គ្មានអ្វីបានមកដោយងាយស្រួលនោះទេ ក្រោយការខិតខំប្រឹងប្រឹងសិក្សារៀនសូត្រអស់រយៈពេល១២ឆ្នាំ ទីបំផុត យុវសិស្ស ម៉ូវ ដេវីដ ជាសិស្សមកពីវិទ្យាល័យជាស៊ីមសន្ធរម៉ុក បានប្រឡងបាក់ឌុបជាប់និទ្ទេស A ។ យុវសិស្ស ម៉ូវ ដេវីត បានឱ្យដឹងថា ការកំណត់គោលដៅ ជំរុញឱ្យរូបគេទទួលបាននិទ្ទេស A នេះ។

យុវសិស្ស ម៉ូវ ដេវីដ និយាយថា រូបគេមានមហិច្ឆតាខ្ពស់ចង់ប្រឡងបាក់ឌុបទទួលបាននិទ្ទេស A ចាប់តាំងពីរៀនថ្នាក់ទី៩ ហើយដើម្បីសម្រេចក្ដីស្រមៃនេះ រូបគេបានកំណត់គោលដៅស្វែងរកចំណុចខ្លាំង និងចំណុចខ្សោយរបស់ខ្លួន និងអនុវត្តតាមផែនការចង់បាននិទ្ទេស A ។ ដេវីដ បន្តថា នៅពេលរៀនថ្នាក់ទី១១ រូបគេបានរៀនត្រៀមបំប៉នបន្ថែមមូលដ្ឋានគ្រឹះមុខវិជ្ជាថ្នាក់ទី១២ជាមុន។ អំឡុងពេលរៀន រៀបចំកាលវិភាគសិក្សាឱ្យបានត្រឹមត្រូវ និងអនុវត្តលំហាត់ជាប្រចាំត្រូវធ្វើពីតូចទៅធំ។ នៅសល់បីខែមុនការប្រឡងមកដល់ រូបគេចាប់ផ្ដើមសង្ខេបមេរៀនតាមខ្លឹមសារមេរៀននីមួយៗ ទើបយកមកអាន ឬទន្ទេញឱ្យចាំ។ ចំណែក មុខវិជ្ជាប្រវត្តិវិទ្យា រូបគេបែងចែកតាមសម័យកាល ដើម្បីងាយស្រួលរំលឹក និងទន្ទេញងាយយល់ ងាយចាំ។

កត្តាដែលជំរុញឱ្យ ដេវីត ចង់ទទួលបាននិទ្ទេសA ដោយសារមានការជំរុញ លើកទឹកចិត្តពីលោកគ្រូ អ្នកគ្រូ ក៏ដូចជាមិត្តភក្ដិឱ្យខិតខំសិក្សាដើម្បីទទួលបានភាពជោគជ័យ។ លើសពីនេះ ឪពុកម្ដាយជាកម្លាំងចិត្ត គាំទ្រ និងផ្ដល់ឱកាសឱ្យបានសិក្សារៀនសូត្រ។ ជាពិសេស គឺខ្លួនឯងផ្ទាល់ ខិតខំប្រឹងប្រែងរៀនសម្រេចយកនិទ្ទេស A ព្រោះបើទោះជាមានការជំរុញពីមនុស្សជុំវិញខ្លួន ប៉ុន្តែបើខ្លួនឯងគ្មានគោលបំណង និងក្ដីស្រមៃក៏មិនអាចទទួលបានជោគជ័យដែរ។

«នៅពេលដឹងថាជាប់និទ្ទេស A ខ្ញុំមានអារម្មណ៍សប្បាយចិត្តខ្លាំង ព្រោះបានទទួលអ្វីដែលយើងខិតខំប្រឹងប្រែង ដោយសារក្រោយបញ្ជប់ថ្នាក់ទី១២ ខ្ញុំទទួលបានជោគជ័យដំបូងមុននឹងចូលទៅដល់សង្គមកាន់តែជ្រៅ» ។

យុវសិស្ស ម៉ូវ ដេវីដ ជាសិស្សនិទ្ទេស A

បញ្ហាប្រឈមដែល ដេវីត ជួបប្រទះអំឡុងពេលរៀនថ្នាក់ទី១២ គឺ ទី១. ការស្វែងរកខ្លួនឯង ទី២. ការស្វែងយល់ពីមជ្ឈដ្ឋានជុំវិញខ្លួន ទី៣. ការគ្រប់គ្រងពេលវេលា និងទី៤. សុខភាព។ លើសពីនេះ រូបគេជាមនុស្សចូលចិត្តរៀនអ្វីដែលថ្មី និងអភិវឌ្ឍសមត្ថភាពខ្លួនឯងជាប្រចាំ ។ ដេវីត បន្តថា រូបគេក៏បានចូលរួមប្រកួតក្នុងកម្មវិធីនិយាយជជែកដេញដោល អ្នកបន្តវេន ជាភាសាខ្មែរ ស្របពេលកំពុងរៀនត្រៀមប្រឡងយកនិទ្ទេសA ។ បើទោះជាប្រឈមបញ្ហាទាំងនោះក្ដី ដេវីដ នៅតែអាចជំនះឧបសគ្គទាំងនេះបាន ដោយគេស្វែងរកដំណោះស្រាយ រៀបចំកាលវិភាគសិក្សាឱ្យបានត្រឹមត្រូវ ទីបំផុតរូបគេក៏ទទួលបានលទ្ធផលល្អព្រមគ្នា ពោលគឺទទួលបានជ័យលាភីលេខ១ ក្នុងកម្មវិធីនិយាយជជែកដេញដោល និងប្រឡងជាប់និទ្ទេសA ។

បើតាមយុវសិស្ស ដេវីដ និទ្ទេសA គ្រាន់តែស្ដែងចេញពីសមត្ថភាព និងការខិតខំប្រឹងប្រែងរយៈពេល១២ឆ្នាំ មានឱកាសទទួលបានរង្វាន់ អាហារូបករណ៍ លើកកិត្តិយសខ្លួនឯង គ្រួសារ និងសាលារៀន។ ប៉ុន្តែសម្រាប់សិស្សានុសិស្សដែលប្រឡងមិនទទួលបាននិទ្ទេសដូចអ្វីដែលខ្លួនចង់បានក៏កុំបាក់ទឹកចិត្ត ព្រោះការប្រឡងបាក់ឌុបគ្រាន់តែជាដំណាក់កាលជោគជ័យដំបូងប៉ុណ្ណោះ។

សិស្សនិទ្ទេស A ឆ្នាំ២០២៣ រូបនេះ ក៏បានលើកទឹកចិត្តសិស្សប្អូនដែលត្រូវប្រឡងឆ្នាំក្រោយ ត្រូវប្រឹងប្រែងឱ្យអស់ពីសមត្ថភាព កុំចាត់ទុកការប្រឡងបាក់ឌុបជាសម្ពាធតែត្រូវគិតថាវាជាកាតព្វកិច្ចដែលយើងត្រូវបំពេញ។ លើសពីនេះ កុំផ្ដោតទៅលើពាក្យសម្ដីអវិជ្ជមាន តែត្រូវពង្រឹងសមត្ថភាព ខំឱ្យអស់ពីសមត្ថភាព ប្រសិនបើយើងបានខិតខំហើយមិនទទួលបានជោគជ័យនោះក៏មិនមែនជាកំហុសរបស់យើងដែរ។ លើសពីនេះ ត្រូវថែរក្សាសុខភាពឱ្យបានល្អដើម្បីទទួលបានភាពជោគជ័យនៅក្នុងការសិក្សា។ ខិតខំប្រឹងប្រែងរៀនពីដើមឆ្នាំ ពង្រឹងមូលដ្ឋានគ្រឹះ ស្វែងរកខ្លួនឯង អភិវឌ្ឍខ្លួនឯងឱ្យខ្លាំង៕