ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាកលវិទ្យាល័យ DALI នៃសាធារណរដ្ឋប្រជាមានិតចិន បានប្រកាសផ្តល់អាហារូបករណ៍ថ្នាក់បរិញ្ញាបត្រចំនួន១០កន្លែង ដល់និស្សិតកម្ពុជា ដើម្បីទៅបន្តការសិក្សានៅសាធារណរដ្ឋប្រជាមានិតចិន សម្រាប់ឆ្នាំសិក្សា២០២៤-២០២៥។ សោហ៊ុនធ្វើដំណើរទៅមក ជាបន្ទុករបស់សាមីជន ឯការចំណាយផ្សេងៗ រួមមាន ការស្នាក់នៅ ការសិក្សា និងប្រាក់អាហារូបករណ៍ប្រចាំខែ (៨០០យ័ន) ជាបន្ទុករបស់សាកលវិទ្យាល័យ DALI។
មុខជំនាញសិក្សា ៖ មានច្រើនមុខជំនាញដែលនិស្សិតអាចជ្រើសរើសបាននៅពេលរៀនចប់ភាសាចិន ដោយជោគជ័យ។
លក្ខខណ្ឌ នៃការចុះឈ្មោះ ៖ មានសញ្ជាតិខ្មែរ និងអាយុមិនលើសពី ២៥ឆ្នាំ, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល, មានសុខភាពមាំមួន ល្អបរិបូរណ៍ទាំងកាយសម្បទា និងសតិបញ្ញា។
កាលបរិច្ឆេទ និងទីកន្លែងទទួលពាក្យ ៖ ការចែក និងទទួលពាក្យ នឹងប្រព្រឹត្តទៅចាប់ពីថ្ងៃផ្សាយដំណឹងនេះ រហូតដល់ថ្ងៃទី១៩ សីហា ឆ្នាំ២០២៤ វេលាម៉ោង ១៦:០០នាទី នៅនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន របស់ក្រសួងអប់រំ ដែលមានអាសយដ្ឋានអគារលេខ២៣ ផ្លូវ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។ កាលបរិច្ចេទ នៃការប្រឡង ៖ ថ្ងៃទី២៥ ខែសីហា ឆ្នាំ២០២៤ ។
សំណុំឯកសារដែលត្រូវបំពេញ និងភ្ជាប់មកជាមួយ ៖ ពាក្យសុំអាហារូបករណ៍ ១ច្បាប់, ជីវប្រវត្តិសង្ខេប ១ច្បាប់, កិច្ចសន្យា ១ច្បាប់, សញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល ច្បាប់ថតចម្លង ១ច្បាប់ (សូមភ្ជាប់ច្បាប់ដើមដើម្បីពិនិត្យ និងផ្ទៀងផ្ទាត់), រូបថតពណ៌៤ គុណ៦ ចំនួន២សន្លឹក, សេចក្តីបញ្ជាក់ពីគ្រឹះស្ថានសិក្សា ឬប័ណ្ណសម្គាល់ខ្លួននិស្សិត ចំពោះបេក្ខជនជានិស្សិតដែលកំពុងសិក្សានៅតាមគ្រឹះស្ថានសិក្សានានា, សេចក្តីបញ្ជាក់ពីអង្គភាពចំពោះបេក្ខជនជាមន្រ្តីរាជការ, វិញ្ញាបនបត្រពិនិត្យកាយសម្បទា និងជំងឺអេដស៍ (២ច្បាប់) ក្រោយពេលបេក្ខជនប្រឡងជាប់។
ក្រសួងអប់រំ យុវជន និងកីឡា នឹងជ្រើសរើសបេក្ខជនដែលមានពិន្ទុខ្ពស់ ចំនួន១០នាក់ ដោយផ្អែកលើលទ្ធផលប្រឡង ដើម្បីបញ្ជូនទៅសិក្សានៅសាកលវិទ្យាល័យ DALI នាខែតុលា ឆ្នាំ២០២៤៕
