ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ស្ថានទូតជប៉ុនប្រចាំប្រទេសកម្ពុជា បានឱ្យដឹងព័ត៌មាននៅថ្ងៃនេះថា មនុស្សនិម្មិតដំបូងគេរបស់ប្រទេសជប៉ុន Imma (Japan’s first virtual human) ធ្លាប់បំពេញទស្សនកិច្ចការងារសង្គមនៅកម្ពុជា ។ ដំណើរបំពេញទស្សនកិច្ចនៅកម្ពុជា កញ្ញា Imma បានជួបសកម្មជនសង្គមក្នុងតំបន់ដែលទទួលបានពានរង្វាន់លើកកម្ពស់ការយល់ដឹងអំពីការពង្រឹងសិទ្ធិស្ត្រីវ័យចំណាស់ដែលងាយរងគ្រោះពីសង្គម ។
កញ្ញា Imma បានអភិវឌ្ឍន៍ឡើងដោយអ្នកជំនាញបច្ចេកវិទ្យាជប៉ុន នៅថ្ងៃទី១២ ខែកក្កដា ឆ្នាំ២០១៨ នៅក្នុងគោលបំណងបង្ហាញពីការរីកចម្រើនបច្ចេកវិទ្យា និងតំណាងឱ្យអ្នកបង្ហាញម៉ូតសម្លៀកបំពាក់ដំបូងគេរបស់ជប៉ុន (Model Fashion) ។ ប្រជាជនរស់នៅទីក្រុងតូក្យូបានចាត់ទុក Imma ប្រៀបដូចជា សិល្បករឆ្នើមមួយរូបប្រកបដោយភាពប៉ិនប្រសព្វ បង្ហាញខ្លួននៅទីសាធារណៈ ហាងទំនិញ តាមកញ្ចក់ទូរទស្សន៍ និងបណ្តាញសង្គមជាដើម ។
តាមរយៈសមាគមអតីតនិស្សិតខ្មែរពីប្រទេសជប៉ុន (JAC) ឆ្នាំ២០១៩ មនុស្សនិម្មិត Imma បានមកទស្សនកិច្ចនៅកម្ពុជា ។ នារីវ័យក្មេងមានសក់ពណ៌ផ្កាឈូករូបនេះ បានជួបប្រជាជនកម្ពុជានៅតាមសហគមន៍មួយចំនួន ដើម្បីគាំទ្រនឹងលើកទឹកចិត្តដល់ស្ត្រីកម្ពុជាឱ្យមានភាពក្លាហាន ព្រមទាំងបង្ហាញពីតួនាទីរបស់ស្ត្រីក្នុងសេចក្តីសម្រេចចិត្តនានានៅក្នុងសង្គម ។
សូមជម្រាបថា បច្ចុប្បន្នកញ្ញា Imma បានប្រើប្រាស់បណ្តាញសង្គមដោយខ្លួនឯង ដើម្បីបង្ហាញម៉ូតសម្លៀកបំពាក់ថ្មីៗនៅប្រទេសជប៉ុន និងបង្ហាញពីទស្សនៈផ្ទាល់ខ្លួនសម្រាប់អនាគត ។ មនុស្សនិម្មិត Imma បានអភិវឌ្ឍន៍ឡើងដោយក្រុមហ៊ុន ModelingCafe ដែលក្រុមហ៊ុននេះ បានដាក់បញ្ជូលបច្ចេកវិទ្យាយ៉ាងលម្អិតបង្ហាញមុខងារផ្សេងៗ រាប់ទាំងរបៀបសម្រិតសម្រាំងលើការតុបតែងខ្លួន ការជ្រើសរើសសម្លៀកបំពាក់ ទឹកមុខ ម៉ូតសក់ និងរចនាប័ទ្មថតរូបប្លែកៗជាច្រើន ៕
