ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាសារលើកទឹកចិត្តទៅដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ លោកឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ អ៊ីឌូខេសិន បានលើកឡើងថា ការប្រឡងបាក់ឌុបនេះ គឺគ្រាន់តែជាចំណុចត្រួតពិនិត្យ នៃការរៀនសូត្ររបស់ក្មួយៗរយៈពេល១២ឆ្នាំប៉ុណ្ណោះ ដូច្នេះក្មួយៗកុំគិតថា ការប្រឡងបាក់ឌុបជាចុងបញ្ចប់នៃការសិក្សាឱ្យសោះ។
បើតាមលោកឧកញ៉ា ប៉ិច បូឡែន ការសិក្សាគឺកើតពេញមួយជីវិត ដូច្នេះនៅពេលដែលប្រឡងបាក់ឌុបរួច លទ្ធផលចេញមកជាប់ក្មួយៗត្រូវរៀនបន្ត ហើយប្រសិនបើអកុសល្យមិនជាប់ ក៏ក្មួយៗអាចប្រឡងឡើងវិញ ឬចូលរៀនជំនាញបច្ចេកទេស និងវិជ្ជាជីវៈ ឬក៏អាចរៀនបរិញ្ញាបត្ររងជាដើម ដោយថា នេះជាចំណុចចាប់ផ្តើមមួយ។
អ្នកជំនាញផ្នែកអប់រំរូបនេះបញ្ជាក់ថា លទ្ធផលបាក់ឌុប វាបង្ហាញឱ្យយើងនូវផ្លូវដើរបន្ថែមមួយទៀត ទៅលើការកសាងអាជីពការងារ ក៏ដូចជាមុខរបរទៅមុខ ដូច្នេះអាចនិយាយបានថា បើសិនជាបេក្ខជនជាប់ ក៏អាចរៀនបន្តទៅមុខទៀត ហើយបើធ្លាក់ ក៏អាចបន្តការសិក្សាទៅមុខទៀតបានដែរ តែអ្វីដែលសំខាន់គឺខំប្រឹងរៀនឱ្យមានចំណេះ មានជំនាញ ចប់ចេះ ហើយអាចធ្វើការរកប្រាក់បាន ដើម្បីជួយអភិវឌ្ឍសង្គមសេដ្ឋកិច្ច។ លោកឧកញ៉ាថា តទៅមុខទៀតកម្ពុជាត្រូវការកម្លាំងសេដ្ឋកិច្ច ដោយពឹងផ្អែកទៅលើធនធានយុវជន ដូច្នេះក្មួយៗរៀនអ្វីក៏ដោយ ក៏ល្អដែរ ឱ្យតែមានចំណេះជំនាញច្បាស់ មិនថា ថ្នាក់បរិញ្ញាបត្រ ឬក៏ការបណ្តុះបណ្តាលជំនាញបច្ចេកទេស និងវិជ្ជាជីវៈនោះទេ។
“លទ្ធផលបាក់ឌុបវាបង្ហាញឱ្យយើងនៅផ្លូវដើរបន្ថែមមួយទៀតទៅលើការកសាងអាជីពការងារ មុខរបរទៅមុខ បើសិនជាយើងជាប់ ក៏យើងអាចបន្តទៅ បើយើងធ្លាក់ក៏បន្តការអប់រំទៅមុខទៀត ជាពិសេសខំប្រឹងរៀន មិនថា យើងជាប់ ឬធ្លាក់ រៀនបរិញ្ញាបត្រ ឬរៀនបណ្តុះបណ្តាលបច្ចេកទេស និងវិជ្ជាជីវៈ សុំឱ្យរៀនមានចំណេះ មានជំនាញ ចប់ចេះ ហើយអាចធ្វើការរកលុយបាន ដើម្បីយើងជួយអភិវឌ្ឍសង្គមសេដ្ឋកិច្ច”
គួរជំរាបជូនថា ការប្រឡងសញ្ញបត្រមធ្យមសិក្សាទុតិយភូមិ ឬបាក់ឌុប នៅឆ្នាំនេះ ប្រព្រឹត្តទៅរយៈពេល២ថ្ងៃ គឺថ្ងៃទី៨ និងថ្ងៃទី៩ ខែតុលា ឆ្នាំ២០២៤ ដោយមានបេក្ខជនចុះឈ្មោះប្រឡងសរុប ១៣៧.០៤០ នាក់ (ស្រី ៧៤ ៨៨២ នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៣៩.៣៥៨ នាក់ (ស្រី ២៣.៧១៥ នាក់) បេក្ខជនថ្នាក់វិទ្យាសាស្ត្រសង្គមមានចំនួន ៩៧.៦៨២ នាក់ (ស្រី ៥១.១៦៧ នាក់)៕
