ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បុគ្គលម្នាក់ៗសុទ្ធតែមានសកម្មភាពដែលខ្លួនចង់ធ្វើរួចស្រេចហើយ ប៉ុន្តែតាមរយៈដំណាក់កាលនៃការលូតលាស់ពីមួយពេលទៅមួយពេល ទម្លាប់និងសកម្មភាពដែលធ្វើពីមុនអាចនឹងផ្លាស់ប្តូរ ហើយពេលខ្លះទៀតត្រូវសិក្សាពីខ្លួនឯងបន្ថែមថា តើសកម្មភាពអ្វីខ្លះដែលឆ្លើយតបនឹងតម្រូវការខ្លួនឯង? ជាឧទាហរណ៍ខ្លីៗ អំពីសកម្មភាពដែលមនុស្សចូលចិត្តមានដូចជា ការជជែកគ្នា ដើរ រុករានព្រៃភ្នំ លេងតន្រ្តី ផលិតមាតិកា សរសេរ លេងកីឡា និងលេងហ្គេមជាដើម។
សកម្មភាពដែលតម្រូវចិត្តផ្ទាល់ខ្លួនមានច្រើន ប៉ុន្តែមិនមែនមានន័យថា រាល់សកម្មភាពទាំងអស់សុទ្ធតែផ្តល់ប្រយោជន៍នោះទេ ដែលតម្រូវឱ្យព្យាយាមជ្រើសយកនូវសម្មភាពទាំងឡាយណាដែលផ្តល់ផលប៉ះពាល់តិច។ ដូច្នេះសកម្មភាពឆ្លើយតបទៅសុភមង្គលរបស់ខ្លួនឯង ត្រូវការ ការសាកល្បងនៅសកម្មភាពថ្មីៗ ប្លែកៗ ដើម្បីវិភាគបានថា តើមួយណាជាសកម្មភាពដែលធ្វើហើយចង់ធ្វើទៀត និងមិនប៉ះពាល់នៅដល់ផលប្រយោជន៍អ្នកដទៃ ឬការផ្តល់គំរូមិនល្អទៅកាន់សង្គម។
សកម្មភាពដែលស្ថិតនៅក្នុងចំណូលចិត្ត (Hobby) ជាសកម្មភាពមួយដែលមិនរំពឹងថានឹងផលិតបាននូវសមិទ្ធផលអ្វីមួយជាក់លាក់នោះទេ ជារួមគឺជាការធ្វើសកម្មភាពដែលតម្រូវនឹងចិត្តខ្លួនឯង។ ត្បិតការធ្វើតាមចិត្តពេលខ្លះអាចផ្តល់នូវគុណសម្បត្តិ ហើយពេលខ្លះអត់ ប៉ុន្តែជាអត្ថប្រយោជន៍រួមនោះ គឺធ្វើសកម្មភាពដែលឆ្លើយតបនឹងចំណូលចិត្តជំរុញដល់ថាមពលផ្លូវចិត្ត។ ការឆ្លៀតធ្វើសកម្មភាពតម្រូវចិត្តខ្លួនឯង ជាចំណែកមួយជួយក្នុងការកាត់បន្ថយស្រ្តេស ដោយហេតុថាកំឡុងពេលអនុវត្តន៍សកម្មភាពដែលខ្លួនពិតជាចង់ធ្វើខ្លាំង ជាឱកាសក្នុងការសម្រាកពីបញ្ហាកំពុងប្រឈមដែលត្រូវការពេលវេលាដើម្បីដោះស្រាយ។
យោងតាម វេជ្ជបណ្ឌិត Alexandra Stratyner ការធ្វើសកម្មភាពដែលខ្លួនឯងចូលចិត្ត គឺជាការបង្កើនថាមពល ឱ្យមានកម្លាំងដោះស្រាយឧបសគ្គជាច្រើនដែលកើតមានក្នុងដំណើរជីវិត។ ជាងនេះទៅទៀត កាលដែលបានធ្វើនូវសកម្មភាពដែលខ្លួនមានចំណង់ជាខ្លាំង មិនត្រឹមតែបង្កើននូវសុភមង្គល ឬភាពរីករាយប៉ុណ្ណោះទេ ប៉ុន្តែប្រៀបដូចជាការផ្តល់ឱកាសឱ្យខួរក្បាលបានសម្រាក និងកាត់បន្ថយស្រ្តេសដែរ។
ការជ្រើសរើសសកម្មភាព ដែលត្រូវចិត្តខ្លួនឯង បង្កបាននូវភាពរីករាយ ប៉ុន្តែដើម្បីជួយខ្លួនឯងឱ្យកាន់តែទទួលបាននូវប្រសិទ្ធភាព ពីការធ្វើសកម្មភាពទាំងនោះ ជាដំបូងគឺត្រូវឆ្លុះបញ្ចាំងតាមរយៈការសង្កេតដោយដាក់សំណួរថា តើសកម្មភាពអ្វីខ្លះដែលចូលចិត្តធ្វើពេលទំនេរ? ឬក៏សកម្មភាពអ្វីខ្លះ ទោះបីជាមិនទំនេរក៏នៅតែឆ្លៀតធ្វើ?
កាតព្វកិច្ចក្នុងការឆ្លុះបញ្ចាំងនេះដើម្បីរកឱ្យឃើញថា តើសកម្មភាពដែលចូលចិត្តទាំងនោះ ជាប្រភេទបែបឆ្នៃប្រតិដ្ឋ បែបសកម្ម ឬបែបការសិក្សារៀនសូត្រថ្មីៗដែលពុំធ្លាប់ដឹងពីមុន។ មួយវិញទៀត សញ្ជឹងនឹកគិតបន្តិចថា តើមានសកម្មភាពអ្វីទៀត ដែលលោកអ្នកនៅចង់ដឹង ចង់ឮ ប៉ុន្តែមិនទាន់មានឱកាសក្នុងការអនុវត្ត ដូចជា ការរៀនថ្នាក់តូរ្យតន្ត្រីបន្ថែម លេងកីឡាថ្មីៗ ក៏ដូចជាការរៀនភាសាថ្មី។
បន្ទាប់ពីកំណត់សម្គាល់រាល់ភាពពាក់ព័ន្ធនឹងចំណាប់អារម្មណ៍ផ្ទាល់ខ្លួនរួចរាល់ហើយ ក្រឡេកមកមើលរបៀបរស់នៅផ្ទាល់ខ្លួនវិញម្តង! តើធ្លាប់វិនិយោគថវិកាចំពោះសកម្មភាពដែលខ្លួនចង់ធ្វើខ្លះដែរទេ? ដោយសារតែសកម្មភាពមួយចំនួន ត្រូវការប្រើប្រាស់លុយនិងពេល ខណៈបុគ្គលខ្លួនឯងផ្ទាល់មិនហ៊ានចំណាយលើសកម្មភាពដែលខ្លួនពិតជាចង់ធ្វើយ៉ាងខ្លាំង មិនថាថវិកា ឬពេលវេលា។ តួយ៉ាងដូចជា ការរៀនហ្គីតា ដែលត្រូវការទៅចូលសាលាដើម្បីទទួលបាននូវមូលដ្ឋានគ្រឹះ និងផ្តល់ភាពងាយស្រួល ពេលអនុវត្តន៍ជាក់ស្តែងឱ្យកាន់តែមានប្រសិទ្ធភាព ការចំណាយលើសកម្មភាពដែលត្រូវនឹងចំណូលចិត្ត អាចជាការវិនិយោគមួយផ្នែក ក្នុងការពង្រឹងសុខភាពផ្លូវចិត្ត៕
