ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបរួច សិស្សានុសិស្សនឹងចាប់ផ្តើមជីវិតសិក្សាថ្មី នោះគឺការបន្តការសិក្សានៅមហាវិទ្យាល័យ ដែលតម្រូវឱ្យសិស្សនៅទីជនបទត្រូវមករាជធានី ឬទីក្រុង។ ស្របជាមួយគ្នានេះ គេក៏សង្កេតឃើញថា មានការបង្ហោះសារនៅលើបណ្ដាញសង្គមជាច្រើនពីការផ្តល់អាហារូបករណ៍, ការផ្តល់បន្ទប់ស្នាក់នៅដែលមានតម្លៃទាប ក៏ដូចជាឱកាសការងារជាដើម។ សម្រាប់អ្នកធ្វើការងារនៅក្នុងវិស័យអប់រំបានមើលឃើញបញ្ហាមួយចំនួន និងអំពាវនាវឱ្យសិស្សដែលទើបប្រឡងបាក់ឌុបរួចត្រូវប្រុងប្រយ័ត្នចំពោះការបោកបញ្ឆោតតាមរយៈអនឡាញ។
តាមរយៈបណ្ដាញសង្គមកាលពីពេលថ្មីៗនេះ ក្រសួងអប់រំ យុវជន និងកីឡា បានអំពាវនាវដល់សិស្សានុសិស្សដែលទើបប្រឡងបាក់ឌុបរួច ត្រូវប្រុងប្រយ័ត្នចំពោះការឆបោកតាមអនឡាញដូចជាតាមរយៈការសន្យាផ្តល់អាហារូបករណ៍, ការសន្យាផ្តល់ការងារ និងការជួលកន្លែងស្នាក់នៅជាដើម ដែលនាំឱ្យខាតបង់ប្រាក់កាស ក៏ដូចជាពេលវេលារបស់សិស្សានុសិស្ស។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ស្របពេលដែលបច្ចេកវិទ្យាជឿនលឿន និងផ្តល់អត្ថប្រយោជន៍ ក៏ដូចជាជួយសម្រួលដល់ការរស់នៅរបស់មនុស្ស ប្រព័ន្ធបច្ចេកវិទ្យានេះ ក៏ជាអាវុធមុខពីរដែលត្រូវតែយកចិត្តទុកដាក់ និងប្រុងប្រយ័ត្ន។
កញ្ញា សុខ ស្រីនុត បច្ចុប្បន្នជាគ្រូបង្រៀននៅសាលាឯកជនមួយបានរៀបរាប់ពីបទពិសោធន៍ដែលនាងធ្លាប់ត្រូវបានគេឆបោកពេលឡើងមករៀននៅភ្នំពេញដំបូងៗថា កាលនោះដោយសារតែមានចិត្តចង់ទទួលបានការងារធ្វើដើម្បីជួយសម្រាលបន្ទុកគ្រួសារ នាងបានជឿតាមការផ្សព្វផ្សាយនៅលើបណ្តាញសង្គមដោយថា ពេលចូលរៀនសាលានោះ គេនឹងផ្តល់ការងារឱ្យធ្វើ។ ប៉ុន្តែអ្វីដែលនាងគិត គឺខុសស្រឡះ ពេលដែលបានបង់លុយចូលរៀនហើយ ការងារដែលសាលាសន្យាថានឹងផ្តល់ឱ្យនោះ គឺជាការបញ្ចុះបញ្ចូលមិត្តភក្តិឱ្យមកចូលរៀនសាលានោះដើម្បីទទួលបានភាគរយ ដោយឡែកការរៀនសូត្រនៅទីនោះទៀតសោតក៏មិនគ្រប់ម៉ោងតាមការសន្យាដែរ ដែលធ្វើឱ្យនាងខាតទាំងប្រាក់កាស និងពេលវេលា។
ដោយឡែកកញ្ញា ញ៉ែម ស្រីលីន បច្ចុប្បន្នក៏ជាគ្រូបង្រៀននៅសាលាឯកជនមួយ ក៏បានជួបបទពិសោធន៍នៃការឆបោកពេលឡើងមករៀនដំបូងៗនៅភ្នំពេញដែរ។ ករណីរបស់ ស្រីលីន មានដូចជា ការសន្យាផ្តល់ការងារជាអ្នកលក់ ប៉ុន្តែតាមពិតគេល្បួងឱ្យរូបនាងទិញផលិតផលរបស់គេយកទៅលក់បន្ត។ ស្រីលីន ក៏ធ្លាប់ជួបករណីបោកបញ្ឆោតពាក់ព័ន្ធនឹងអាហារូបករណ៍ដែរ ដោយដំបូងតាមរយៈការផ្សព្វផ្សាយគេសន្យាផ្ដល់អាហារូបករណ៍ ប៉ុន្តែការពិតគឺគេតម្រូវឱ្យបង់ប្រាក់រដ្ឋបាលសិន ខណៈប្រាក់រដ្ឋបាលនោះគឺប្រហាក់ប្រហែលនឹងការបង់ថ្លៃពេញទៅហើយ។
យ៉ាងណាក៏ដោយ ស្រីលីន បានផ្តាំផ្ញើដល់ប្អូនៗសិស្សានុសិស្សដែលមានបំណងឡើងមករៀននៅភ្នំពេញ សូមខិតខំប្រឹងប្រែងរៀនសូត្រសិន ដើម្បីមានចំណេះជំនាញខ្លះចាំគិតពីការរកការងារធ្វើតាមក្រោយ។ ប៉ុន្តែបើចង់រកការងារធ្វើ គួររកការងារណាដែលសមនឹងសមត្ថភាព ហើយបើមានគេបញ្ចុះបញ្ចូលថា មានការងារធ្វើដែលមានប្រាក់ខែច្រើន សូមគិតបន្តិច និងរកអ្នកប្រឹក្សាយោបល់សិន កុំអាលជឿគេ ឬសម្រេចចិត្តភ្លាមៗ ព្រោះអាចនឹងជួបករណីបោកប្រាស់ ដែលនាំឱ្យខាតទាំងប្រាក់ ខាតទាំងពេលវេលា។
លោក ជី សុផាត អ្នកជំនាញក្នុងវិស័យបច្ចេកវិទ្យា ក៏បានមើលឃើញដែរថា បច្ចុប្បន្ននេះមានជនខិលខូចមួយចំនួនបានទាញយកឱកាសពីប្រជាប្រិយភាពនៅលើបណ្ដាញសង្គមយកផលប្រយោជន៍ ដោយមិនខ្វល់ថា វាជារឿងអាក្រក់ ឬបោកប្រាស់នោះទេ។ ក្នុងទិដ្ឋភាពនេះ លោក សុផាត ស្នើដល់សិស្សានុសិស្សដែលទើបប្រឡងបាក់ឌុបរួច ជាពិសេសសិស្សដែលមកពីបណ្ដាខេត្តត្រូវស្វែងយល់បន្ថែមប្រសិនបើទទួលបានព័ត៌មានអ្វីមួយ ដូចជាករណីផ្តល់អាហារូបករណ៍ ផ្តល់កន្លែងស្នាក់នៅ ឬផ្តល់ការងារធ្វើជាដើម ព្រោះវាអាចជាករណីបោកបញ្ឆោត។
បើតាមលោក ជី សុផាត ប្រសិនបើសិស្សានុសិស្សជួបនូវករណីសន្យាផ្តល់អាហារូបករណ៍ ការផ្តល់កន្លែងស្នាក់នៅ ឬការផ្តល់កម្ចី ក៏ដូចជាឱកាសផ្សេងៗ សូមប្អូនៗសាកសួរយោបល់ពីអ្នកដែលស្គាល់គ្នាសិន ធ្វើការផ្ទៀងផ្ទាត់ព័ត៌មាន ប្រភពនៃអ្នកផ្តល់ព័ត៌មានឱ្យបានច្បាស់លាស់ ដូចជាមានទីតាំងជាក់ស្តែង មានផេកផ្លូវការរបស់ស្ថាប័ននោះជាដើម។ “សម្រាប់សិស្សដែលគាត់ទើបតែមកពីខេត្ត សួរគេឱ្យបានច្រើន ផ្ទៀងផ្ទាត់ឱ្យបានច្រើន កុំជឿព័ត៌មានតែមួយឆាវ សូមផ្ទៀងផ្ទាត់ព័ត៌មានទាំងអស់ហ្នឹងឱ្យបានច្បាស់លាស់។ មុនពេលជឿទៅលើអ្នកណាម្នាក់ ត្រូវចាំថា កុំជឿគេ ដោយទាន់ហន់ពេក”៕
