អុកខ្មែរបែបបញ្ញាសិប្បនិម្មិត បានឈ្នះមេដាយមាសក្នុងកម្មវិធីប្រកួតគំនិតច្នៃប្រឌិត និងបង្កើតថ្មី នៅសាកលវិទ្យាល័យឃីងស្តូន (Kingston University) ចក្រភពអង់គ្លេស កាលពីពេលថ្មីៗនេះ ក្នុងការ​ប្រកួតដែលមាន ៣២ប្រទេសចូលរួម។

លោក តាំង ហៀងឡេង អ្នកបង្កើតល្បែងអុកខ្មែរបែបបញ្ញាសិប្បនិម្មិត និងជានិស្សិតអនុបណ្ឌិតវិទ្យាសាស្ត្រព័ត៌មានវិទ្យា នៃសាកលវិទ្យាល័យន័រតុន ដែលជា​អ្នក​បង្កើត​កម្មវិធីអុកខ្មែរបែបបញ្ញាសិប្បនិម្មិតនេះ មានប្រសាសន៍ថា ការចូលរួមកម្មវិធីប្រកួតគំនិតច្នៃប្រឌិត និងបង្កើតថ្មី នៅចក្រភពអង់គ្លេស គឺលោកចង់បង្ហាញស្នាដៃកូនខ្មែរបានបង្កើត និងចង់លើកមុខមាត់ប្រទេសកម្ពុជានៅលើឆាកអន្តរជាតិ។

អ្នកបង្កើតបញ្ញាសិប្បនិម្មិតល្បែងអុកខ្មែរ រូបនេះ បញ្ជាក់បន្ថែមថា ចំណុចដែលគួរឱ្យចាប់អារម្មណ៍ និងទទួលបានជ័យលាភីមេដាយមាស របស់អុកខ្មែរដោយប្រើបញ្ញាសិប្បនិម្មិត គឺដោយសារ ទី១.បង្ហាញនូវវប្បធម៌ និងលក្ខណៈនៃល្បែងប្រជាប្រិយខ្មែរទៅអន្តរជាតិ, ទី២. ការរួមបញ្ចូលនៃបញ្ញាសិប្បនិម្មិតដែលអាចឱ្យអ្នកចូលចិត្តលេងអុកអាចលេងម្នាក់ឯងជាមួយម៉ាស៊ីនបាន។

និស្សិតអនុបណ្ឌិតវិទ្យាសាស្ត្រព័ត៌មានវិទ្យា នៃសាកលវិទ្យាល័យន័រតុន បន្ថែមថា គម្រោងល្បែងអុកខ្មែរបែបបញ្ញាសិប្បនិម្មិត ដែលយកទៅប្រកួតនៅចក្រភពអង់គ្លេស សុទ្ធតែមានការត្រួតពិនិត្យ និងសំរិតសម្រាំងពីសាស្រ្តាចារ្យជំនាញ មុនយកទៅប្រកួតជាលក្ខណៈអន្តរជាតិ។ ក្នុងនោះ លោកក៏មានការតាំងចិត្តយ៉ាងមុតមាំថា នឹងអាចទទួលជ័យលាភី និងមានការទទួលស្គាល់ជាលក្ខណៈអន្តរជាតិ។

«ខ្ញុំមានមោទនភាពដែលបានយកគម្រោងទៅប្រកួតក្នុងកម្មវិធីអន្តរជាតិ ហើយទទួលបានជ័យលាភីត្រឡប់មកវិញ។»

លោក តាំង ហៀងឡេង បន្ថែមថា ល្បែងអុកខ្មែរបែបបញ្ញាសិប្បនិម្មិត គឺជាវេបសាយមួយ បង្កើតឡើងដោយប្រើប្រាស់បច្ចេកវិទ្យា static web។ ក្នុងនោះបានស្វែងយល់ស៊ីជម្រៅនៃយុទ្ធសាស្រ្តរបស់អុក ការរៀបបន្ទះក្ដារ និងក្រឡាអុក ហើយប្រើប្រាស់ក្បួនដោះស្រាយ Minimax និង Alpha-Beta Pruning algorithms ដើម្បីបង្កើតដៃគូប្រកួតសិប្បនិម្មិត ដែលសក្ដិសមជាគូប្រជែងរបស់មនុស្ស។ លោក តាំង ហៀងឡេង បន្តថា ការបង្កើតល្បែងអុកខ្មែរនេះ ប្រើប្រាស់កូដអប្បរមា ងាយស្រួលសម្រាប់អ្នកចាប់ផ្ដើមដំបូងដោយមិនប្រើប្រាស់ library ឬ framework។ សម្រាប់ដំណាក់កាលបង្កើតល្បែងអុកខ្មែរបែបបញ្ញាសិប្បនិម្មិតនេះ គឺទី១. ស្វែងរកឯកសារទាក់ទងនឹងល្បែងអុក ទី២. រៀបឱ្យលេង២នាក់សិន ទី៣. បញ្ចូលបញ្ញាសិប្បនិម្មិត និងដាក់បញ្ចូលទៅក្នុងវេបសាយ។

អ្នកបង្កើតល្បែងអុកខ្មែរបែបបញ្ញាសិប្បនិម្មិត រូបនេះ លើកឡើងថា ល្បែងអុកមានលក្ខណៈពិសេសរៀងៗខ្លួន ប៉ុន្តែសម្រាប់ល្បែងអុកដែលលោកបង្កើតនេះ មានលក្ខណៈពិសេសដោយអាចលេងជាមួយម៉ាស៊ីនបាន។ លើសពីនេះ ល្បែងអុកខ្មែរដើរក្រឡាខ្លីជាងល្បែងអុកបរទេស និងមានយុទ្ធសាស្រ្តខុសប្លែកពីល្បែកអុកបរទេស។

លោក​សាស្រ្តាចារ្យ លុយ មិថុនា ដែលដឹកនាំបេក្ខជនកម្ពុជាទៅធ្វើការ​ប្រកួតនៅចក្រភពអង់គ្លេស បានឱ្យដឹងដែរថា ជារៀងរាល់ឆ្នាំសម្រាប់សាកលវិទ្យាល័យន័រតុន តែងជំរុញឱ្យសាស្រ្តាចារ្យ ក៏ដូចជានិស្សិតតាមផ្នែកនីមួយបង្កើតស្នាដៃរួមគ្នាជាមួយសិស្ស ហើយយកទៅប្រកួតប្រជែងនៅក្រៅប្រទេស។ លោក​សាស្រ្តាចារ្យសម្តែងមោទនភាពថា និស្សិតខ្មែរ ពិតជាមានសមត្ថភាព ប៉ុន្តែអ្វីដែលត្រូវការ គឺការផ្ដល់ឱកាស និងការលើកទឹកចិត្ត ដើម្បីបង្ហាញស្នាដៃច្នៃប្រឌិត និងបង្កើតថ្មីទៅកាន់ឆាកអន្តរជាតិ។

គួរជម្រាបជូនថា អុក ឬចត្រង្គ ជាល្បែងកម្សាន្តមួយប្រភេទ ដែលមានការនិយមលេងនៅក្នុងប្រទេសកម្ពុជាតាំងពីបុរាណកាលរហូតមកដល់បច្ចុប្បន្ន។ ល្បែងមួយប្រភេទនេះ បានចាប់កំណើតឡើងនៅកម្ពុជា ក្នុងសម័យអង្គរ នាឆ្នាំ៨០០ នៃគ្រឹះសករាជ ដោយមានរូបចម្លាក់នៅលើប្រាសាទបុរាណខ្មែរទុកជាភស្តុតាង។ ល្បែងអុកនេះ អាចលេងដោយមនុស្ស២នាក់ ឬដោយមនុស្ស២ក្រុម មានក្រឡា ៨ គុណ ៨ ជារាងការេស្មើជ្រុង ហើយមានកូនអុកម្ខាង ១៦កូន បែងចែកជាក្រុម ស និង ខ្មៅ៕