បុណ្យមាឃបូជា ជាពិធីបុណ្យដែលមានសារៈមួយក្នុងចំណោមពិធីបុណ្យសំខាន់ៗនៅក្នុងពុទ្ធសាសនា និងតែងតែប្រារព្ធឡើងរៀងរាល់ថ្ងៃ១៥កើត ខែមាឃ រៀងរាល់ឆ្នាំ ប៉ុន្តែពុទ្ធបរិស័ទខ្មែរ មិនសូវបានចាប់អារម្មណ៍​ចំពោះកម្មពិធីបុណ្យសាសនានេះដូចជាពិធីបុណ្យល្បីៗមួយចំនួនដូចជាបុណ្យណូអែល ឬបុណ្យនៃសេចក្ដីស្រឡាញ់ ១៤កុម្ភៈឡើយ។

តើគួរធ្វើបែបណាដើម្បីឱ្យយុវជនអាចស្វែងយល់ និងចងចាំថ្ងៃបុណ្យមាឃបូជា ?

ឯកឧត្ដម ឆាត សុឆេត អ្នកនាំពាក្យក្រសួងធម្មការ និងសាសនា បានឱ្យដឹងថា ដើម្បីឱ្យយុវជនយល់ដឹងអំពីខ្លឹមសារ នៃពិធីបុណ្យមាឃបូជា ត្រូវមានការចូលរួម និងសាងរូបភាពពីអ្នកពាក់ព័ន្ធជាច្រើនដូចជា ព្រះសង្ឃត្រូវបង្កើតកម្មវិធីមួយចំនួនដើម្បីឱ្យយុវជនចូលរួម និងស្វែងយល់។ ជាក់ស្ដែង ព្រះភិក្ខុវជីវប្បញ្ញោ គូ សុភាព បានបង្កើតកម្មវិធីប្រឡងប្រជែងស្ដីអំពីមាឃបូជា។ ជាមួយគ្នានេះ ប្រព័ន្ធផ្សព្វផ្សាយ ក៏ចូលរួមផ្សព្វផ្សាយអំពីពិធីបុណ្យមាឃបូជា នៅទូទាំងប្រទេស តាមរយៈ Facebook Page ការផ្សព្វផ្សាយដោយផ្ទាំងប៉ាណូនៅតាមផ្លូវ និងវត្តអារាម ដែលជាការបង្ហាញឱ្យឃើញពីការយកចិត្តទុកដាក់ និងចូលរួមផ្សព្វផ្សាយអំពីពិធីបុណ្យពុទ្ធសាសនាឱ្យយុវជន យុវនារីដែលប្រកាន់យកព្រះពុទ្ធបរិស័ទបានដឹង បានចូលរួម និងបន្តវេនពីចាស់ព្រឹទ្ធាចារ្យ។

អ្នកនាំពាក្យរូបនេះបន្តថា បច្ចុប្បន្ននេះ ក្រសួងធម្មការ និង សាសនា ក៏បានផលិតវីដេអូទាក់ទងនឹងបុណ្យមាឃបូជា និង ផ្សព្វផ្សាយនៅក្នុងបណ្ដាញសង្គម Facebook តាមរយៈ Page ផ្លូវការ និងការជួយផ្សព្វផ្សាយបន្ថែមរបស់ថ្នាក់ដឹកនាំប្រទេសដូចជា ការផ្សាយបន្តដោយ Page ផ្លូវការរបស់ សម្ដេចបវរធិបតី ហ៊ុន ម៉ាណែត និង វិទ្យុ ទូរទស្សន៍ជាតិផ្សេងៗ។

បើតាម ឯកឧត្ដម ឆាត សុឆេត ក្រៅពីការចូលរួមផ្សព្វផ្សាយ យុវជនកម្ពុជាដែលកាន់ព្រះពុទ្ធសាសនាខ្លួនឯងផ្ទាល់ ត្រូវមានឆន្ទៈក្នុងការសិក្សារៀនសូត្រ ស្វែងយល់ និងទទួលយកនូវមេរៀនដែលព្រះពុទ្ធបានបន្សល់ដើម្បីយកទៅប្រតិបត្តិឱ្យកើតជាប្រយោជន៍នៅក្នុងជីវិត។ លើសពីនេះ យុវជនក៏មានតួនាទីក្នុងការរួមចំណែកបន្តផ្សព្វផ្សាយនូវខ្លឹមសារនានានៃពុទ្ធវចន ពាក្យទូន្មានប្រៀនប្រដៅនៃព្រះពុទ្ធ ជាពិសេសខ្លឹមសារនៃបុណ្យមាឃបូជា​ទាំង២ប្រការ ដោយប្រការទីមួយ បុណ្យមាឃបូជា ធ្វើឡើងនៅថ្ងៃទី១៥ កើត ខែមាឃ ដែលជាថ្ងៃព្រះពុទ្ធព្រះអង្គសម្ដែឱវាទបាតិមោក្ខ និងជាថ្ងៃដែលព្រះពុទ្ធទ្រង់ដាក់ព្រះជន្មាយុសង្ខាដើម្បីចូលបរិនិព្វាន ។

“យុវជនទាំងអស់ត្រូវតាំងចិត្តប្ដេជ្ញាខ្លួនឯងឱ្យក្លាយជាពុទ្ធសាសនិកល្អ ដើម្បីបន្តវេនពីមនុស្សចាស់ជំនាន់មុនដែលបានបន្សល់កេរ្តិ៍មរតក ក៏ដូចជាការបន្តផ្ដល់ទៅមនុស្សជំនាន់ក្រោយផងដែរ”

ឯកឧត្ដម ឆាត សុឆេត

គួរបញ្ជាក់ថា ពិធីបុណ្យមាឃបូជា នៅក្នុងឆ្នាំ២០២៥នេះ នឹងប្រព្រឹត្តិទៅនាថ្ងៃទី១៥ កើត ខែមាឃ ឆ្នាំរោង ព.ស ២៥៦៨ ដែលត្រូវនឹងថ្ងៃពុធ ទី១២ ខែកុម្ភៈ ឆ្នាំ២០២៥។ បុណ្យ​មាឃបូជា​ប្រារព្ធ​ឡើង ដើម្បី​​រំលឹក​ដល់​ថៃ្ង​ដែល ព្រះសម្មាសម្ពុទ្ធ​ទ្រង់​ប្រកាស​បង្កើត ព្រះពុទ្ធសាសនា​ឡើង​ក្នុង​លោក​នា​ប្រទេសឥណ្ឌា​កាល​ពី ៥៨៨ ឆ្នាំ មុន​គ្រិស្តសករាជ នា​ថៃ្ងទី ១៥​កើត ខែមាឃ ក្រោយ​ពី​ការ​ត្រាស់​ដឹង​របស់​ព្រះអង្គ​ចំនួន ៩ ខែគត់។

ការ​បង្កើត​ព្រះពុទ្ធសាសនា ក្នុង​ឋានៈ​ជា​អង្គ​ការ​សាសនា​មួយ​នេះ ធ្វើ​ឡើង​នៅក្នុង​ចំណោម ព្រះ​សង្ឃ​ចំនួន ១២៥០ អង្គ ជា​សមាជិក ក្នុង​អង្គមហាសន្និបាត​មួយ ដែល​បាន​និមន្ត​មក​ពី​គ្រប់​ស្រទាប់​វណ្ណៈ​ទាំង​អស់ ។ នៅ​ក្នុង​មហាសន្និបាត​នោះ ព្រះសម្មាសម្ពុទ្ធ ទ្រង់​បាន​ប្រកាស​នៅ​គោល​ការណ៍ ចំនួន​១១ ប្រការ ដែលមាន​ឈ្មោះ​ជា​ភាសា​បាលី​ថា “ឱវាទ​បាដិមោក្ខ” សម្រាប់ឱ្យ​សមាជិក​មហាសន្និបាត ទាំង​អស់​កាន់​យក​ជា​វិថីជីវិត និង​សម្រាប់​យក​ទៅផ្សព្វផ្សាយ ដល់​ជន​​ដទៃ​ទៀត ឱ្យ​បាន​យល់​ពី ពុទ្ធសាសនា៕