វត្តមាននៃបច្ចេកវិទ្យាឌីជីថល ស្វ័យប្រវត្តិកម្ម និងសកលភាវូនីកម្ម កំពុងបង្កើតឱ្យមានទីផ្សារការងារថ្មីៗ និងលុបបំបាត់ជំនាញមួយចំនួនចេញពីទីផ្សារការងារ។ ចំណុចនេះ តម្រូវឱ្យអ្នកធ្វើការងារក្នុងវិស័យជាច្រើន ត្រូវរៀនជំនាញថ្មី (Reskill) និងពង្រឹងសមត្ថភាពលើជំនាញបច្ចុប្បន្នរបស់ខ្លួន (Upskill) ដើម្បីអាចសម្របខ្លួនទាន់ការវិវត្តន៍ពិភពលោក។ យោងតាមរបាយការណ៍របស់ WE Forum ដែលមានឈ្មោះថា អនាគតនៃទីផ្សារការងារ (Future of Jobs) បានព្យាករណ៍ថា បុគ្គលិកច្រើនជាង ៦០ភាគរយនៅជុំវិញពិភពលោក ចាំបាច់ត្រូវតែបណ្ដុះបណ្ដាលជំនាញឡើងវិញ ចាប់ពីពេលនេះទៅ រហូតដល់ឆ្នាំ ២០២៧។

ទន្ទឹមនឹងនេះ យោងតាមរបាយការណ៍របស់ Coursera អំពី ជំនាញសកលក្នុងឆ្នាំ ២០២៣ (Global Skill 2023) បានបង្ហាញថា អ្នកចុះឈ្មោះចូលរៀនលើវេទិកាអនឡាញនេះមានចំនួន ១២៤លាននាក់ មកពីប្រទេសចំនួន១០០។ ជាមួយគ្នានេះ មានជំនាញជាង ៤ពាន់ក្នុងវិស័យចំនួន ៣ ដែលមានភាពពេញនិយមខ្លាំងជាងគេ សម្រាប់អ្នកសិក្សា ដោយវិស័យទាំងនោះមានដូចជា ជំនួញ បច្ចេកវិទ្យា និងវិទ្យាសាស្ត្រទិន្នន័យ។

តាមរយៈរបាយការណ៍គេកត់សម្គាល់ឃើញថា អ្នកចុះឈ្មោះចូលរៀន នៅក្នុងប្រទេសដែលមានចំណូលកម្រិតខ្ពស់ ភាគច្រើនផ្តោតលើការរៀនជំនាញទាក់ទងនឹងជំនួញ ខណៈប្រទេសដែលមានចំណូលមធ្យម និងកម្រិតទាប ភាគច្រើនជ្រើសរើសរៀនជំនាញបច្ចេកវិទ្យា។ ជាក់ស្ដែង អ្នកសិក្សានៅតំបន់អាមេរិកឡាទីន និងការាបៀន (Caribbean) កំពុងនាំមុខគេលើពិភពលោក ដោយសម្បូរអ្នកចុះឈ្មោះចូលរៀនជំនាញ វិទ្យាសាស្ត្រទិន្នន័យ និងបច្ចេកវិទ្យា។ ទិន្នន័យនេះ កំពុងបង្ហាញថា តំបន់នេះអាចនឹងសម្បូរអ្នកជំនាញបច្ចេកវិទ្យាកាន់តែច្រើននាពេលអនាគត។

នៅក្នុងវិស័យជំនួញ អ្នកចុះឈ្មោះចូលរៀននៅលើ Coursera ភាគច្រើន បានជ្រើសរើសរៀនជំនាញសំខាន់ៗចំនួន ៩ មានដូចជា ជំនាញគណនី ជំនាញទំនាក់ទំនង (និយាយ និងសរសេរ) ជំនាញហិរញ្ញវត្ថុ (Financial Ration និង Block chain) ជំនាញគ្រប់គ្រង (People Management និង Business Analytics) ជំនាញទីផ្សារ (Digital Marketing និង Product Placement) ជំនាញលក់ (Cross-selling និង Lead Generation) ជំនាញយុទ្ធសាស្ត្រ និងប្រតិបត្តិការ ជំនាញគ្រប់គ្រងធនធានមនុស្ស និងជំនាញសហគ្រិន (ការសម្របខ្លួន និងការបង្កើតថ្មី)។

ចំពោះវិស័យបច្ចេកវិទ្យា អ្នកសិក្សាបានផ្តោតលើជំនាញចំនួន ១០ មានដូចជា ជំនាញ Computer Networking (Cloud Computing និង I.O.T) ជំនាញ Database (Relational Database និង Key Value Database) ជំនាញ Operation System (Mobile App Development និង C Programming Language) ជំនាញ Security Engineering (Cybersecurity និង Cryptography) ជំនាញ Software Engineering (Software Architecture និង Software Development) ជំនាញកម្មវិធីកុំព្យូទ័រ (Java Script និង Java) ជំនាញ Theoretical Computer Science (Algorithms និង Cryptography) ជំនាញ Cloud Computing (Software as a service និង Kubernetes) ជំនាញ Web Development (Angular, HTML និង CSS) និង ជំនាញ Mobile Development (Android Development និង iOS Development)។
ដោយឡែក ចំពោះមុខវិជ្ជាទាក់ទងនឹងវិទ្យាសាស្ត្រទិន្នន័យ អ្នកសិក្សាបានចាប់អារម្មណ៍ខ្លាំងទៅលើមុខវិជ្ជាចំនួន ៧ មានដូចជា ជំនាញ Data Management (Cloud APIs និង Hadoop) ជំនាញ Data Visualization (Tableau និង Plotting Data) ជំនាញ Machine Learning (Muti-task Learning និង Deep Learning) ជំនាញគណិតវិទ្យា (គណិតសាស្ត្រជាន់ខ្ពស់ និងពិជគណិតលីនេអ៊ែរ) ជំនាញ Statistical Programming (R និង Python) ជំនាញស្ថិតិ (Regression និង AB Testing) និង ជំនាញ Data Analysis (Exploratory Data Analysis និង Spatial Data Analysis)។

ជំនាញដែលមានបណ្ដុះបណ្ដាលក្នុង Coursera ត្រូវបានរៀបចំសម្រាប់បង្រៀន ដោយប្រើទម្រង់តាមបែប ម៉ាស៊ីនសិក្សា (Machine Learning Model) ហើយមាតិកាមេរៀនច្រើនជាង ៩ពាន់មាតិកា។

របាយការណ៍ជំនាញសកលរបស់ Coursera គឺជាប្រភពទិន្នន័យនៃការវាស់ស្ទង់ជំនាញ ដែលកំពុងពេញនិយមជាសកលនាពេលបច្ចុប្បន្ន។ របាយការណ៍នេះអាចក្លាយជាដើមទុនដ៏សំខាន់សម្រាប់សាធារណជន អាចកំណត់មុខវិជ្ជា និងជំនាញដែលចាំបាច់សម្រាប់ថ្ងៃអនាគត។ លើសពីនេះ វាត្រូវបានបង្កើតឡើង ដោយផ្អែកលើទិន្នន័យសំខាន់ៗចំនួន ៤ដូចជា The Coursera Skill Graph, Skill proficiency scores and benchmarking by country, ការសហការជាមួយភាគីទី៣ និង Over-indexing skills ។

សូមជម្រាបជូនថា គិតត្រឹមឆ្នាំ ២០២៣ Coursera មានចំនួនអ្នកសិក្សាច្រើនជាង ១២០លាននាក់ និងមានដៃគូសហការជាមួយ ៧ពាន់ស្ថាប័ន ព្រមទាំងមានវគ្គសិក្សាចំនួន ៥,៤០០ ដែលវគ្គសិក្សាទាំងនេះ ទទួលបានពីសាកលវិទ្យាល័យល្បីៗចំនួន ៣០០ និងដៃឧស្សាហកម្មមកពីជុំវិញពិភពលោក។ ហេតុផលនេះ បានធ្វើឱ្យ Coursera ក្លាយជាឃ្លាំងផ្ទុកទិន្នន័យដ៏ធំបំផុតមួយសម្រាប់កំណត់អត្តសញ្ញាណ និងនិន្នាការជំនាញសកល៕