកយុវជន និងនិស្សិតកម្ពុជា ដែលមានសមត្ថភាពផ្នែកវិទ្យាសាស្ត្រ និងបច្ចេកវិទ្យាដើម្បីបណ្តុះបណ្តាលពួកគេបន្ថែមទៀត ឱ្យក្លាយទៅជាធនធានដ៏ពូកែក្នុងផ្នែកវិទ្យាសាស្ត្រ បច្ចេកវិទ្យា។

ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនោះជាការឆ្លើយតប សម្តេចតេជោ ហ៊ុន សែន បានសម្តែងនូវការពេញចិត្ត ដែលលោកសាស្ត្រាចារ្យម្ចាស់ជ័យលាភីណូបែលផ្នែករូបវិទ្យា បានសម្លឹងឃើញឱកាសក្នុងប្រទេសកម្ពុជា ហើយមានផែនការក្នុងការបណ្តុះបណ្តាលយុវជនកម្ពុជា ដែលមានសមត្ថភាពឱ្យមានការយល់ដឹងស៊ីជម្រៅក្នុងផ្នែកបច្ចេកវិទ្យា។

សម្តេចតេជោបានលើកឡើងទៀតថា យុវជនកម្ពុជា គឺមានសមត្ថភាពផ្នែកវិទ្យាសាស្ត្រ គួរឱ្យកត់សម្គាល់ដែលពួកគេបានខិតខំប្រឹងប្រែង និងអភិវឌ្ឍខ្លួនជាបន្តបន្ទាប់ ហើយតាមរយៈគម្រោងរបស់លោកសាស្ត្រាចារ្យនៅកម្ពុជានេះ ជាក្តីសង្ឃឹមបន្ថែមទៀតក្នុងវិស័យវិទ្យាសាស្ត្រ បច្ចេកវិទ្យា ឱ្យកាន់តែមានភាពរីកចម្រើន។ សម្តេចតេជោ បានប្រាប់លោកសាស្ត្រាចារ្យ ធ្វើកិច្ចការងារនេះ ជាមួយក្រសួងពាក់ព័ន្ធ ជាពិសេសក្រសួងអប់រំ ដើម្បីធ្វើយ៉ាងណាឱ្យយុវជនកម្ពុជាកាន់តែមានសមត្ថភាពនៅក្នុងផ្នែកបច្ចេកវិទ្យា វិទ្យាសាស្ត្រនេះកាន់តែច្រើន។

កាលពីថ្ងៃទី៨ ខែកញ្ញា កន្លងទៅ លោកសាស្ត្រាចារ្យបណ្ឌិត Konstantin Novoselov ក៏​បានជួប​ជាមួយ​ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ដោយបានគូសបញ្ជាក់ពីបំណងពីរ ដែលលោកគ្រោងនឹងអនុវត្ត​នៅ​កម្ពុជា រួមមាន ទី១ ស្វែងរកយុវជនឆ្នើមកម្ពុជាដែលមានទេពកោសល្យផ្នែកវិទ្យាសាស្ត្រ ចូលរួមក្នុងគម្រោងសិក្សាស្រាវជ្រាវរួមគ្នា (Research Project) នៃសាកលវិទ្យាជាតិសិង្ហបុរី និងចូលរួមក្នុងកម្មវិធីផ្លាស់ប្តូរនិស្សិត និងអាហារូបករណ៍នានា និង ទី២ ពិនិត្យលទ្ធភាពក្នុងការបង្កើតមជ្ឈមណ្ឌលនវានុវត្តន៍លើបញ្ញាសិប្បនិម្មិត ឬការបង្កើតវិទ្យាស្ថាន សម្រាប់រូបធាតុឆ្លាតវៃដែលមានមុខងារពិសេស (Institute For Functional Intelligent Materials) នៅកម្ពុជា សំដៅបង្កើនសមត្ថភាពនវានុវត្តន៍របស់កម្ពុជា និងជ្រោមជ្រែងសហគ្រាសកម្ពុជាដើម្បីឆ្ពោះទៅរកទីផ្សារសកល។

ឯកឧត្តម ហង់ជួន ណារ៉ុន បានបង្ហាញក្តីរីករាយស្វាគមន៍ និងចូលរួមសហការគាំទ្រសម្របសម្រួលនូវរាល់គំនិតផ្តួចផ្តើមកិច្ចសហប្រតិបត្តិការនេះ ដែលមានគោលដៅជំរុញនូវការអភិវឌ្ឍ និងបណ្តុះបណ្តាលធនធានមនុស្សនៅកម្ពុជាឱ្យកាន់តែរីកចម្រើន ដើម្បីឈានទៅសម្រេចចក្ខុវិស័យកម្ពុជាឆ្នាំ២០៣០ និង​២០៥០។

សូមជំរាបថា លោកសាស្ត្រាចារ្យបណ្ឌិត Konstantin Novoselov កើតនៅថ្ងៃទី២៣ ខែសីហា ឆ្នាំ១៩៧៤ នៅ Nizhny Tagil ប្រទេសរុស្ស៊ី។ លោកបានសិក្សាថ្នាក់បណ្ឌិត នៅសាកលវិទ្យាល័យ Radboud ក្នុង Nijmegen ប្រទេសហូឡង់ និងនៅសាកលវិទ្យាល័យ Manchester ចក្រភពអង់គ្លេស។ លោកបានរកឃើញសម្ភារៈ Graphene ដែលជាស្រទាប់កាបូនតែ ១ អាតូមប៉ុណ្ណោះ មានលក្ខណៈរឹងមាំជាងដែក តែស្រាល និងដឹកនាំអគ្គិសនី ឬកំដៅបានល្អ។ របបគំហើញថ្មីនេះ បានធ្វើឱ្យមានក្តីសង្ឃឹមសម្រាប់អនាគតផ្នែកអេឡិចត្រូនិក ថាមពល និងវេជ្ជសាស្រ្ត ហើយលោកក៏ទទួលពានរង្វាន់ណូបែលរូបវិទ្យា នៅឆ្នាំ២០១០៕