ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជំនាញ Digital Marketing គឺជាជំនាញមួយពាក់ព័ន្ធនឹងការផ្សព្វផ្សាយទាក់ទងទីផ្សារ ប្រម៉ូតផលិតផល ឬម៉ាកយីហោនានាដោយប្រើប្រាស់នូវថ្នាលឌីជីថល ឬហៅថា តាមប្រព័ន្ធអ៊ីនធឺណេត។ បច្ចុប្បន្ន កំណើននៃអ្នកប្រើប្រាស់ថ្នាលឌីជីថល ក៏ដូចជាក្រុមហ៊ុនអនឡាញ បាននិងកំពុងមានការកើនឡើងជាបន្តបន្ទាប់ ដែលក្រុមហ៊ុនទាំងនោះបានងាកមកប្រើប្រាស់ថ្នាលឌីជីថល ដើម្បីប្រាស្រ័យទាក់ទង និងលក់ផលិតផលរបស់ខ្លួន។
លោក ងួន លក្ខណៈ ប្រធានដេប៉ាតឺម៉ងទីផ្សារ នៃវិទ្យាស្ថានជាតិពាណិជ្ជសាស្ត្រ (NIB) បានលើកឡើងថា នាពេលបច្ចុប្បន្ននេះ ប្រសិនបើសិស្ស និស្សិត ធ្វើការជ្រើសរើសយកជំនាញទីផ្សារឌីជីថល មកសិក្សានៅសាកលវិទ្យាល័យ គឺជាឱកាសនៅក្នុងការទទួលបានការងារមួយដែលល្អ ក៏ដូចជាទទួលបាននូវប្រាក់បៀវត្សដែលមានភាពប្រកួតប្រជែងខ្ពស់ ព្រោះឥឡូវនេះក្រុមហ៊ុននីមួយៗសុទ្ធសឹងតែមានតម្រូវការទៅលើកម្លាំងពលកម្មទៅលើជំនាញទីផ្សារឌីជីថល។
បើតាមលោក ងួន លក្ខណៈ ការសិក្សាជំនាញទីផ្សារឌីជីថល នៅសាលាគេបានរៀបចំកម្មវិធីសិក្សាដោយរួមបញ្ចូលគ្នារវាងមុខវិជ្ជាសម្រាប់ជំនាញទីផ្សារបែបប្រពៃណីផង ការប្រើប្រាស់កុំព្យូទ័រផង ហើយបូកជាមួយជំនាញបច្ចេកទេសនៅក្នុងវិស័យឌីជីថល។ បន្ថែមពីនេះ ក៏នៅមានការបូកបញ្ចូលការសិក្សាមេរៀនជាច្រើនផ្សេងទៀតរួមមាន ការគ្រប់គ្រងការលក់ ឥរិយាបទអ្នកប្រើប្រាស់ ការស្រាវជ្រាវលើទីផ្សារផ្សេងៗ ប៉ុន្តែជាសំខាន់ គឺផ្តោតទៅលើការបញ្ចូលធាតុសំខាន់នៅក្នុងទីផ្សារឌីជីថល។
«កាលពីមុន ការធ្វើទីផ្សារ គឺតាមបែបប្រពៃណី ដូចជាតាម វិទ្យុ ទូរទស្សន៍ ឬក៏តាមបែបទម្រង់ផ្សេងៗជាច្រើនផ្សេងទៀត ប៉ុន្តែបច្ចុប្បន្នយើងចាំបាច់ត្រូវតែផ្លាស់ប្តូរមករកការផ្សព្វផ្សាយថ្នាលឌីជីថល ដូចនៅកម្ពុជាបច្ចុប្បន្នមនុស្សជាច្រើនកំពុងប្រើប្រាស់ប្រព័ន្ធផ្សព្វផ្សាយសង្គមដូចជា TikTok , Facebook , YouTube ឬ Instagram ជាដើម ដូច្នេះការរៀបចំមេរៀនដើម្បីបណ្ដុះបណ្ដាលនិស្សិតចាំបាច់ត្រូវតែស្របទៅតាមឧបករណ៍ ឬធាតុដែលមនុស្សកំពុងប្រើប្រាស់នាពេលបច្ចុប្បន្ន»
ប្រធានដេប៉ាតឺម៉ងទីផ្សារ រូបនេះក៏បានបន្ថែមថា ក្នុងជំនាញទីផ្សារឌីជីថលនេះ ការសិក្សាមានបែងចែកជា ៣ កម្រិត ទី១ គឺវគ្គខ្លី សិក្សារយៈពេល ៤ ខែដែលផ្តោតពិសេសទៅលើការលក់អនឡាញ, ទី២ សម្រាប់កម្រិតសញ្ញាប័ត្រជាន់ខ្ពស់បច្ចេកទេស (បរិញ្ញាបត្ររង) សិក្សារយៈពេល ២ ឆ្នាំ និងចុងក្រោយកម្រិតបរិញ្ញាបត្រ សិក្សារយៈពេល ៤ ឆ្នាំ បរិញ្ញាបត្របច្ចេកទេស។
ជាមួយគ្នានេះ ចំពោះអ្នកដែលមកពីគ្រួសារក្រីក្រ និងងាយរងហានិភ័យ ដែលមានអាយុចាប់ពី ១៥ ឆ្នាំឡើងទៅអាចដាក់ពាក្យចូលរៀនសម្រាប់វគ្គខ្លី ក្រោមកម្មវិធី TVET 1.5M ដោយឥតគិតថ្លៃ រយៈពេល ៤ ខែ សម្រាប់ការសិក្សាពីច័ន្ទ ដល់សុក្រ និងរយៈពេល ៨ខែ សម្រាប់ការសិក្សាចុងសប្ដាហ៍។
យោងតាមទិន្នន័យសង្កេតរបស់ក្រសួងការងារ ពាក់ព័ន្ធនឹងទស្សនវិស័យការងារ បានបង្ហាញថា ជំនាញទីផ្សារឌីជីថល គឺជាជំនាញដែលមានតម្រូវការខ្ពស់នាពេលបច្ចុប្បន្ន ក៏ដូចជាទៅអនាគត។ ក្នុងនាមជាគ្រូបណ្ដុះបណ្ដាលមួយរូប លោក ងួន លក្ខណៈ រំពឹងថា យុវជននឹងងាកមកសិក្សាជំនាញនេះកាន់តែច្រើនបន្ថែមទៀត ដើម្បីអាចរៀបចំខ្លួនបានសមស្របទៅនឹងទីផ្សារការងារជាក់ស្ដែង៕
