ក្នុងវេទិកាសាលារៀនសកល (Global Schools Forum) អំឡុងសប្ដាហ៍មហាសន្និបាតវិសាមញ្ញរបស់អង្គការសហប្រជាជាតិ (UNGA) នៅទីក្រុងញូវយ៉ក សហរដ្ឋអាមេរិក កាលពីថ្ងៃទី២១ ខែកញ្ញា ឆ្នាំ២០២៦ កន្លងទៅ ឯកឧត្តមបណ្ឌិត អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា បានដឹកនាំគណៈប្រតិភូអប់រំកម្ពុជាចូលរួម និងបានគូសបញ្ជាក់យ៉ាងច្បាស់អំពីសារៈសំខាន់នៃការផ្លាស់ប្ដូរពី «គម្រោងសាកល្បង» ទៅជា «ការអនុវត្តពេញលេញនៅទូទាំងប្រទេស» លើកម្មវិធីអំណាន និងគណិតវិទ្យាថ្នាក់ដំបូង ដើម្បីធានាថា កុមារគ្រប់រូបមានឱកាសអភិវឌ្ឍបំណិនមូលដ្ឋានយ៉ាងរឹងមាំ។

វេទិកានេះ មានវត្តមានអញ្ជើញចូលរួមពីសំណាក់ថ្នាក់ដឹកនាំរដ្ឋាភិបាល តំណាងមូលនិធិ Gates Foundation ព្រមទាំងដៃគូអនុវត្តរួមមាន UWS, Luminos Fund, Rising Academies និង EIDU ដើម្បីពិភាក្សាលើប្រធានបទសំខាន់ៗជុំវិញការកំណែទម្រង់ អក្ខរកម្មថ្នាក់ដំបូង ការពង្រឹងប្រព័ន្ធអប់រំ និងកិច្ចសហការ ដើម្បីធានាថា កុមារគ្រប់រូបទទួលបានឱកាសរៀនសូត្រ បំណងប្រាថ្នា និងអនាគតផ្ទាល់ខ្លួន។

ក្នុងវេទិកានេះ ឯកឧត្តមបណ្ឌិត អ៊ុង បូរាត បានចែករំលែកបទពិសោធ និងទស្សនវិស័យស្ដីពីជោគជ័យដែលអាចសម្រេចបានតាមរយៈកិច្ចសហប្រតិបត្តិការដៃគូរយៈពេលវែងជាមួយរាជរដ្ឋាភិបាលកម្ពុជា ក្នុងកិច្ចពិភាក្សាតុមូលកម្រិតរដ្ឋមន្ត្រី (Ministerial Roundtable) នៃប្រទេសឥណ្ឌា រវ៉ាន់ដា និងសៀរ៉ាឡេអូន។

ឯកឧត្តមបណ្ឌិត អ៊ុង បូរាត បញ្ជាក់ថា​ ការកែលម្អលទ្ធផលសិក្សារបស់កុមារ តម្រូវឱ្យមានការអភិវឌ្ឍជាប្រព័ន្ធដែលគ្រប់ជ្រុងជ្រោយ និងមានចីរភាព ដែលទាមទារនូវការប្ដេជ្ញាចិត្តផ្នែកនយោបាយ ភាពជាអ្នកដឹកនាំស្ថាប័ន ការអនុវត្តវិធីសាស្ត្របង្រៀនប្រកបដោយប្រសិទ្ធភាពក្នុងថ្នាក់រៀន ការវាយតម្លៃជាប្រចាំ និងការផ្ដល់ការគាំទ្រចំគោលដៅដល់សិស្សគ្រប់រូប។

គួរជំរាបជូនថា​ វេទិកានេះបានប្រព្រឹត្តទៅក្រោមការឧបត្ថម្ភរបស់មូលនិធិ Gates Foundation ដោយផ្ដោតលើអាទិភាពគន្លឹះទាំង ៩ សម្រាប់កំណែទម្រង់ប្រព័ន្ធអប់រំ រួមមាន៖

១. ឆន្ទៈនយោបាយប្រកបដោយចីរភាព (Sustained Political Commitment)៖ កំណត់អាទិភាពកែទម្រង់ឱ្យបានច្បាស់លាស់ និងរក្សាការប្ដេជ្ញាចិត្តខ្ពស់ជានិរន្តរ៍ក្នុងការលើកកម្ពស់វិស័យអប់រំ។

២. ការកែទម្រង់គ្រូបង្រៀន (Teacher Reform)៖ ពង្រឹងយន្តការជ្រើសរើសគ្រូ ការបណ្ដុះបណ្ដាលមុនចូលបម្រើការងារ និងការអភិវឌ្ឍវិជ្ជាជីវៈជាប្រចាំដល់គ្រូបង្រៀន ដើម្បីលើកកម្ពស់គុណភាពនៃការបង្រៀន។

៣. ការវាយតម្លៃក្នុងថ្នាក់រៀន (Classroom Assessment)៖ ធ្វើការវាយតម្លៃការសិក្សារបស់សិស្សជាទៀងទាត់ និងយកលទ្ធផលទាំងនោះទៅកែលម្អវិធីសាស្ត្របង្រៀន និងរៀបចំឯកសារជំនួយស្មារតីសម្រាប់គ្រូ។

៤. ការចូលរួមពីមាតាបិតា (Parental Engagement)៖ ពង្រឹងកិច្ចសហប្រតិបត្តិការរវាងសាលារៀន គ្រួសារ និងសហគមន៍ ដើម្បីគាំទ្រដល់ការរៀនសូត្ររបស់កុមារ។

៥. ភាពជាអ្នកដឹកនាំសាលារៀនដែលមានប្រសិទ្ធភាព (Effective School Leadership)៖ ផ្ដល់អំណាចដល់នាយកសាលាក្នុងការបំប្លែងគោលនយោបាយអប់រំទៅជាការអនុវត្តជាក់ស្ដែងក្នុងថ្នាក់រៀន និងធានាថាកំណែទម្រង់អប់រំអាចអនុវត្តបានប្រកបដោយប្រសិទ្ធភាពនៅកម្រិតសាលារៀន។

៦. ការរៀនសូត្រតាមឌីជីថល និងសមធម៌ (Digital Learning and Equity)៖ ប្រើប្រាស់ប្រព័ន្ធឌីជីថលដើម្បីពង្រីកឱកាសសិក្សា កែលម្អការទទួលបានធនធានអប់រំ និងកាត់បន្ថយគម្លាតនៃការសិក្សា។

៧. កាលវិភាគសិក្សាមានរចនាសម្ព័ន្ធច្បាស់លាស់ (Structured Learning Time)៖ បង្កើនម៉ោងសិក្សាដែលមានប្រសិទ្ធភាពតាមរយៈការរៀបចំពេលវេលាបង្រៀន និងសកម្មភាពក្នុងថ្នាក់រៀនឱ្យបានច្បាស់លាស់។

៨. សម្ភារៈសិក្សា និងការបង្រៀន (Learning Materials)៖ ធានាឱ្យមានការទទួលបានសៀវភៅសិក្សាគោលដែលមានគុណភាព ធនធានបង្រៀន និងកញ្ចប់សម្ភារៈសិក្សាគ្រប់គ្រាន់។

៩. ការណែនាំ និងការគាំទ្រសាលារៀនចំគោលដៅ (School Mentoring and Targeted Support)៖ ផ្ដល់ការប្រឹក្សាគរុកោសល្យជាប្រចាំដល់គ្រូបង្រៀន និងកំណត់អត្តសញ្ញាណសិស្សដែលត្រូវការជំនួយបន្ថែម ដើម្បីដោះស្រាយគម្លាតសមធម៌នៃការសិក្សា៕