អាហារូបករណ៍ Chevening គឺជាអាហារូបករណ៍របស់ចក្រភពអង់គ្លេស ដែលផ្តល់ឱ្យនិស្សិតមកពីទូទាំងពិភពលោកមានឱកាសទៅបន្តការសិក្សានៅតាមសាកលវិទ្យាល័យនានារបស់អង់គ្លេស។ ​ក្នុងមួយឆ្នាំៗ​មាននិស្សិតមិនតិចនោះទេ ដែលប្រាថ្នាចង់បានអាហារូបករណ៍មួយនេះ, លោក អោក សុខហេង ជាបេក្ខភាពម្នាក់ ក្នុងចំណោមបេក្ខជនកម្ពុជា​ជាច្រើននាក់ទៀត​ដែលបានជាប់អាហារូបករណ៍ថ្នាក់បរិញ្ញាបត្រជាន់ខ្ពស់ ពីកម្មវិធីអាហារូបករណ៍ Chevening ឆ្នាំសិក្សា​២០២៤-២០២៥។ លោកថា គន្លឹះសំខាន់​ដើម្បីជាប់អាហារូបករណ៍នេះ គឺស្គាល់ពីខ្លួនឯង និង​មានឆន្ទៈច្បាស់លាស់។

លោក អោក សុខហេង ជាប្រធានជាន់ខ្ពស់ផ្នែកអភិវឌ្ឍន៍ផលិតផលឌីថល នៃធនាគារឯកជនមួយកន្លែង លោកនឹងទៅសិក្សាជំនាញផ្នែកបច្ចេកវិទ្យាហរិញ្ញវត្ថុ ឬហៅថា FinTech រយៈមួយឆ្នាំ តាមរយៈកម្មវិធីអាហារូបករណ៍ Chevening ។ លោក សុខហេង និយាយថា អាហារូបករណ៍ Chevening នេះ ផ្ដល់ឱកាសស្មើៗគ្នាសម្រាប់បេក្ខជនគ្រប់បណ្ដាប្រទេស លើសពីនេះអាហារូបករណ៍ផ្ដល់ឱកាសសិក្សាគ្រប់មុខវិជ្ជា គ្រប់វិស័យដែលមានក្នុងតម្រូវការរបស់ពិភពលោកបច្ចុប្បន្ន និងពេលអនាគត។ ហើយហេតុផលចម្បងដែល លោក សុខហេង សម្រេចចិត្តក្នុងការដាក់ពាក្យ​អាហារូបករណ៍ Chevening នេះ ព្រោះអាហារូបករណ៍មានរយៈពេល១ឆ្នាំ ដែលជាពេលវេលាគ្រប់គ្រាន់នឹងសមល្មមសម្រាប់ការសិក្សាបន្ថែមដើម្បីអភិវឌ្ឍន៍សមត្ថភាពបន្ត ។ ជាក់ស្ដែង លោក សុខហេង បានប្រឡូកក្នុងវិស័យការងារ និងមានបទពិសោធន៍ជាងប្រាំមួយឆ្នាំក្នុងវិស័យអភិវឌ្ឍន៍ផលិតផលឌីជីថល ដូចនេះរយៈពេលនេះសមល្មមសម្រាប់សិក្សាបន្ថែម ក្រេបយកចំណេះដឹងថ្មី សំខាន់ និងប្លែកៗសម្រាប់មកបម្រើការងារវិញ។

ពាក់ព័ន្ធនឹងគន្លឹះក្នុងការ​ដាក់ពាក្យ​យកអាហារូបករណ៍ Chevening លោក អោក សុខហេង លើកឡើងថា ក្នុង​ដំណើរការ នៃការដាក់ពាក្យអាហារូបករណ៍របស់ចក្រភពអង់គ្លេសនេះ មានច្រើនដំណាក់កាលជាបន្តបន្ទាប់ ដោយទីមួយ បេក្ខជនត្រូវធ្វើការដាក់ពាក្យស្នើសុំអាហារូបករណ៍ ផ្ទាល់តាមរយៈគេហទំព័រ Chevening, ជាបន្ទាប់បេក្ខជនត្រូវស្នើរពាក្យចូលសិក្សានៅតាមសាកលវិទ្យាល័យដោយខ្លួនឯង។ ជំហានបន្ទាប់ ប្រសិនបើបេក្ខជនត្រូវបានជាប់នៅក្នុងវគ្គជម្រុះជុំទីមួយ (Shortlist) ភាគីអាហារូបករណ៍ Chevening នឹងអញ្ជើញទៅវគ្គសម្ភាសន៍នៅស្ថានទូតអង់គ្លេសដែលមានរយៈពេល ៤៥នាទីទៅមួយម៉ោងដើម្បីធ្វើការស្វែងយល់អំពីបេក្ខជនឱ្យបានកាន់តែច្បាស់។

ក្រោយការសម្ភាសន៍នេះ បេក្ខជននឹងទទួលបានដំណឹងថា ជាប់ ឬមិនជាប់អាហារូបករណ៍នេះជាស្ថានពរ ប៉ុន្តែបេក្ខជនត្រូវរង់ចាំ ទទួលដំណឹងពីខាងសាកលវិទ្យាល័យ ឬហៅថា School admission ។ ក្រោយទទួលបាន school admission ពីសាកលវិទ្យាល័យបេក្ខជនតម្រូវឱ្យស្នើពាក្យ School admission ទៅកាន់ភាគីអាហារូបករណ៍ដើម្បីឱ្យភាគីអាហារូបករណ៍ធ្វើការជាបន្តបន្ទាប់។

បេក្ខជនអាហារូបករណ៍រូបនេះបន្តថា ការស្នើសុំអាហារូបករណ៍ Chevening មិនតម្រូវលិខិតបញ្ជាក់ភាសាអង់គ្លេស IELTS ឬ TOEFL ទេ ប៉ុន្តែភាគច្រើនភាគីសាកលវិទ្យាល័យដែលបេក្ខជនដាក់ពាក្យស្នើចូលរៀនទើបតម្រូវមានតេស្តភាសាទាំងនេះទៅតាមជាក់ស្ដែង។

“បើទោះបីជាភាគីអាហារូបករណ៍មិនតម្រូវតេស្តភាសាអង់គ្លេស ប៉ុន្តែបេក្ខជនត្រូវមានជំនាញផ្នែកភាសាអង់គ្លេស ព្រោះការសិក្សានៅសាកលវិទ្យាល័យតម្រូវឱ្យអ្នកយល់ និងសម្រាប់ប្រាស្រ័យទាក់ទងជាប្រចាំផងដែរ”

លោក អោក សុខហេង បន្ថែមថា សម្រាប់ការដាក់ពាក្យ​តាមរយៈគេហទំព័រ Chevening ​គេនឹងមានសំណួរចំនួន៤​ចោទសួរទៅកាន់បេក្ខជន ដោយ​សំណួរទីមួយ គឺទាក់ទងនឹងភាពជាអ្នកដឹកនាំ(Leadership skill) ទីពីរគឺ Networking Skill ទីបី អំពីមូលហេតុអ្វីដែលបេក្ខជនស្នើពាក្យទៅសិក្សានៅសាកលវិទ្យាល័យណាមួយដែលបានជ្រើសរើស និងទីបួននិយាយអំពី តើអ្វីជាគោលដៅបន្ទាប់ពីបញ្ចប់ការសិក្សាថ្នាក់បរិញ្ញាបត្រជាន់ខ្ពស់នេះ។

បើតាម សុខហេង ក្នុង​ការឆ្លើយសំណួរនីមួយៗ បេក្ខជនមិនគួរប្រើប្រាស់ពាក្យអូសបន្លាយវែងពេក ឬសាំញ៉ាំពេកនោះទេ ជាពិសេស ការលើកឡើងក្នុងសំណួរនីមួយៗត្រូវផ្សារភ្ជាប់គ្នា និងប្រកបដោយអត្ថន័យ។ បេក្ខជន មិនគួរលើកឧទាហរណ៍ក្នុងសំណួរទីមួយជាប្រភេទ A ហើយទៅលើកឧទាហរណ៍ក្នុងសំណួរទី២ ឬទី៣ ជាប្រភេទ B ឬ C ឡើយ ដែលបង្កើតបានជាកំហុសក្នុងប្រការណាមួយ។

“នៅក្នុងសំណួរនីមួយៗ បេក្ខជនគួរឆ្លើយ និងសរសេរឱ្យបានច្បាស់លាស់ ក្បោះក្បាយ ត្រឹមត្រូវ និងផ្សារភ្ជាប់គ្នា ព្រោះក្នុងមួយសំណួរយើងនឹងមានសិទ្ធសរសេរត្រឹម៥០០ពាក្យតែប៉ុណ្ណោះ”

ឥឡូវនេះ លោក អោក សុខហេង បានមកដ​ល់ទឹកដី នៃចក្រភពអង់គ្លេស ហើយលោកក៏កំពុងត្រៀមខ្លួនចូលវគ្គសិក្សាថ្មីនៅសាកលវិទ្យាល័យ Bradford ។ លោក សុខហេង បានប្រាប់ថា ការសិក្សាថ្នាក់បរិញ្ញាបត្រជាន់ខ្ពស់នេះ នឹងមានភាពមមាញឹកច្រើន ដែលមានការស្រាវជ្រាវ និងកម្មវិធីសិក្សាខុសពីកម្មវិធីសិក្សានៅកម្ពុជា ដូចនេះលោកបានស្រាវជ្រាវជាមុនអំពីវិធីសាស្ត្រនៃការសិក្សា និង Research ជាពិសេសស្វែងយល់អំពីមេរៀនដែលពាក់ព័ន្ធមុននឹងចូលថ្នាក់សិក្សាដោយផ្ទាល់ជាមួយសាស្ត្រាចារ្យ។

ជាមួយគ្នានេះ លោក អោក សុខហេង ក៏បង្ហាញពីឆន្ទៈនឹងនាំយកចំណេះដឹងថ្មីៗដូចជា បច្ចេកវិទ្យា ការអប់រំដែលទទួលបានពីការសិក្សានៅចក្រភពអង់គ្លេសនេះ មកបម្រើក្នុងការងារឱ្យបានកាន់តែច្រើន និងធ្វើការចែករំលែកទៅកាន់ការងារផ្នែកខាងក្រៅបន្ថែមឱ្យកាន់តែប្រសើរ ជាពិសេសទាក់ទងនឹងផ្នែកហិរញ្ញវត្ថុនៅតាមស្ថាប័នគ្រឹះស្ថាន ឬធនាគាជាដើម។ លើសពីនេះ លោកក៏មានគម្រោងនឹងបង្កើតជាក្រុមការងារប្រឹក្សាមួយដែលផ្ដល់សេវាកម្មដំណោះស្រាយហិរញ្ញវត្ថុទៅកាន់ឯកជន ឬស្ថាប័នផ្សេងៗដែលគាត់ត្រូវការអំពី Financial Solution និង Technological Solution ។

លោក អោក សុខហេង គាំទ្រ និងលើកទឹកចិត្តយ៉ាងពេញទំហឹងចំពោះសិស្សនិស្សិតកម្ពុជាគ្រប់រូបចាប់យកឱកាសសិក្សាអាហារូបករណ៍ Chevening ដែលផ្ដល់ជូនដោយស្មើភាពគ្នាក្នុងការទទួលបាន។ លើសពីនេះ លោកបន្តថា បេក្ខជនគួរស្វែងយល់ និងស្គាល់ពីខ្លួនឯងចូលចិត្ត ស្រលាញ់អ្វី និងមានឆន្ទៈឱ្យបានច្បាស់។ បន្ថែមលើការគាំទ្រ លោក អោក សុខហេង មិនភ្លេចជូនពរអ្នកដែលមានបំណងស្នើពាក្យអាហារូបករណ៍ដទៃទៀតទទួលបានជោគជ័យទាំងការដាក់ពាក្យអាហារូបករណ៍ ការសិក្សា និងការងារដែលបន្តអភិវឌ្ឍន៍សម្រាប់ប្រទេសជាតិ៕