ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រជូនដល់និស្សិតវិទ្យាស្ថាន វ៉ាន់ដា នាព្រឹកថ្ងៃទី១១ ខែមីនា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា លើកឡើងថា ការមានសញ្ញាបត្រ គឺមិនទាន់គ្រប់គ្រាន់ទេ ពោលគឺត្រូវបន្តការសិក្សាស្រាវជ្រាវ និងបន្តការសិក្សាពង្រីកចំណេះដឹងរបស់ខ្លួនឱ្យកាន់តែទូលំទូលាយបន្ថែមទៀត ដើម្បីបង្កើនកម្រិតគុណវុឌ្ឍតាមជំនាញរបស់ខ្លួន សំដៅតាមឱ្យទាន់នូវការរីកចម្រើននៃសង្គម និងវិទ្យាសាស្រ្ត ពីព្រោះការសិក្សាអប់រំ គឺគ្មានទីបញ្ចប់ទេ។ សម្តេចមានប្រសាសន៍ថា ការសិក្សាពេញមួយជីវិត គឺជារបៀបរបបនៃការអប់រំក្នុងសតវត្សរ៍ទី២១។
សម្តេចនាយករដ្ឋមន្រ្តី បានលើកទឹកចិត្តដល់និស្សិតជ័យលាភីទាំងអស់ ត្រូវបន្តដុសខាត់ចំណេះដឹង ដោយថា ការសិក្សាទ្រឹះស្តីនៅក្នុងថ្នាក់បានជួយនិស្សិតឱ្យមានមូលដ្ឋានច្បាស់លាស់នៅក្នុងការត្រិះរិះពិចារណា ថ្លឹងថ្លែង និងយល់ពីតម្លៃពិត នៃចំណេះដឹង និងជំនាញសម្រាប់អភិវឌ្ឍខ្លួនឯងទៅថ្ងៃក្រោយ ហើយត្រូវចងចាំថា មានតែចំណេះវិជ្ជាទេដែលអាចជួយបណ្តុះបណ្តាលនូវគំនិតចំរើនជឿនលឿន ហើយអាចជួយលើកស្ទួយប្រទេសជាតិឱ្យកាន់តែរីកចម្រើនថែមទៀត។
“ដូច្នេះប្អូនៗត្រូវយល់ថា ដើម្បីក្លាយខ្លួនជាបញ្ញាវន្តពិតប្រាកដ ប្អូនៗត្រូវបន្តខិតខំប្រឹងប្រែងរៀនសូត្រដោយខ្លួនឯង ខិតខំអានសៀវភៅឱ្យបានច្រើន ខិតខំត្រងត្រាប់ចាប់យកចំណេះដឹងទាំងឡាយដែលប្អូនៗបានជួបប្រទះ និងដុសខាត់រំលឹកឡើងវិញជាប្រចាំនូវចំណេះដឹងទាំងនោះ”
ពាក់ព័ន្ធនឹងការអាន សម្តេចធិបតីក៏បានថ្លែងអរគុណដល់ក្រសួងអប់រំ យុវជន និងកីឡា ដែលបានផ្តួចផ្តើមរៀបចំនូវទិវាជាតិអំណាន ដែលជាចលនានៃការអានសៀវភៅ និងបង្កើតទម្លាប់អានដល់ប្រជាជនកម្ពុជា។ សម្តេចក៏បានជំរុញឱ្យឪពុកម្តាយ អាណាព្យាបាល ខិតខំបង្កលក្ខណៈដល់កូនៗរបស់ខ្លួនក្នុងការអានសៀវភៅ ហើយសូមក្រសួងអប់រំ យុវជន និងកីឡា ត្រូវខិតខំជំរុញកម្មវិធីពាក់ព័ន្ធនឹងការអានឱ្យបានច្រើនបន្ថែមទៀត។
ជាមួយគ្នានេះ សម្តេចបវរធិបតីនាយករដ្ឋមន្ត្រី ក៏បានកោតសរសើរដល់យុវជនដែលបានរៀបចំបណ្ណាល័យចល័ត លើកកម្ពស់ការអានទៅដល់មូលដ្ឋាន និងលើកទឹកចិត្តឱ្យរដ្ឋបាលរាជធានី-ខេត្ត បន្តរៀបចំសកម្មភាពសិក្សា និងការអានសៀវភៅ ឱ្យកាន់តែច្រើនបន្ថែមទៀត។
មុននឹងបញ្ចប់ សម្តេចបវរធិបតីនាយករដ្ឋមន្ត្រី បានគូសរំលេចបន្ថែមថា ការរៀននៅសាលាគឺទទួលបានសញ្ញាបត្រ តែការចេញទៅធ្វើការគឺទទួលបានសញ្ញាឃើញ។ ដូច្នេះ, យើងទាំងអស់គ្នាត្រូវខិតខំរៀនសូត្របន្ថែម និងត្រូវរៀនពេញមួយជីវិត៕
