ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈសាកលវិទ្យាល័យភាគច្រើននៅសហរដ្ឋអាមេរិក ពិចារណាលើសមត្ថភាពហិរញ្ញវត្ថុរបស់អ្នកដាក់ពាក្យស្នើសុំចូលរៀន សាកលវិទ្យាល័យចំនួន ៩ រួមមាន Harvard, Yale Princeton, MIT, Amherst, Dartmouth, Bowdoin, Brown, និង Notre Dame មិនរួមបញ្ចូលនូវលក្ខខណ្ឌពិចារណាអំពីលក្ខខណ្ឌហិរញ្ញវត្ថុនោះទេ។ សាកលវិទ្យាល័យទាំងនេះ ក៏នឹងផ្ដល់កញ្ចប់ជំនួយហិរញ្ញវត្ថុទៅដល់បេក្ខជន ដែលមានលក្ខណៈសម្បត្តិគ្រប់គ្រាន់ចូលរៀនផងដែរ។
សាកលវិទ្យាល័យទាំង ៩ ដែលបានរៀបរាប់ សុទ្ធសឹងតែជាសាកលវិទ្យាល័យកំពូល ក្នុងចំណោមសាកលវិទ្យាល័យកំពូលទាំង ២០ ដែលផ្ដល់ជូននូវកម្មវិធីសិក្សាថ្នាក់ឧត្តមសិក្សា រួមជាមួយនឹងកម្មវិធីថ្នាក់អនុបណ្ឌិត និងបណ្ឌិត។ នេះបើយោងតាមចំណាត់ថ្នាក់ 2025 US News និង World Report ។
ត្បិតមិនវាយតម្លៃលើស្ថានភាពហិរញ្ញវត្ថុរបស់បេក្ខជនដែលដាក់ពាក្យចូលរៀន ប៉ុន្តែសាកលវិទ្យាល័យទាំងនេះ វាយតម្លៃបេក្ខជនលើលក្ខណៈសម្បត្តិ និងសក្តានុពលរបស់ពួកគេ។ ខណៈនិស្សិតអន្តរជាតិនៅសាកលវិទ្យាល័យទាំងនេះ មានសិទ្ធិទទួលបានកញ្ចប់ជំនួយហិរញ្ញវត្ថុចាប់ពីប្រមាណ ២១,៨០០ដុល្លារ ដល់ ៨៤,៤០០ ដុល្លារ ជារៀងរាល់ឆ្នាំ។
នៅសាកលវិទ្យាល័យ Yale សិស្សមកពីគ្រួសារ ដែលរកបានតិចជាង ៦៥,០០០ ដុល្លារ អាចទទួលបានជំនួយបន្ថែមរហូតដល់ ៨៤,២០០ ដុល្លារ។ ទន្ទឹមនឹងនេះ MIT ផ្ដល់ជំនួយហិរញ្ញវត្ថុជាង ៧៦,៨០០ដុល្លារ ខណៈសាកលវិទ្យាល័យ Notre Dame ផ្ដល់ជំនួយជាមធ្យម ៧៩,៩០០ដុល្លារ សម្រាប់សិស្សដែលគ្រួសាររកបានតិចជាង ៤០,០០០ដុល្លារក្នុងមួយឆ្នាំ។
សាកលវិទ្យាល័យនៅសហរដ្ឋអាមេរិកជាធម្មតាមានរយៈពេលចូលរៀន ២ដំណាក់កាល ៖ ទី១ ការសម្រេចចិត្តដំបូង ឬការសម្រេចចិត្តមុនពេលកំណត់ (Early Decision) ផុតកំណត់ត្រឹមថ្ងៃទី ១៥ ខែវិច្ឆិកា និងការចូលរៀនទៀងទាត់ (Regular Admission) ផុតកំណត់នៅខែធ្នូ ឬខែមករា។ ឯកសារដែលត្រូវភ្ជាប់ ដើម្បីដាក់ពាក្យស្នើសុំចូលរៀនក្នុងកម្មវិធីនេះមាន ប្រតិបត្រពិន្ទុ (Transcript), លិខិតអនុសាសន៍ (Recommendation letter), សំណេរ (essay), កំណត់ត្រា និងសមិទ្ធិផល ក្នុងការសិក្សា និងក្រៅការសិក្សា (record of academic and extracurricular achievements) ។
បច្ចុប្បន្ន សហរដ្ឋអាមេរិកនៅតែជាគោលដៅកំពូលសម្រាប់និស្សិតអន្តរជាតិ ហើយបច្ចុប្បន្នប្រទេសមហាអំណាចមួយនេះ ទទួលនិស្សិតឱ្យមករៀនជាងមួយលាននាក់ មកពីប្រទេសជាង ២០០ ក្នុងឆ្នាំសិក្សាកាលពីឆ្នាំមុន។
គិតត្រឹមឆ្នាំ ២០២៤នេះ និស្សិតកម្ពុជា ដែលកំពុងសិក្សានៅសហរដ្ឋអាមេរិក មានចំនួន ១,០៦០នាក់ ដោយនិស្សិតភាគច្រើន បន្តការសិក្សាក្នុងជំនាញធុរកិច្ច និង STEM (វិទ្យសាស្ត្រ បច្ចេកវិទ្យា វិស្វកម្ម និងគណិតវិទ្យា)៕
