ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានបង្ហាញពីបំណងនាំយកការបណ្តុះបណ្តាលជំនាញបច្ចេកទេសកម្រិតស្តង់ដាសិង្ហបុរីនៅកម្ពុជា ដើម្បីបម្រើតម្រូវការទីផ្សារការងារឱ្យកាន់តែមានប្រសិទ្ធិភាព។
ក្នុងជំនួបជាមួយលោក AW TUAN KEE នាយករងសាលាពហុបច្ចេកទេស Tamesak នៃសាធារណរដ្ឋសិង្ហបុរី ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងពីភាពចាំបាច់នៃកិច្ចសហការរវាងវិទ្យាស្ថានបច្ចេកទេសរបស់កម្ពុជា និងសាលាពហុបច្ចេកទេសរបស់សិង្ហបុរីលើការបណ្តុះបណ្តាលធនធានមនុស្សនិងនិយាមសិក្សាស្តង់ដារបស់សិង្ហបុរីមកបណ្តុះបណ្តាលជំនាញនៅកម្ពុជាដែលជាចំណុចគន្លឹះលើការពង្រឹងកម្រិតការបណ្តុះបណ្តាលជំនាញបច្ចេកទេសឱ្យកាន់តែប្រសើរបន្ថែមទៀត។
លោក AW TUAN KEE បានគាំទ្រពេញទំហឹងចំពោះគំនិតផ្តួចផ្តើមរបស់ឯកឧត្តមរដ្ឋមន្ត្រីលើកិច្ចសហការរវាងសាលាពហុបច្ចេកទេសនៃប្រទេសទាំងពីរ។ លោកថា ការពង្រឹងការបណ្តុះបណ្តាលធនធានមនុស្សឱ្យមានស្តង់ដារកាន់តែខ្ពស់បន្ថែមទៀត គឺជាប្រយោជន៍ដ៏សំខាន់ក្នុងការបម្រើការអភិវឌ្ឍសង្គមជាតិកម្ពុជា។
គួរបញ្ជាក់ដែរថា រាជរដ្ឋាភិបាលកម្ពុជានៅក្នុងនីតិកាលទី៧ បានកំណត់គោលដៅក្នុងការបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) ដល់យុវជន និងអ្នកធ្វើការងារក្រៅប្រព័ន្ធឱ្យបានចំនួន ១លាន៥សែននាក់។
ឯកឧត្តម កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា គិតត្រឹមឆមាសទី១ ឆ្នាំ២០២៤ កម្មវិធី “បណ្តុះបណ្តាលជំនាញវិជ្ជាជីវៈ និងបច្ចេកទេស ១,៥ លាននាក់ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” របស់រាជរដ្ឋាភិបាល ទទួលបានយុវជនចំនួនជាង ៤ ម៉ឺន ៥ ពាន់នាក់ ចុះឈ្មោះចូលរៀន នៅទូទាំងប្រទេស ដោយពួកគេបានជ្រើសរើសជំនាញសិក្សាដែលខ្លួនពេញចិត្តក្នុងចំណោមជំនាញទាំង ៤៥ ក្នុងវិស័យអាទិភាពសំខាន់ៗចំនួន១០ រួមមាន សំណង់, អគ្គិសនី និងថាមពល, អេឡិចត្រូនិក, បរិក្ខារត្រជាក់និងកម្ដៅ, កម្មន្តសាល, មេកានិកទូទៅ/មេកានិករថយន្ត, ទេសចរណ៍, សេវាកម្ម, កសិកម្ម និងកសិ-ឧស្សាហកម្ម, និង ធុរកិច្ចនិងព័ត៌មានវិទ្យា។
បើតាមឯកឧត្តម កត្តា អ៊ន កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស គឺជាស្ពានសម្រាប់យុវជនក្នុងការបន្តការសិក្សារបស់ពួកគេ ដោយទទួលបានជំនាញដែលមានប្រយោជន៍សម្រាប់ការងារនាពេលអនាគត៕
