ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជនឆ្នើមបរិស្ថានចំនួន២រូប គឺយុវនារី ឱក សុចិន្តា អ្នកផលិតមាតិកាអប់រំបរិស្ថាន និងយុវជន ហែម សុភេម និស្សិតប្លាស្ទិក ទទួលបានរង្វាន់យុវជនឆ្នើមបរិស្ថានអាស៊ានឆ្នាំ២០២៣ នៅទីក្រុងវៀងច័ន្ទ សាធារណៈរដ្ឋប្រជាធិបតេយ្យប្រជាមានិតឡាវ ក្រោមការដឹកនាំរបស់លោកជំទាវ មាស ច័ន្ទធីតា អនុរដ្ឋលេខាធិការក្រសួងបរិស្ថាន និងជាប្រធានប្តូរវេនក្រុមការងារអប់រំបរិស្ថានអាស៊ាន (AWGEE) កាលពីសប្តាហ៍កន្លងទៅនេះ ។
នេះជាមោទនភាពសម្រាប់កម្ពុជាដែលមានយុវជនឆ្នើម ត្រូវបានទទួលស្គាល់កម្រិតតំបន់ថាជាយុជនគំរូដែលមានស្នាដៃល្អ ក្នុងការងារអប់រំ ផ្សព្វផ្សាយ និងធ្វើសកម្មភាពមេត្រីភាពបរិស្ថានដែលជាការរួមចំណែកលើកកម្ពស់ការយល់ដឹងអំពីកិច្ចគាំពារបរិស្ថាន ការអភិរក្សជីវចម្រុះ និងការរស់នៅប្រកបដោយចីរភាពទាំងក្នុងស្រុក និងក្នុងតំបន់អាស៊ានទាំងមូល។
យុវជន ហែម សុភេម និស្សិតប្លាស្ទិក បានលើកឡើងថា ពានរង្វាន់ដែលទទួលបាននេះ គឺមិនមែនកើតចេញពីលោកតែម្នាក់ឯងនោះទេ តែវាកើតចេញពីយុវជនខ្មែរផ្សេងៗទៀតដែលបានចូលរួមចំណែកយ៉ាងសំខាន់ និងសកម្មក្នុងកិច្ចការពារបរិស្ថានជាមួយ និស្សិតប្លាស្ទិចនាពេលកន្លងមក។
“ខ្ញុំស្ទើរតែមិនជឿថាខ្ញុំត្រូវបានជ្រើសរើសជាយុវជនឆ្នើមនៃពានរង្វាន់ជើងឯកយុវជនអេកូអាស៊ានលើកទី២ ដោយក្រសួងបរិស្ថានដែលបានរៀបចំឡើងនៅប្រទេសឡាវ”
យុវជន ហែម សុភេម និស្សិតប្លាស្ទិក
យុវនារី ឱក សុចិន្តា អ្នកផលិតមាតិកាអប់រំបរិស្ថាន ក៏លើកឡើងដែរថា ការទទួលបានពានរង្វាន់ជើងឯកយុវជនអេកូអាស៊ានលើកទី២នេះ មិនសមនឹងទទួលបានការទទួលស្គាល់ទាំងអស់នេះតែម្នាក់ឯងទេ។ យុវនារីរូបនេះ ក៏ចង់នាំយកពានរង្វាន់ និងការទទួលស្គាល់នេះដល់មនុស្សគ្រប់គ្នាដែលចូលរួមក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាព រួមទាំងអ្នកការពារជួរមុខ អ្នកចូលចិត្តបរិស្ថាន អ្នកបង្កើតខ្លឹមសារផ្សេងទៀត និងជាពិសេសអ្នកអប់រំផងដែរ។
នៅឆ្នាំ២០២៣នេះ ក្រៅពីយុវជនឆ្នើមបរិស្ថានចំនួន២រូប កម្ពុជាបានចាត់បញ្ជូនសាលាមេត្រីបរិស្ថានចំនួន២សាលា ទទួលបានពានរង្វាន់សាលាមេត្រីបរិស្ថានអាស៊ានលើកទី៤ រួមមាន ទី១. វិទ្យាល័យ ហ៊ុន សែន មិត្តភាព ខេត្តព្រះសីហនុ តំណាងដោយ លោក ជា សំអូន ជានាយកសាលា និងទី២. សាលាបឋមសិក្សាគំរូក្រុង ខេត្តកំពង់ឆ្នាំ តំណាងដោយ លោក នុត អង្គារ ជានាយកសាលា។
គួររំលឹកផងដែរថា ទាំងសាលា និងយុវជនបានចាត់បញ្ជូនចូលរួមក្នុងកម្មវិធីនេះ បានឆ្លងកាត់ការវាយតម្លៃ និងទទួលស្គាល់ថ្នាក់ជាតិលើការងារបរិស្ថាន និងសង្គមដោយ ផ្អែកលើសូចនាករ និងលក្ខណៈវិនិច្ឆ័យច្បាស់លាស់ក្រោមការដឹក នាំរបស់នាយកដ្ឋានអប់រំបរិស្ថាន អគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន៕
