ក្នុងការអភិវឌ្ឍទម្លាប់នៃការសិក្សា ការដឹងអំពីវិធីរៀនរាល់មុខវិជ្ជានីមួយៗ និងការណែនាំជាទូទៅជាយុទ្ធសាស្រ្តនៃការពង្រីកវិលាសភាពរៀនសូត្រឱ្យកាន់តែខិតជិតទៅរកលទ្ធផលមួយ ដែលឆ្លើយតបនឹងតម្រូវការ និងគោលដៅដែលបានកំណត់ ហើយការស្វែងយល់ពីរបៀបរៀនទៀតសោត មានភាពខុសគ្នាទៅតាមប្រភេទប្រធានបទ និងភាពខុសគ្នានៃមុខវិជ្ជា ឬជំនាញណាមួយ។ ការយល់ អំពីការណែនាំមុនចាប់ផ្តើមរៀន បានជំរុញប្រសិទ្ធភាពនៃការសិក្សា ផ្តល់ភាពងាយស្រួលក្នុងការរៀបចំ ការរំលឹក និងធ្វើឱ្យកំណត់ត្រា កាន់តែមានប្រសិទ្ធភាព។

តាមរយៈគេទំព័រ Adobe បានបង្ហាញពី ភាពសំខាន់ដែលមានវិធីសាស្រ្តជំនួយខាងក្រៅ ឬយល់អំពីការណែនាំមុនចាប់ផ្តើមរៀន ដើម្បីបង្កើនប្រសិទ្ធភាពសិក្សា ដោយមានរៀបរាប់លម្អិតនៅខាងក្រោម ៖

១. រៀបចំតាមលំដាប់លំដោយ ៖ រចនាសម្ព័ន្ធនៃការសិក្សាមានន័យថា រៀបចំប្រភេទមេរៀន និងពេលវេលាទៅតាមទំហំ និងលក្ខខណ្ឌជាក់ស្តែង មានន័យថា​ ធ្វើយ៉ាងណាកាត់បន្ថយសកម្មភាព ឬក៏អ្វីដែលមិនចាំបាច់ទៅក្នុងដំណើរការ នៃការសិក្សាប្រចាំថ្ងៃ តួយ៉ាងដូចជា ការកត់ត្រាមេរៀន ដើម្បីបន្ថយភាពស្មុគស្មាគ គួរតែកត់រាល់កន្លែងណាដែលជាចំណុចគោលហើយពាក់ព័ន្ធទៅនឹងកិច្ចពិភាក្សា ឬមេរៀនតែប៉ុណ្ណោះ។

២. ការផ្តោត ៖ ជំនាញក្នុងការផ្តោតមានសារៈសំខាន់ណាស់ ក្នុងការនាំទៅរកប្រសិទ្ធភាពនៃការបញ្ចប់កិច្ចការអ្វីមួយ ជាពិសេសនៅក្នុងដំណើរការសិក្សាតែម្តង ការផ្តោតជួយឱ្យសិស្ស អាចកំណត់អំពីអ្វីទៅជាព័ត៌មានសំខាន់ ហើយនៅពេលដែលដឹងព័ត៌មានសំខាន់ៗ ក៏បានជួយសម្រួលដល់ការកំណត់អាទិភាព។ ដូច្នេះការផ្តោត គឺជាជំនាញជំរុញដល់ប្រសិទ្ធភាពនៃការបែងចែកពេលវេលាផងដែរ។

៣. បង្កើនភាពងាយស្រួលក្នុងការយល់គ្នា ៖ ប្រសិនបើមុនពេលចាប់ផ្តើមរៀនជំនាញណាមួយ ឬក៏មុខវិជ្ជាណាមួយ ដែលទទួលបានការណែនាំពីអ្នកជំនាញផ្ទាល់អំពីប្រសិទ្ធភាពក៏ដូចជាគន្លឹះក្នុងការយល់ពីពាក្យគន្លឹះ នោះភាពស៊ីជម្រៅនៃការទទួលបានចំណេះដឹង ក៏នឹងឆាប់រីកដុះដាលព្រមជាមួយគ្នាដែរ។

៤. អនុវត្តន៍ ៖ ការអនុវត្ត ជាវិធីទូទៅមួយ ដែលគេប្រើនៅគ្រប់ជំនាញនិងទ្រឹស្តី ការអនុវត្តដដែលៗ តាមរយៈការសួរសំណួរឆ្លុះបញ្ចាំង ការផ្ទៀងផ្ទាត់លំហាត់ និងការអាន ឬក៏មើលអត្ថន័យឡើងវិញ សុទ្ធសឹងតែការរួមចំណែកដល់ការពង្រឹងចំណេះដឹង។

៥. ប្រសិទ្ធភាព ៖ ការសិក្សាអំពីមគ្គុទ្ទេសក៍ ឬក៏ការណែនាំមុនចាប់ផ្តើម ជាឱកាសមួយ ក្នុងការសន្សំពេលវេលា ការចងចាំកាលវិភាគ ដែលផ្តល់ភាពងាយស្រួលក្នុងការអាន និងមើលមេរៀនដែលស្របនឹងតម្រូវការជាក់ស្តែង។

៦. ការវាយតម្លៃ ៖ ហាក់មិនខុសគ្នាទៅនឹងរបៀប នៃការធ្វើការប៉ុណ្ណោះទេ ក្រៅពីការអនុវត្ត ឬការឆ្លុះបញ្ចាំង គឺត្រូវការ ការវាយតម្លៃចំពោះខ្លួនឯង ដើម្បីវាស់វែងអំពីប្រសិទ្ធភាព ក៏ដូចជាតម្រូវការនៅពេលអនាគត៕