ក្រសួងអប់រំ យុវជន និងកីឡា បានប្រកាសជ្រើសរើសសិស្សថ្នាក់ទី៧ ដល់ថ្នាក់ទី១២ ឱ្យ​ចូលរួមប្រកួតប្រជែងគណិតវិទ្យាថ្នាក់ជាតិដោយប្រើប្រាស់បច្ចេកវិទ្យាម៉ាស៊ីនគិតលេខវិទ្យាសាស្រ្ត ដែលនឹងប្រព្រឹត្តទៅនៅថ្ងៃអាទិត្យទី០៦ ខែកក្កដា ឆ្នាំ២០២៥ ខាងមុខ។ ការប្រកួតនេះ ក្រោមការឧបត្ថម្ភគាំទ្រពីក្រុមហ៊ុនកាស្សសិង្ហបុរី តាមរយៈបណ្ណាគារអន្តរជាតិ IBC ភ្នំពេញ និងមានកិច្ចសហការជាមួយសហគមន៍អ្នកគណិតវិទ្យាកម្ពុជា។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការប្រកួតប្រជែងគណិតវិទ្យាថ្នាក់ជាតិដោយប្រើប្រាស់បច្ចេកវិទ្យាម៉ាស៊ីនគិតលេខវិទ្យាសាស្រ្តនេះ ធ្វើឡើងក្នុងគោលបំណងចូលរួមពង្រឹងសមត្ថភាពសិស្ស ព្រមទាំងពង្រឹងគុណភាព និងប្រសិទ្ធភាពនៃការរៀន និងការសិក្សាស្រាវជ្រាវគណិតវិទ្យា ជាពិសេសតាមរយៈការបញ្ជ្រាប ICT ទៅក្នុងការអប់រំគណិតវិទ្យា និងការអប់រំស្ទែមនៅកម្ពុជា។

សម្រាប់បេក្ខជនដែលចូលរួមក្នុង​ការ​ប្រកួតនេះ បើតាមអ្នកនាំពាក្យ​ក្រសួងអប់រំ ពួកគេនឹងទទួលបាននូវអត្ថប្រយោជន៍ជាច្រើន រួមមា​ន ទី១. មានការផ្តល់កិត្តិយសថ្នាក់ជាតិ ទទួលស្គាល់ពីសមត្ថភាពពិសេសក្នុងការប្រើបច្ចេកវិទ្យាដោះស្រាយចំណោទគណិតវិទ្យា ដោយប្រគល់ប្រកាសនីយបត្រសិស្សពូកែថ្នាក់ជាតិ ពីក្រសួងអប់រំ យុវជន និងកីឡា, ទី២. ទទួលបាន មេដាយមាស ប្រាក់ សំរិទ្ធ តាមចំណាត់ថ្នាក់ លេខ១ (១នាក់) លេខ២(២នាក់) និងលេខ៣(៣នាក់) និងលិខិតលើកទឹកចិត្ត ៤នាក់ គ្រប់កម្រិតថ្នាក់ ពីថ្នាក់ទី៧ ដល់ថ្នាក់ទី១២ និង ទី៣. ទទួលបានរង្វាន់ជាកំព្យូទ័រយួរដៃ សម្រាប់អ្នកបានលេខ១ គ្រប់កម្រិតថ្នាក់ និងរង្វាន់ផ្សេងៗទៀត សម្រាប់អ្នកទទួលបានលេខ២ និងលេខ៣។

បើតាមលោកជំទាវបណ្ឌិត ឃួន វិច្ឆិកា ក្រៅពីការផ្ដល់រង្វាន់ជ័យលាភី ក្រសួងអប់រំ ក៏​ទទួលបានធនធានមនុស្សដែលមានសក្តានុពល ដែលអាចតម្រង់ទិសឱ្យបន្តការសិក្សាទៅថ្នាក់ឧត្តមសិក្សាខាងផ្នែកឯកទេសស្ទែម ដើម្បីជួយជំរុញកំណើនសេដ្ឋកិច្ចជាតិនាពេលអនាគត។

សម្រាប់សិស្សដែលមានចំណាប់អារម្មណ៍ចង់ចូលរួមប្រកួត អាចមកចុះឈ្មោះចូលរួមប្រកួតនៅអគារ I មជ្ឈមណ្ឌលស្រាវជ្រាវគរុកោសល្យជំនាន់ថ្មី នៃវិទ្យាស្ថានជាតិអប់រំ ឬចុះឈ្មោះតាមរយៈតំណភ្ជាប់ https://forms.gle/SQZM4bQW1DpubzFD7 ។

ផុតកំណត់នៅថ្ងៃទី២៦ ខែមិថុនា ឆ្នាំ២០២៥ វេលាម៉ោង៥:០០នាទីជាកំណត់។ ដើម្បីទទួលបានព័ត៌មានលម្អិត សូមទាក់ទង និងសាកសួរដោយផ្ទាល់នៅមជ្ឈមណ្ឌលស្រាវជ្រាវគរុកោសល្យជំនាន់ថ្មី ឬអាចទាក់ទង់តាមតេឡេក្រាម៖ ០៩៦ ៩៤៣ ៩៤៤/ ០៧៧ ៤៦៨ ៩៨៩/ ០១១ ៦២៧ ៧២៧/០១១ ៦៩៧ ០៣៨៕