ចុងសប្តាហ៍នេះ ចាប់ពីថ្ងៃទី២៥ ដល់ថ្ងៃទី២៧ ខែកក្កដា ឆ្នាំ​២០២៥ នៅ​អគារ Connexion កោះពេជ្រ កម្មវិធីពិព័រណ៍ឱកាស ឆ្នាំ២០២៥ ដែលជាពិព័រណ៍ដ៏ធំដំបូងគេនៅកម្ពុជា នឹងនាំយកនូវវាគ្មិន អ្នកជំនាញ គ្រូវបង្វឹក អ្នកបង្កើតមាតិកា ជាង ១០០នាក់មកពីបណ្តាញផ្សេងៗគ្នា រាប់តាំងពីថ្នាក់រាជរដ្ឋាភិបាល ស្ថាបនិកអាជីវកម្ម អ្នកអប់រំ និងអ្នកជំនាញបច្ចេកវិទ្យា នវានុវត្តឌីជីថល ក្នុងការ​ចែករំលែកបទពិសោធន៍ ចំណេះដឹង ដល់យុវជន និង​អ្នកចូលរួម។

កញ្ញា កៅ ម៉េងហ័ង ក្រុមការងារ​ស្នូល​ផ្នែក​ទំនាក់ទំនង និង​ផ្សព្វផ្សាយ ឱ្យដឹងថា ពិព័រណ៍​ឱកាសសម្រាប់ឆ្នាំនេះ មានសកម្មភាពធំៗ​ចំនួន៣ ដោយទី១ ​មានកិច្ចពិភាក្សា​ដោយ​មានការ​ចូលរួម​ពីវាគ្មិនជាច្រើន និង​ប្រធានបទផ្សេងៗ​ដូចជា ធុរកិច្ចនិងសហគ្រិនភាព, ភាពជាអ្នកដឹកនាំ និងអាជីពការងារ, បច្ចេកវិទ្យា និងឌីជីថល និងចុងក្រោយគឺ ភាពច្នៃប្រឌិត និងជីវិត។

សកម្មភាពទីពីរ នៅ​ក្នុងពិព័រណ៌​ឱកាស​នោះ មានដូចជាវគ្គ​បណ្តុះបណ្តាល​ជំនាញខ្លីៗ ទាក់ទងនឹង​ការអប់រំ របៀបត្រៀម​ខ្លួន​សម្រាប់ឱកាស​ការងារ ជំនាញបច្ចេកវិទ្យាឌីជីថល UX UI ការសរសេរកូដ សុខភាពផ្លូវចិត្ត ក៏​ដូចជារបៀប​នៃការ​ចាប់ផ្តើម​អាជីវកម្មជាដើម។

ដោយឡែកសកម្មភាពទីបី នៅ​ក្នុង​ពិព័រណ៍ឱកាស គឺមានស្តង់ពិពណ៌ជាច្រើន​ពីសាលា ក្រុមហ៊ុន​ផ្សេង ដែល​យុវជន និងអ្នកចូលរួម​អាច​ស្វែង​យល់បន្ថែមពីសេវាកម្ម ឬពីអាជីវកម្មទាំងអស់នោះ។

បើតាម កញ្ញា កៅ ម៉េងហ័ង គោលបំណងសំខាន់ នៃពិព័រណ៌​ឱកាស ២០២៥ គឺព្រឹត្តិការណ៍​នេះ​នឹងផ្តល់ជាកន្លែងមួយ​ដែលអាចឱ្យ​សិស្សានុសិស្ស ក៏​ដូចជាយុវជន អាចមកស្វែងយល់អំពីឱកាសអប់រំ ឱកាស​ការងារ ឱកាស​សហគ្រិន និងជួយ​ពួកគេស្វែងយល់ពីខ្លួនឯងបន្ថែមថា គេមានអ្វីខ្លះ ហើយអាច​ធ្វើអ្វីបានខ្លះ ដើម្បី​ត្រៀម​ខ្លួនសម្រាប់អនាគត ជាពិសេស​ក្នុងបរិបទសម័យបច្ចេកវិទ្យាឌីជីថល។

“វាមិន​មែនគ្រាន់តែពិព័រណ៌ដាក់ស្តង់ ប៉ុន្តែយើង​ចង់​ឱ្យ​គាត់មកក្រេបយកចំណេះដឹង បទពិសោធន៍ថ្មីពីវាគ្មិនជា​ច្រើន ពីវិស័យអប់រំ វិស័យការងារ អ្នកផលិតមាតិកា…”

សរុបមកវិញ សម្រាប់ពិព័រណ៍ឱកាស រយៈពេល៣ថ្ងៃពេញ អ្នកចូលរួម​នឹង​ទទួល​បាន​អត្ថប្រយោជន៍ជា​ច្រើនទាំង ចំណេះ ជំនាញ បទពិសោធន៍​ថ្មីៗ ក្នុងវិស័យអប់រំ ការងារ និង​អាជីវកម្ម ព្រមទាំងជា​កន្លែង​ក្នុង​ការ​បង្កើតទំនាក់ទំនងជាមួយ​មនុស្សថ្មីៗ អ្នកជំនាញ អ្នក​បង្កើតមាតិកា ហើយ​ចុងក្រោយ គឺ​បទពិសោធន៍ និងភាពរីករាយ​ជាមួយ​ការ​សម្តែង និង​សកម្មភាពកម្សាន្តជាច្រើន៕