ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កីឡាការិនីអត្តពលកម្មជម្រើសជាតិកម្ពុជា ប៊ូ សំណាង មិនត្រឹមតែឆក់យកបេះដូងប្រជាជនខ្មែររាប់លាននាក់ ឱ្យកោតសរសើរ និងមានមោទនភាពចំពោះស្មារតីកីឡារបស់នាង ក្រោយកីឡាការិនីរូបនេះតស៊ូរត់កាត់ភ្លៀង រហូតដល់ទី បើទោះបីជាដឹងថា លទ្ធផលចាញ់គេទៅហើយក្តី ហើយពេលនេះ ទឹកចិត្តតស៊ូរបស់នាងក៏បានទាក់ទាញចំណាប់អារម្មណ៍របស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាថែមទៀត។
តាមរយៈបណ្ដាញសង្គមតេលេក្រាម នៅថ្ងៃរសៀលទី ១០ ខែឧសភា សម្ដេចអគ្គមហាសេនាបតីតេជោ ហ៊ុន សែន បានសរសេរថា បើទោះបីជាសម្ដេច បាននិងកំពុងចូលរួមក្នុងកិច្ចប្រជុំកំពូលអាស៊ាននៅឥណ្ឌូនេស៊ី តែសម្តេចក៏នៅបន្តតាមដានការប្រកួតកីឡាស៊ីហ្គេមលើកទី៣២នៅកម្ពុជា ។ សម្តេចបន្តថា «រឿងដែលគួរឱ្យចាប់អារម្មណ៍ គឺកីឡាការនី ប៊ូ សំណាង រត់ក្រោមដំណក់ទឹកភ្លៀងរហូតដល់ទីបញ្ចប់ ទោះជាខ្លួនមិនជាប់ចំណាត់ថ្នាក់ក៏ដោយ។» ហេតុនេះ ដើម្បីលើកទឹកចិត្តសម្រាប់ការអត់ធ្មត់របស់អត្តិពលិករូបនេះ សម្ដេច និងសម្ដេចកិត្តិព្រឹត្តិបណ្ឌិត បានជួយឧបត្ថម្ភទឹកប្រាក់ចំនួន ១ម៉ឺនដុល្លារសហរដ្ឋអាមេរិកដល់នាង។ ដោយសម្ដេចបានណែនាំឱ្យ លោក សេង ទៀង យកថវិកាជូនកីឡាការិនី ប៊ូ សំណាង ដោយផ្ទាល់ដៃ។
លើសពីនេះ កាលពីព្រឹកថ្ងៃទី ១០ ខែឧសភា ឆ្នាំ២០២៣ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និងសប្បុរសជនមួយចំនួន ក៏បានឧបត្ថម្ភថវិកាដល់កីឡាការិនី ប៊ូ សំណាងផងដែរ ដើម្បីជាការលើកទឹកចិត្តដល់អត្តពលិករូបនេះ ដែលបានខិតខំប្រឹងប្រែងប្រកួតលើវិញ្ញាសារត់ប្រណាំងដោយជោគជ័យ បើទោះជាមិនទទួលបានមេដាយក៏ដោយ។
គួរជម្រាបជូនថា កីឡាការិនី ប៊ូ សំណាង បានទទួលការចាប់អារម្មណ៍យ៉ាងខ្លាំងពីមហាជន អ្នកសារក្នុងស្រុក និងក្រៅស្រុក ក្នុងអំឡុងពេលកីឡាការនីរូបនេះ ចូលរួមប្រកួតលើវិញ្ញាសារត់ចម្ងាយ ៥,០០០ម៉ែត្រ នៅពហុកីឡដ្ឋានជាតិមរតកតេជោ ដែលពេលនោះស្ថិតក្រោមដំណក់ទឹកភ្លៀង ប៉ុន្តែ សំណាង បានបង្ហាញនូវសេចក្ដីតស៊ូព្យាយាម និងជំនះរត់រហូតដល់ទីទាំងស្រក់ទឹកភ្នែក ស្មារតីកីឡារបស់ សំណាង បានក្លាយជារូបភាពតំណាងប្រទេសកម្ពុជា ដែលមានកេរ្តិ៍ឈ្មោះជា «ប្រទេសតូច តែមានបេះដូងធំ»៕
