យុវជន ឡេង រក្សា បច្ចុប្បន្នជាសិស្សថ្នាក់ទី១១ នៃវិទ្យាល័យ ហ៊ុនសែន ព្រៃទទឹង ស្រុកព្រៃឈរ ខេត្តកំពង់ចាម បានក្លាយជាម្ចាស់ជ័យលាភីលេខ១ នៃការប្រកួតសិស្សឆ្នើមថ្នាក់ទី១០ ប្រចាំស្រុកព្រៃឈរ ខេត្តកំពង់ចាម «ពានរង្វាន់ សម្តេចមហាបវរធិបតី ហ៊ុន ម៉ាណែត»។

យុវជន ឡេង រក្សា បានបង្ហាញអារម្មណ៍ថា រូបគេពិតជាមានអារម្មណ៍រំភើបរីករាយជាទីបំផុត ព្រោះមិននឹកស្មានដល់ថាអាចយកឈ្នះលើបេក្ខជនផ្សេងៗបាន ប៉ុន្តែទីបំផុតអាចសម្រេចបាននូវអ្វីដែលបានប៉ងតាំងពីដើមឆ្នាំដំបូងនៃថ្នាក់ទី១០។

រក្សា និយាយថា ការដាក់ពាក្យចូលរួមប្រកួតកម្មវិធីនេះ ខ្លួន​បានគិតទុកជាមុនថា ការប្រកួតនេះវានឹងផ្ដល់ឱកាសជាច្រើន ដូច្នេះរូបគេបានប្ដេជ្ញាខិតខំចូលរួម ជំនះគ្រប់ឧបសគ្គ ដើម្បីសម្រេចនូវគោលដៅ។ យុវជន ឡេង រក្សា បញ្ជាក់ថា ការប្រកួតសិស្សឆ្នើមថ្នាក់ទី១០នេះ គឺផ្ដោតសំខាន់លើមុខវិជ្ជាចំនួន៤ រួមមាន គណិតវិទ្យា រូបវិទ្យា អក្សរសាស្រ្តខ្មែរ និង ប្រវត្តិវិទ្យា ហើយ​កត្តាដែលជំរុញឱ្យរូបគេជាប់ជ័យលាភីលេខ១ គឺដោយសារការខិតខំប្រឹងប្រែងរក្សាបាននូវ តុល្យភាពស្មើគ្នារវាងមុខវិជ្ជាទាំង៤នេះ។

សម្រាប់ការចូលរួមប្រកួតនេះ រក្សា ក៏បានជួបការលំបាកមួយចំនួនដែរ ដូចជាការបែងចែកពេលវេលារវាងការប្រឡងប្រចាំខែ និងប្រចាំឆ្នាំ ប៉ុន្តែ រក្សា បានជំនះបញ្ហានេះដោយការរៀនផង សម្រាកផង ដូចជា ពិភាក្សាជាមួយមិត្តភក្ដិ ស្ដាប់តន្រ្តី និងមើលវីដេអូសិស្សច្បងនិទ្ទេស A ដើម្បីបណ្ដុះទឹកចិត្ត។

«ពីមុនខ្ញុំធ្លាប់លេងហ្គេមដែរ តែពេលត្រៀមប្រឡងកម្មវិធីនេះ ខ្ញុំបានបោះបង់ចោលការលេងហ្គេម និងប្ដេជ្ញាចិត្តខ្លាំងដើម្បីទទួលបានជ័យលាភីមួយនេះ»។

ក្នុងកិច្ចសម្ភាសន៍​ជាមួយ AMS Education យុវជន ឡេង រក្សា ក៏បានចែករំលែកនូវគន្លឹះសំខាន់ៗ ដែលជំរុញឱ្យរូបគេ​ទទួលបានលទ្ធផលល្អ ដែល​រួមមាន ទី១ ការខិតខំដោយខ្លួនឯង រក្សា​ និយាយថា ភាពជោគជ័យវាមិនអាចកើតឡើងដោយឯកឯងបានទេ ចាំបាច់យើងត្រូវខិតខំប្រឹងប្រែងរៀនសូត្រ ដើម្បីឈ្មោះទៅរកវា ទើបធ្វើឱ្យយើងទទួលបាននូវភាពជោគជ័យ, ទី២ រៀនសព្វសារពើ ដោយ​មិនត្រឹមតែរៀននៅសាលាទេ គឺចាំបាច់ត្រូវ រៀនស្វ័យសិក្សានៅផ្ទះបន្ថែម, ទី៣ សម្រាប់មុខវិជ្ជាគណិតវិទ្យា ត្រូវ​ខិតខំស្រាវជ្រាវតាមឯកសារ តាមបណ្ដាញសង្គម និងសួរលោកគ្រូ អ្នកគ្រូ នៅពេលមិនយល់, ទី៤ សម្រាប់មុខវិទ្យារូបវិទ្យា ពេល​ទទួលបានឯកសារពីលោកគ្រូ អ្នកគ្រូ ហើយព្យាយាម អនុវត្តដោយខ្លួនឯង ជាជាងចាំតែរៀននៅសាលា។ ការរៀនខ្លួនឯងជួយឱ្យដឹងថា ខ្លួនពូកែ និងខ្សោយផ្នែកណា ដើម្បីពង្រឹងបន្ថែម និង ទី៥ មុខវិជ្ជាប្រវត្តិវិទ្យា គឺជាមុខវិជ្ជាទូលំទូលាយ ដូច្នេះត្រូវអានឱ្យបានច្រើន (ចាប់ពីថ្នាក់ទី៩ ដល់ទី១២) មិនចាំបាច់ទន្ទេញចាំមាត់ទេ តែត្រូវសង្ខេបយកគន្លឹះសំខាន់ៗ ដោយនឹកស្រមៃរូបភាពព្រឹត្តិការណ៍មួយទៅព្រឹត្តិការណ៍មួយ។

សូមជំរាបថា ការប្រឡងជ្រើសរើសសិស្សឆ្នើមថ្នាក់ទី១០ ប្រចាំស្រុកព្រៃឈរ ពានរង្វាន់សម្តេចមហាបវរធិបតី ហ៊ុន ម៉ាណែត ត្រូវបានបង្កើតឡើងដើម្បីលើកកម្ពស់សមត្ថភាព និងលើកទឹកចិត្តដល់សិស្សឆ្នើមថ្នាក់ទី១០ ឱ្យយកចិត្តទុកដាក់ខិតខំប្រឹងប្រែងរៀនសូត្រ តាំងពីចូលកម្រិតមធ្យមសិក្សាបឋមភូមិ ជាពិសេសចាប់ពីថ្នាក់ទី៧ ឡើងទៅ។

ក្នុងនាម​ជាម្ចាស់ជ័យលាភីលេខ១ សិស្សឆ្នើមថ្នាក់ទី១០ ពានរង្វាន់ «សម្តេចមហាបវរធិបតី ហ៊ុន ម៉ាណែត» ប្រចាំស្រុកព្រៃឈរ ខេត្តកំពង់ចាម យុវជន ឡេង រក្សា ទទួលបានរង្វាន់ម៉ូតូ Honda Dream 125 មួយគ្រឿង និងថវិកា ១លានរៀលផងដែរ។ កម្មវិធីប្រកួតសិស្សឆ្នើម​ថ្នាក់ទី១០ មិនត្រឹមតែផ្ដល់ជ័យលាភីទេ តែបានបង្រៀនឱ្យ យុវជន ឡេង រក្សា ចេះអត់ធ្មត់ តស៊ូ ជំនះគ្រប់ឧបសគ្គ ដើម្បីឆ្ពោះទៅរកអ្វីដែលចង់បាន និងធ្វើឱ្យឪពុកម្ដាយមានមោទនភាពចំពោះខ្លួន។ សម្រាប់ពេលអនាគត យុវជន រក្សា បានប្តេជ្ញានឹងខិតខំព្យាយាមឱ្យអស់ពីសមត្ថភាពដើម្បីទទួលបាន និទ្ទេស A នៅថ្នាក់ទី១២ និងចង់ប្រឡងជាប់ជាសិស្សពូកែទូទាំងប្រទេសផ្នែកគណិតវិទ្យាផងដែរ៕