​ក្រសួងប្រៃសណីយ៍ និង​ទូរគមនាគមន៍ សហការជាមួយគណៈកម្មការសេដ្ឋកិច្ច និង​សង្គម​របស់អង្គការ​សហប្រជាជាតិ​សម្រាប់​តំបន់អាស៊ី និង​ប៉ាស៊ីហ្វិក (UN-ESCAP) កំពុងតែរៀបចំសេចក្តីព្រាង “យុទ្ធសាស្ត្រជាតិស្តីពីបញ្ញាសិប្បនិម្មិត” សំដៅទាញយកផលប្រយោជន៍ជាអតិបរមា ក៏​ដូចជា​កាត់បន្ថយ​ផលប៉ះពាល់​អវិជ្ជមាន នៃបញ្ញាសិប្បនិម្មិត ដើម្បីរួម​ចំណែក​ក្នុងការ​អភិវឌ្ឍសេដ្ឋកិច្ច និង​សង្គម​កម្ពុជា។

បើតាមសេចក្តីប្រកាស​ព័ត៌មានរបស់​ក្រសួងប្រៃសណីយ៍ និង​ទូរគមនាគមន៍ សេចក្តីព្រាង “យុទ្ធសាស្រ្តជាតិស្តីពី​បញ្ញាសិប្បនិម្មិត” ត្រូវ​បានរៀបចំ​ឡើង​អស់រយៈពេល​ជាង​មួយឆ្នាំមកហើយ​ តាមរយៈកិច្ច​ប្រជុំផ្ទៃក្នុង​ចំនួន១២លើក ដើម្បី​ធ្វើ​ឱ្យ​សេចក្តី​ព្រាងនេះ​កាន់តែមានភាពល្អប្រសើរ មានសង្គតិភាពជាមួយ​នឹង​របៀបវារៈគោល​នយោបាយជាតិ និង​ស្រប​តាមនិន្នាការតំបន់ និងអន្តរជាតិ។ ក្នុងនោះ​កាលពីដើមខែមេសា សិក្ខាសាលា​ពិនិត្យ​ស៊ីជម្រៅ​លើសេចក្តីព្រាងនេះ ត្រូវ​បានរៀបចំឡើង ដោយ​មានការ​ចូលរួមពី​តំណាងអង្គការ​សហប្រជាជាតិ (UN-ESCAP) ដោយធ្វើ​ការ​ពិភាក្សា​ស៊ីជម្រៅ​លើ​គ្រប់ផ្នែក​នៃសេចក្តីព្រាងយុទ្ធសាស្រ្ត រួមមាន​ចក្ខុវិស័យ ប្រព័ន្ធ​អេកូឡូស៊ីបញ្ញាសិប្បនិម្មិត និងយុទ្ធសាស្រ្តជាអាទិភាព ព្រមទាំង​វិធីសាស្រ្ត​ជំរុញ​ឱ្យ​យុទ្ធសាស្រ្ត​នេះ​អនុវត្ត​បាន​ប្រកប​ដោយ​ជោគជ័យ។

ក្នុង​ឱកាស នៃការ​បំពេញ​​ភារកិច្ច​នៅ​កម្ពុជា លោកស្រី Tiziana Bonapace ប្រធាន​នាយកដ្ឋានបច្ចេកវិទ្យាគមនាគមន៍ និងព័ត៌មាន នៃ UN-ESCAP បានគូស​បញ្ជាក់ពីការ​គាំទ្ររបស់ UN-ESCAP ចំពោះ​ការ​រៀបចំ​សេចក្តីព្រាង​យុទ្ធសាស្រ្ត​ជាតិ​ស្តីពីបញ្ញាសិប្បនិម្មិត​របស់កម្ពុជា ដែលមាន​ក្រសួងប្រៃសណីយ៍ និងទូរគមនាគមន៍ ជា​ក្រសួងនាំមុខ​លើ​កិច្ច​ការនេះ។

បើតាម​ការ​បញ្ជាក់របស់​ក្រសួងប្រៃសណីយ៍ និង​ទូរគមនាគមន៍ បន្ទាប់ពី​ដាក់​ពិគ្រោះយោបល់ជាមួយ​អ្នក​បច្ចេកទេស នៃ UN-ESCAP សេចក្តីព្រាងយុទ្ធសាស្រ្ត​ជាតិ​ស្តីពីបញ្ញាសិប្បនិម្មិត នឹងត្រូវ​ដាក់ពិគ្រោះយោបល់ប្រមូលធាតុចូលជាមួយ​ក្រសួង ស្ថាប័ន និង​គ្រប់ភាគី​ពាក់ព័ន្ធ រួមទាំង​គ្រឹះស្ថាន​ឧត្តមសិក្សា ក្នុងខែឧសភាខាងមុខនេះ ព្រមទាំង​ពិនិត្យ​ក្នុង​សិក្ខា​សាលា​ថ្នាក់ជាតិ ដែល​គ្រោង​ធ្វើ​នៅ​ខែមិថុនា​ខាងមុខ។

យ៉ាងណាក៏ដោយ ក្រសួងប្រៃសណីយ៍ និ​ង​ទូរគមនាគមន៍ ក៏​បានធ្វើ​ការ​អំពាវនាវ​ដល់អ្នកជំនាញ វិស័យ​ឯកជន គ្រឹះស្ថាន​សិក្សា និង​ស្រាវជ្រាវ ឬអង្គការ​ដៃគូដែលមានចំណាប់អារម្មណ៍ អាច​ចូលរួម​ក្នុងដំណើរការ នៃការ​រៀបចំ​យុទ្ធសាស្រ្តជាតិនេះ ដោយ​អាចទាក់ទងទៅកាន់ ai-governance@mptc.gov.kh ដើម្បីសាកសួរព័ត៌មានបន្ថែម៕