ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងពិធីប្រកាសដាក់ឱ្យអនុវត្តស្តង់ដាសាលាបឋមសិក្សាគំរូ សៀវភៅអភិវឌ្ឍកុមារផ្សារភ្ជាប់នឹងការអប់រំបឋមសិក្សា និងសៀវភៅពន្លឿនការសិក្សាភាសាខ្មែរថ្នាក់ទី១ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការអប់រំ ជាអាវុធមួយដ៏សំខាន់ដែលអាចរំដោះយើងទាំងអស់គ្នាឱ្យចាកចេញពីភាពក្រីក្រ។
ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា ប្រសិនបើទទួលបានការអប់រំដែលមានគុណភាព យើងអាចទទួលបានការងារល្អ បានប្រាក់កម្រៃមួយសក្តិសម ។ ប៉ុន្តែប្រសិនបើការអប់រំនោះមិនល្អ យើងមិនអាចរកកម្រៃនោះបាន បោះបង់ចោលការសិក្សា ហើយភាពក្រីក្រនេះនឹងបន្តទៅដល់កូនចៅ ចៅទួតតទៅទៀត។
រដ្ឋមន្រ្តីក្រសួងអប់រំ បញ្ជាក់ថា ប្រសិនបើអស់លោកជាគណៈអភិបាល ប្រធានការិយាល័យអប់រំ ប្រធានមន្ទីរ ក្នុងក្រុង ស្រុក ខណ្ឌ ចង់ឱ្យមូលដ្ឋានអភិវឌ្ឍន៍ត្រូវចាប់ផ្ដើមពីការអភិវឌ្ឍសាលារៀន, ការជ្រើសរើសគ្រូល្អឱ្យមកបង្រៀន ហើយអនុវត្តកម្មវិធីសិក្សាឱ្យបានពេញលេញ។ ប្រសិនបើមិនដូច្នោះទេ សហគមន៍នោះនឹងបន្តរស់នៅក្នុងភាពក្រីក្រដដែល និងមិនមានការកែប្រែខ្លាំងឡើយ។
ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ការចូលរួមគាំទ្ររបស់ឪពុកម្ដាយ សហគមន៍ ក្នុងកិច្ចដំណើរការសាលារៀន គឺត្រូវឈរលើមូលដ្ឋាននៃការស្ម័គ្រចិត្ត និងមានតម្លាភាព។ ប្រសិនបើឪពុកម្ដាយមិនយកចិត្តទុកដាក់លើការអប់រំទេ កូនក៏មិនយកចិត្តទុកដាក់លើការសិក្សារៀនសូត្រផងដែរ ។ ឯកឧត្តមបណ្ឌិតសភាចារ្យ ក៏បានលើកទឹកចិត្តឱ្យឪពុកម្ដាយ អាជ្ញាធរមូលដ្ឋានចូលរួមក្នុងការត្រួតពិនិត្យមើលសាលារៀន ហើយនេះក៏ជាភារកិច្ចដែលក្រសួងអប់រំ រាជរដ្ឋាភិបាល បានប្រគល់ជូនដល់អាជ្ញាធរក្រុងស្រុក ខណ្ឌផងដែរ។
បើតាម ឯកឧត្តមបណ្ឌិតសភាចារ្យ ហង់ជួន ណារ៉ុន សម្រាប់ការរៀន និងការបង្រៀន ក្រសួងអប់រំផ្ដោតលើវិជ្ជាសម្បទា បំណិនសម្បទា និងចរិយាសម្បទា មានន័យថា ឱ្យសិស្សចេះ យកចំណេះដឹង ទៅអនុវត្ត អាចជាបំណិនជីវិត ចំណេះដឹងទូទៅពាក់ព័ន្ធនឹងបរិស្ថាន ពាក់ព័ន្ធបញ្ហានៅក្នុងសហគមន៍ ក្នុងនោះ ក្រសួងក៏ដាក់ឱ្យអនុវត្តការសិក្សាតាមបែបគម្រោងផងដែរ។
គួរជម្រាបជូនថា ក្នុងឆ្នាំសិក្សាថ្មីនេះ ក្រសួងអប់រំ យុវជន និងកីឡា បានអនុវត្តការផ្តល់ពិន្ទុ ៨០ភាគរយ លើចំណេះដឹង, ១០ភាគរយលើបំណិន និង ១០ភាគរយលើសីលធម៌ និងចរិយាធម៌ ដើម្បីបង្កើនការយកចិត្តទុកដាក់ លើការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបទល្អ របស់សិស្សានុសិស្ស៕
