ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយពីធ្វើការប្រកួតប្រជែងយ៉ាងស្វិតស្វាញ ទីបំផុតទៅគេបានរកឃើញម្ចាស់ជ័យលាភី នៃកម្មវិធីជជែកដេញដោលយុវជនថ្នាក់ជាតិ២០២៣ គឺបានទៅលើក្រុមបេក្ខជនមកពីសាលាចំណេះទូទៅ មីគីវ៉េ រាជធានីភ្នំពេញ ខណៈជ័យលាភីលេខ២ បានទៅលើក្រុមបេក្ខជនមកពីសាលាបញ្ញាសាស្ត្រអន្តរជាតិ បាត់ដំបង។ ចំណែក ជ័យលាភីទោល កម្មវិធីវោហារសព្ទឆ្នើម បានទៅលើ យុវតី សឹង សួនរ៉ូហ្សា មកពីសាលាប៊ែលធី អន្តរជាតិ រាជធានីភ្នំពេញ លើប្រធានបទអាវុធមុខពីរ។
លោកជំទាវ ស្រូយ សុជាតិ អគ្គនាយកនៃអគ្គនាយកដ្ឋានយុវជន មានប្រសាសន៍ថា នៅក្នុងវគ្គផ្តាច់ព្រ័ត្រដែលធ្វើឡើងកាលពីថ្ងៃសៅរ៍ (១២ សីហា) ក្រុមបេក្ខជនមកពីសាលាបញ្ញាសាស្ត្រអន្តរជាតិ ត្រូវប្រកួតជជែកដេញដោលជាមួយ ក្រុមបេក្ខជនមកពីសាលា ចំណេះទូទៅ មីគីវ៉េ លើប្រធានបទ «ឥទ្ធិពលនៃបច្ចេកវិទ្យាបញ្ញាសិប្បនិមិត្ត (AI) ជាកត្តាគន្លឹះដល់អនាគតភាពនៃវិស័យអប់រំនៅកម្ពុជា» ដោយប្រធានបទនេះ ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ជាអ្នកដាក់ជូនដល់បេក្ខជនទាំងពីរក្រុម ។
លោកជំទាវបន្តថា លទ្ធផលដែលទទួលបាន គឺស្របទៅនឹងគោលបំណងរបស់កម្មវិធី ដែលចង់ឃើញយុវជនកម្ពុជាបានបង្ហាញសមត្ថភាព។ លើសពីនេះ វាជាវេទិកាមួយ ដែលបង្ហាញអំពីសមត្ថភាពនិយាយជាសាធារណៈ បំណិនក្នុងការងារជាក្រុម ការស្រាវជ្រាវ និងដោះស្រាយបញ្ហា ដែលទាំងអស់នេះ គេហៅថា បំណិតសតវត្សរ៍ទី២១ របស់យុវជន។
បើតាមលោកជំទាវ ស្រូយ សុជាតិ យុវជនរៀននៅក្នុងថ្នាក់រៀនមិនទាន់គ្រប់ទេ ព្រោះអ្វីនៅក្នុងថ្នាក់រៀន មិនអាចយកមកប្រើនៅក្នុងជីវភាពរបស់ពួកគាត់ទាំងស្រុងនោះឡើយ ដូច្នេះនៅពេលដែលគាត់រៀនអ្វីនៅក្នុងថ្នាក់រៀនហើយ មានឱកាសរៀននូវអ្វីដែលជាបំណិនសតវត្សរ៍ទី២១ ទៀត នឹងធ្វើឱ្យគាត់មានសមត្ថភាពពេលលេញក្នុងការក្លាយខ្លួនជាពលរដ្ឋល្អក្នុងពេលអនាគត។
ភាពជោគជ័យរបស់កម្មវិធីក្នុងឆ្នាំនេះ គឺយើងឃើញថា យុវជនកម្ពុជាមានការរីកលូតលាស់ និងបានបង្ហាញសមត្ថភាពរបស់ខ្លួនដល់កម្រិតកំពូល។
លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន
លោកជំទាវអគ្គនាយកមានប្រសាសន៍បន្ថែមថា ក្នុងរយៈពេល ៩ខែនៃដំណើរការប្រកួតនេះ មានគណៈកម្មការប្រមាណជិត២០០នាក់ ដែលមកពីក្រសួងស្ថាប័ន អង្គការដៃគូ ក្រុមហ៊ុនឯកជន និងអ្នកជំនាញផ្ទាល់ខ្លួន ដែលដាក់ពិន្ទុយ៉ាងសុក្រិត យុត្តិធម៌បំផុត ហើយក៏មានការបូកពិន្ទុ តាមរយៈការបោះឆ្នោតលើបណ្ដាញសង្គមហ្វេសប៊ុកផងដែរ។
យ៉ាងណាក៏ដោយនៅឆ្នាំ២០២៤ខាងមុខ អគ្គនាយកដ្ឋានយុវជន គ្រោងនឹងពង្រីកកម្មវិធីជជែកដេញដោល ឱ្យមាននៅតាមបណ្ដារខេត្តទូទាំងប្រទេសបន្ថែមទៀត ដើម្បីផ្ដល់ឱកាសកាន់តែច្រើន ដល់យុវជននៅតាមបណ្ដារខេត្តពង្រឹងសមត្ថភាពរបស់ខ្លួន។ បន្ថែមពីនេះ អគ្គនាយកដ្ឋានយុវជន នឹងបន្តស្វែងរកអ្វីដែលថ្មី ដែលស្របនឹងតម្រូវការជាក់ស្ដែងរបស់យុវជន៕
