បើនិយាយពីចិត្តវិទ្យាអប់រំ កុមារត្រូវការរៀនដោយរូបិយ៍ ដែលបានន័យថា ពួកគេត្រូវការឃើញទិដ្ឋភាពពិតៗជាក់ស្តែង ដោយមិនមែនឃើញត្រឹមតែនៅលើក្រដាស ឬរូបភាពប៉ុណ្ណោះទេ ។ ដូច្នេះ ការនាំកុមារធ្វើទស្សនាសង្កេត ពិតជាមានសារៈសំខាន់ ដើម្បីជំរុញឱ្យការសិក្សារបស់ពួកគេមានភាពកាន់តែប្រសើរឡើង ជំរុញដល់ការអភិវឌ្ឍផ្នែកបញ្ញា រាងកាយ ចិត្ត និងស្មារតី។

អ្នកស្រី អ៊ុក សូនីតា នាយិកាសិក្សាធិការ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ឱ្យដឹងថា ការទស្សនាសង្កេត ត្រូវបានចែកចេញជាពីរ គឺទស្សនាសង្កេតនៅក្នុងថ្នាក់រៀន និងទស្សនាសង្កេតនៅក្រៅថ្នាក់រៀន ។ ទស្សនាសង្កេតនៅក្នុងថ្នាក់រៀន គឺជាបង្រៀនកុមារឱ្យយល់ដឹងពីវិញ្ញាណទាំង៥ ពោលគឺគេបានប៉ះ បានហិត បានភ្លក់ ដែលទាំងនេះ ជួយឱ្យកុមារទទួលបានការអភិវឌ្ឍកាន់តែល្អប្រសើរ។ « ប្រសិនបើបង្រៀនកុមារអំពីផ្លែស្វាយ យើងត្រូវតែមានផ្លែស្វាយខ្ចី និងផ្លែស្វាយទុំជាក់ស្តែង ដើម្បីឱ្យកុមារបានស្គាល់ និងបានសង្កេតពីផ្លែស្វាយ តើផ្លែស្វាយខ្ចី និងផ្លែស្វាយទុំមានពណ៌បែបណា? រស់ជាតិបែបណា? ដូច្នេះកុមារនឹងទទួលបានការអភិវឌ្ឍវិញ្ញាណទាំង៥ គឺ ឃានវិញ្ញាណ ជីវហាវិញ្ញាណ ចក្ខុវិញ្ញាណ សោតវិញ្ញាណ និងកាយវិញ្ញាណ»។

ដោយឡែកការសង្កេតនៅក្រៅថ្នាក់ គឺជាការនាំកុមារឱ្យទៅស្គាល់រូបភាពពិតជាក់ស្តែងនៅខាងក្រៅ ដើម្បីប្រៀបធៀបជាមួយមេរៀន ។ «ដូចជាការរៀនអំពីសត្វជាដើម យើងអាចនាំកុមារទៅកាន់សួនសត្វតែម្តង ដើម្បីបង្ហាញពួកគេឱ្យឃើញរូបភាពពិត»។

តើការទស្សនាសង្កេតនៅក្រៅថ្នាក់ មានអត្ថប្រយោជន៍អ្វីខ្លះទៀត?

ក្រៅតែពីផ្តល់ឱកាសឱ្យកុមារចេះរៀនសង្កេត និងប្រៀបធៀបមេរៀន និងបរិយាកាសខាងក្រៅជាក់ស្តែងហើយ ការទស្សនាសង្កេតនៅក្រៅថ្នាក់ ក៏បានផ្តល់អត្ថប្រយោជន៍ដូចជា ១.ពង្រឹងកាយសម្បទា ៖ ព្រោះការចំណាយពេលលេងខាងក្រៅជួយឱ្យកុមារមានរាងកាយមាំមួន និងមានសុខភាពល្អ ។ ២.ពេលវេលាសម្រាកលម្ហែខួរក្បាល ៖ ពេលវេលាដែលបានចំណាយនៅក្នុងធម្មជាតិផ្តល់ឱ្យកុមារនូវឱកាសលម្ហែខួរក្បាលរបស់ពួកគេនូវការសម្រាកដ៏ល្អពីការទាមទារនៃជីវិតប្រចាំថ្ងៃ។ ៣.ជួយកាត់បន្ថយការថប់បារម្ភ និងភាពតានតឹង ៖ ការចូលរួមក្នុងសកម្មភាពរាងកាយត្រឹមតែ ១០នាទីអាចជះឥទ្ធិពលយ៉ាងសំខាន់ទៅលើសុខុមាលភាពផ្លូវចិត្ត និងផ្លូវចិត្តរបស់កុមារ បង្កើនការស្រឡាញ់ខ្លួនឯង បន្ថយការថប់បារម្ភ និងកាត់បន្ថយភាពតានតឹង។ ដូច្នេះ នៅខាងក្រៅគឺជាកន្លែងដ៏ល្អឥតខ្ចោះដើម្បីលើកទឹកចិត្ត និងចូលរួមសកម្មភាពរាងកាយរបស់កុមារ។

៤.ជំនួយក្នុងការបញ្ចូលវីតាមីន D ៖ វីតាមីនដ៏សំខាន់នេះមានសារៈសំខាន់ណាស់សម្រាប់ការលូតលាស់របស់កុមារ ជួយថែរក្សារាងកាយ និងចិត្តឱ្យមានសុខភាពល្អ ហើយប្រភពធម្មជាតិដ៏ល្អបំផុតមួយគឺព្រះអាទិត្យ។ វីតាមីន D ជួយឱ្យរាងកាយរបស់យើងគ្រប់គ្រងកាល់ស្យូម និងផូស្វ័រ រក្សាឆ្អឹង សាច់ដុំ និងធ្មេញឱ្យមានសុខភាពល្អ ។ ៥.បង្កើនទំនាក់ទំនងសង្គម និងអារម្មណ៍ ៖ ការទស្សនាសង្កេត និងការលេងខាងក្រៅផ្តល់ឱ្យកុមារនូវឱកាសដើម្បីឈ្វេងយល់ និងដំណើរការអារម្មណ៍ក្នុងស្ថានភាពដែលពួកគេអាចគ្រប់គ្រងបាន ។ នៅខាងក្រៅគឺជាកន្លែងដ៏ល្អឥតខ្ចោះសម្រាប់កុមារដើម្បីបង្កើតមិត្តភក្តិ ជួយអភិវឌ្ឍជំនាញសង្គម និងអារម្មណ៍របស់ពួកគេ ដោយចូលរួមក្នុងសកម្មភាពជាក្រុម និងការដោះស្រាយបញ្ហា ។

៦.កុមារឈ្វេងយល់ពីបរិស្ថានធម្មជាតិ ៖ ការទស្សនាសង្កេត និងការលេងខាងក្រៅអាចអនុញ្ញាតឱ្យកុមារភ្ជាប់ជាមួយធម្មជាតិ និងស្វែងរកប្រភេទរុក្ខជាតិផ្សេងៗអាចមានឥទ្ធិពលស្ងប់ស្ងាត់ ។ ការចំណាយពេលនៅខាងក្រៅអនុញ្ញាតឱ្យកុមារស្វែងយល់ពីបរិយាកាសធម្មជាតិរបស់ពួកគេ និងពិភពលោកជុំវិញពួកគេ ។

យ៉ាងណាក៏ដោយបើតាមអ្នកស្រី អ៊ុក សូនីតា ការទស្សនាសង្កេត ពិតជាជួយកុមាររៀនសូត្របានល្អប្រសើរ ដោយសារកុមារបានរៀនតាមរយៈវិធីសាស្រ្តរូបិយ៍ ដែលបានន័យថា កុមារបានឃើញផ្ទាល់ និងទទួលការយល់ដឹងពីវត្ថុផ្ទាល់៕