ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធី “ជំរំយុវជនជាសកល” លើកទី១១ គ្រោងនឹងប្រព្រឹត្តទៅនាថ្ងៃទី១៥-២០ ខែធ្នូ ចុងឆ្នាំ២០២៥នេះ នៅស្រុកបន្ទាយស្រី ខេត្តសៀមរាប ក្រោមប្រធានបទ “យុវជន និងការអប់រំឆ្នាំ២០៣០”។
កម្មវិធី ជំរំយុវជនជាកសល ត្រូវបានធ្វើឡើងជារៀងរាល់ឆ្នាំក្នុងគោលបំណងអភិវឌ្ឍសមត្ថភាព ជំរុញការយល់ដឹងអំពីវប្បធម៌ និងបណ្តុះបណ្តាលយុវជនឱ្យក្លាយជាអ្នកចូលរួមយ៉ាងសកម្មក្នុងការថែរក្សា និងអភិរក្សបេតិកភណ្ឌវប្បធម៌ជាតិ ដើម្បីបង្កើនការផ្សព្វផ្សាយទេសចរណ៍ និងលើកកម្ពស់កិត្តិនាមរបស់កម្ពុជា។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ប្រធានបទ “យុវជន និងការអប់រំនៅកម្ពុជាឆ្នាំ២០៣០” សម្រាប់កម្មវិធីជំរំយុវជនជាសកលឆ្នាំនេះ គឺបង្ហាញពីទស្សនវិស័យក្នុងការអភិវឌ្ឍវិស័យអប់រំកម្ពុជាឱ្យសមស្របនឹងសម័យឌីជីថល ពិសេសដើម្បីចូលរួមសម្រេចចក្ខុវិស័យកម្ពុជាក្លាយជាប្រទេសមានចំណូលមធ្យមខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ព្រមទាំងសម្រេចបាននូវគោលដៅអភិវឌ្ឍប្រកបដោយចីរភាពឆ្នាំ២០៣០ ដោយរំលេចឡើងនូវការអប់រំប្រកបដោយបរិយាប័ន្នភាព បំណិនសតវត្សទី២១ ភាពជាអ្នកដឹកនាំ និងការសិក្សាពេញមួយជីវិត។
ជាមួយគ្នានេះ អ្នកនាំពាក្យក្រសួងអប់រំ ក៏បានអំពាវនាវដល់យុវជនគួរចូលរួមកម្មវិធីនេះ ដើម្បីទទួលបានឱកាសសិក្សាពីទំនោរអប់រំថ្មីៗ បច្ចេកវិទ្យា និងជំនាញសតវត្សរ៍ទី២១ សាមគ្គីភាព ការងារជាក្រុម បណ្តុះភាពជាអ្នកដឹកនាំ អភិរក្សមរតកវប្បធម៌ជាតិ ពិសេស ស្មារតីស្នេហាជាតិ និងការចូលរួមថែរក្សាសន្តិភាព។
លោក ស៊ីវ ឧត្តម មន្ត្រីលេខាធិការដ្ឋានអគ្គនាយកដ្ឋានយុវជន មានប្រសាសន៍ថា តាមរយៈកម្មវិធីនេះ យុវជននឹងទទួលបាននូវចំណេះដឹង បទពិសោធថ្មីៗ មានទំនាក់ទំនងជាមួយយុវជនមកពីមជ្ឈដ្ឋានផ្សេងៗគ្នា បណ្តុះស្មារតីដល់យុវជនក្នុងការថែរក្សា អភិរក្សមរតកវប្បធម៌ជាតិ ចូលរួមលើកស្ទួយនិងផ្សព្វផ្សាយវិស័យទេសចរណ៍ និងបំណិនជីវិតដល់យុវជនក្នុងយុគ្គសម័យរីកចម្រើន។
មន្ត្រីលេខាធិការដ្ឋានអគ្គនាយកដ្ឋានយុវជនបន្ថែមថា អត្ថប្រយោជន៍ដែលយុវជននឹងទទួលបាន រួមមាន យល់អំពីតម្លៃ និងបណ្ដុះគំនិតយុវជនឱ្យយល់ដឹងកាន់តែច្បាស់អំពីដំណើរការនៃការស្វែងរក និងតម្លៃនៃសន្តិភាព, យល់ដឹងអំពីតួនាទីរបស់យុវជនក្នុងការបន្តកេរតំណែលនៃសន្តិភាព, យល់ដឹង និងស្គាល់កាន់តែច្បាស់អំពីមរតកវប្បធម៌របស់ជាតិ, បណ្ដុះយុវជនឱ្យក្លាយជាមុគ្គទេសដ៏ចម្បងក្នុងផ្សព្វផ្សាយវប្បធម៌ជាតិ និងលើកស្ទួយវិស័យទេសចរណ៍ជាតិ, បំណិនជីវិត ភាពជាអ្នកដឹកនាំ ជំនាញទន់ដោយផ្សារភ្ជាប់ជាមួយនឹងទំនៀមទម្លាប់ប្រពៃណីដើម្បីក្លាយជាអ្នកអភិរក្ស និងអភិវឌ្ឍកេរតំណែលជាតិ, បំណិនការផ្សព្វផ្សាយវប្បធម៌ និងលើកស្ទួយវិស័យទេសចរណ៍តាមរយៈបំណិននៃការច្នៃប្រឌិត ការបង្កើតគំនិតថ្មី និងសិល្បៈរចនាបទតាមបែបឌីជីថល និងបំណិនព័ត៌មានសង្គម ការផ្សព្វផ្សាយ និងសុវត្ថិភាពនៃការប្រើប្រាស់ព័ត៌មានសង្គម។
លោក ស៊ីវ ឧត្តម ក៏បានលើកទឹកចិត្តដល់យុវជនថា ការអភិវឌ្ឍសមត្ថភាពយុវជន គឺជាផ្នែកមួយយ៉ាងសំខាន់ នៃអនាគតប្រទេសជាតិ។ ការចូលរួមក្នុងកម្មវិធី “ជំរំយុវជនជាសកលលើកទី១១” នេះ គឺជាឱកាសដ៏មានតម្លៃមួយសម្រាប់ការអភិវឌ្ឍខ្លួន បង្កើតមិត្តភាព កសាងអនុស្សាវរីយ៍ និងចូលរួមកសាង អភិវឌ្ឍប្រទេសជាតិក្នុងយុគសម័យសន្តិភាព និងរីកចម្រើន៕
