ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈពិធីបុណ្យចូលឆ្នាំថ្មីប្រពៃណីជាតិខិតជិតមកដល់ និស្សិតខ្មែរដែលកំពុងបន្តការសិក្សានៅប្រទេសចិន បានបង្កើតជាការជួបជុំនៅតាមតំបន់ ក៏ដូចជានៅស្ថានទូត ដើម្បីរៀបចំកម្មវិធីសង្រ្កាន្តឆ្នាំថ្មី ដើម្បីរំលឹកអនុស្សាវរីយ៍ បង្ហាញវប្បធម៌ ដែលក៏ជាការរំសាយអារម្មណ៍នឹកស្រុកកំណើតនារដូវចូលឆ្នាំ។
លោក ស៊ូ សិទ្ធិគុណ ប្រធានសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន អាណត្តិទី៨ បានឱ្យដឹងថា ជារៀងរាល់ឆ្នាំនិស្សិតខ្មែរនៅប្រទេសចិនតែងធ្វើសង្គ្រាន្តដើម្បីជួបជុំគ្នាមុនថ្ងៃបុណ្យចូលឆ្នាំមកដល់ អាចកើតឡើងតាម២រូបភាព ដោយទីមួយគឺធ្វើឡើងនៅតាមសាកលវិទ្យាល័យមួយចំនួននៅក្នុងខេត្តដែលមានព្រំប្រទល់ ជាប់ ឬក្បែរ ប្រទេសមីយ៉ាន់ម៉ា ប្រទេសឡាវ ជាដើម។ ដោយសមាគមសិស្សនិស្សិតបានស្នើទៅកាន់សាលាដោយផ្ទាល់ ដើម្បីប្រារព្ធកម្មវិធីសង្គ្រាន្តឡើងជុំគ្នា និងជួបជុំលេងល្បែងប្រជាប្រិយ ពិសារអាហារសាមគ្គី រាំកម្សាន្តចង្វាក់ខ្មែរ និងបង្កើនមិត្តភាពរវាងនិស្សិតដែលនៅទីនោះផ្ទាល់។
ចំពោះរូបភាពទី២ សមាគមនិស្សិតខ្មែរភាគច្រើនធ្វើឡើងនៅតាមអគ្គកុងស៊ុលខ្មែរនៅប្រទេសចិន ទៅតាមតំបន់ ជាក់ស្ដែងកាលពីថ្ងៃទី២ ខែមេសា ឆ្នាំ២០២៥ និស្សិតកម្ពុជាដែលកំពុងសិក្សានៅទីក្រុងណាននីង និងទីក្រុងគុយលីន ប្រមាណ១២០នាក់ ដែលមកពីសាកលវិទ្យាល័យចំនួន១០ បានចូលរួម និងជួយរៀបចំកម្មវិធីចូលឆ្នាំប្រពៃណីខ្មែរ ដែលដឹកនាំ និងរៀបចំដោយ លោក តាំង សុខងន់ អគ្គកុងស៊ុលកម្ពុជាប្រចាំទីក្រុងណាននីង និងមានការចូលរួមពីស្ថានកុងស៊ុល ឡាវ ថៃ មីយ៉ានម៉ា និងប្រទេសផ្សេងៗទៀតប្រចាំទីក្រុងណាននីង។ ជាមួយគ្នានេះដែរ ចំពោះស្ថានទូតកម្ពុជានៅទីក្រុងប៉េកាំង ក៏នឹងរៀបចំដើម្បីជួបជុំនិស្សិតខ្មែរដែលកំពុងសិក្សានៅក្នុងទីក្រុងប៉េកាំងនាថ្ងៃទី៩ ខែមេសា នេះចាប់ពីម៉ោង៣រសៀល ដល់៩យប់ ដោយមានអ្នកចូលរួមភាគច្រើនជានិស្សិតខ្មែរដែលកំពុងសិក្សា និងរស់នៅក្នុង និងក្បែរទីក្រុងប៉េកាំង។
“ការរៀបចំសង្គ្រាន្តខ្នាតតូចៗនេះ អាចជួយឱ្យនិស្សិតខ្មែរដែលកំពុងសិក្សានៅប្រទេសចិន គ្រប់តំបន់បានជួបជុំសិស្សខ្មែរដូចគ្នា លេងល្បែងប្រជាប្រិយខ្មែរ រាំកម្សាន្ត ហើយក៏មានការចូលរួមពីនិស្សិត ចិន ថៃ ឡាវ វៀតណាម និងមីយ៉ាន់ម៉ា”
ជាមួយគ្នានេះ បើតាម លោក សិទ្ធិគុណ នៅក្នុងកម្មវិធីសង្គ្រាន្តដែលរៀបចំនៅស្ថានទូតកម្ពុជានាទីក្រុងប៉េកាំង ក៏មានសកម្មភាពជាច្រើន ដូចជា ជួយគ្នាធ្វើម្ហូបអាហារខ្មែរ លេងល្បែងប្រជាប្រិយ ការសម្ដែងរបាំ ការបង្កើតទំនាក់ទំនងសម្រាប់និស្សិតដែលមកពីសាកលវិទ្យាល័យផ្សេងៗគ្នា ហើយសកម្មភាពទាំងនេះបានជួយច្រើនដល់ផ្លូវចិត្តរបស់និស្សិតនៅប្រទេសចិន។ ព្រោះនៅក្នុងកំឡុងខែនេះ នៅតាមសាកលវិទ្យាល័យភាគច្រើនជាកំឡុងខែប្រឡង រីឯនិស្សិតដែលត្រៀមបញ្ចប់ការសិក្សាគឺជាពេលដែលត្រូវត្រៀមបញ្ចប់សារណា ដូចនេះអាចជួយរំសាយអារម្មណ៍តានតឹងពីការសិក្សា និងការនឹកស្រុកកំណើតក្នុងឱកាសបុណ្យឆ្នាំខ្មែរ។
ក្នុងនាមជាប្រធានសមាគមនិស្សិត លោក សិទ្ធិគុណ ចង់ឱ្យនិស្សិតខ្មែរនៅប្រទេសចិន បានជួបជុំគ្នាញឹកញាប់ ច្រើនជាងកម្មវិធីមួយឆ្នាំម្ដង ឬពីរដង ព្រោះពួកគេនឹងអាចចែករំលែកនូវបទពិសោធន៍ផ្សេងៗដែលបានជួបក្នុងកំឡុងពេលសិក្សានៅសាលាផ្សេងគ្នា ទាំងបទពិសោធន៍នៃការរស់នៅ និងទំនាក់ទំនងប្រចាំថ្ងៃ។ ក្នុងឱកាសជួបជុំនិស្សិតនេះផងដែរ សមាគមនិស្សិតខ្មែរក៏តែងតែមានការដាក់តាំងនូវវត្ថុអនុស្សាវរីយ ចូលរួមសម្ដែងរបាំង សិល្បៈ ផ្សេងៗដើម្បីឱ្យនិស្សិតបរទេសបានចូលរួមទស្សនា និងស្វែងយល់ពីវប្បធម៌ និងទំនៀមទម្លាប់ខ្មែរផងដែរ៕
