ភ្នំពេញ- ការប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ បានបិទបញ្ចប់ហើយ​នៅ​ថ្ងៃទី៩ ខែមិថុនា ឆ្នាំ​២០២៣ ដោយបន្សល់​នូវអានុស្សាវរីយ៍ល្អៗ ក្ដីស្រឡាញ់ សាមគ្គីភាព និងការជួយគ្នាទៅវិញទៅមកតាមរយៈសំឡេង នៃការគាំទ្ររបស់ប្រជាជន និងយុវជនកម្ពុជា។ ទន្ទឹមគ្នានេះ យុវជនកម្ពុជា បានបង្ហាញអំពីការគាំទ្រ និងស្មារតីសាមគ្គីភាពដល់កីឡាករជនពិការប្រកួតកីឡាអាស៊ានប៉ារ៉ាហ្គេម ដែលខិតខំប្រកួតដើម្បីយកមេដាយជូនប្រទេសកម្ពុជាដែលជាម្ចាស់ផ្ទះ។

យុវជន ម៉ន ពិសិដ្ឋ ជានិស្សិតផ្នែកទំនាក់ទំនងអន្តរជាតិ នៅវិទ្យាស្ថានគោលនយោបាយសាធារណៈ (IISPP) នៃសាកលវិទ្យាល័យភូមិន្ទភ្នំពេញ បាននិយាយថា ការប្រកួតកីឡាអាស៊ានប៉ារ៉ាហ្គេម គឺជាព្រឹត្តិការណ៏ដ៏អស្ចារ្យមួយដែលផ្តល់ឪកាសឱ្យអត្តពលិកដែលជាជនមានពិការភាពមានឱកាសក្នុងការបញ្ចេញសមត្ថភាពរបស់ខ្លួន និងអាចបង្ហាញសក្តានុពលរបស់ពួកគាត់ក្នុងការប្រកួតតំណាងប្រទេសដើម្បីយកជ័យលាភីជូនជាតិ។ លើសពីនេះ ក៏បានលើកមុខមាត់ប្រទេសកម្ពុជាទៅកាន់ឆាកអន្តរជាតិផងដែរដោយបង្ហាញប្រាប់ថា កម្ពុជាមានសមត្ថភាពក្នុងការរៀបចំកម្មវិធីកីឡាលំដាប់ថ្នាក់អន្តរជាតិ ក៏ដូចជាបង្ហាញពីការអភិវឌ្ឍន៍ និងស្ថិរភាពសង្គមផងដែរ។ ហើយថែមទាំងបានពង្រឹង និងផ្សារភ្ជាប់ទំនាក់ទំនងរវាងប្រទេសកម្ពុជានិងប្រទេសដែលចូលរួមដទៃទៀតក្នុង​តំបន់​អាស៊ាន​ឱ្យ​កាន់តែស្អិតរមួត និងមានផលប្រយោជន៏យ៉ាងខ្លាំងចំពោះទំនាក់ទំនងការទូត នយោបាយនិងសេដ្ឋកិច្ច។

និស្សិតផ្នែកទំនាក់ទំនងអន្តរជាតិ រូបនេះ មើលឃើញថា សន្ទុះនៃការគាំទ្រការប្រកួតកីឡាអាស៊ានប៉ារ៉ាហ្គេម ហាក់មានភាពថយចុះខ្លាំងបើប្រៀបធៀបនឹងការប្រកួតកីឡាស៊ីហ្គេម ប៉ុន្តែព្រឹត្តិការណ៍​កីឡាទាំងពីរនេះ សុទ្ធតែទាមទារការចូលរួមពីយុវជនកម្ពុជាដូចៗគ្នា ដោយការគាំទ្រទាំងនោះ គឺជាកម្លាំងចិត្តដ៏ធំមហាសាលសម្រាប់លើកទឹកចិត្តអត្តពលិកឱ្យ​មានការខិតខំប្រឹងប្រែងកាន់តែខ្លាំង។ ពិសិដ្ឋ បន្តថា ការគាំទ្រ និងសាមគ្គីភាពពីយុវជនកម្ពុជាសម្រាប់កីឡាករជនមានពិការភាព គឺពិតជាមានសារសំខាន់ និងសបញ្ជាក់ឱ្យ​ឃើញថា បើទោះបីអត្តពលិករបស់យើងមានពិការភាពក៏ដោយ ក៏ប៉ុន្តែពួកគាត់គួរតែទទួលបាននូវការឱ្យ​តម្លៃ ការលើកតម្កើងប្រកមដោយសេចក្តីថ្លៃថ្នូរ ពីព្រោះសមត្ថភាពដ៏អស្ចារ្យក្នុងការប្រកួតតំណាងជាតិកម្ពុជា និងយកជ័យជម្នះជូនជាតិ។

យុវជន ម៉ន ពិសិដ្ឋ និស្សិតផ្នែកទំនាក់ទំនងអន្តរជាតិ នៅវិទ្យាស្ថានគោលនយោបាយសាធារណៈ 

“កីឡាករជនពិការ ក៏មិនខុសពីប្រភេទកីឡាផ្សេងៗទៀតនោះដែរ ដែលសម្លេងគាំទ្រពីសំណាក់យុវជន គឺជាកត្តាលីករសំខាន់សម្រាប់ពួកគាត់ក្នុងការតស៊ូដើម្បីដណ្តើមជ័យលាភីសម្រាប់ប្រទេសជាតិរបស់យើង”

ចំណែក កញ្ញា វ៉ុន ពិដោ សមាជិសហភាពសហព័ន្ធយុវជន​កម្ពុជា និង​ក៏​ជានិស្សិតផ្នែកទីផ្សារ នៅសាកលវិទ្យាល័យកម្ពុជា បានលើក​ឡើងថា ការរៀបចំការប្រកួតកីឡាអាស៊ានប៉ារ៉ាហ្គេម ជាឱកាសល្អដែលអាចជួយគាំទ្រដល់អត្តពលិកដែលជាជនមានពិការភាព មានលទ្ធភាព មានកម្លាំងចិត្តនៅក្នុងការប្រកួតកីឡាជនមានពិការភាព នៅក្នុងព្រឹត្តការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ។ លើសពីនេះ ក៏ជាការលើកទឹកចិត្តដល់អត្តពលិក ទោះបីជាពួកគាត់ជាជនដែលមានពិការភាព ក៏ពួកគាត់អាចជួយប្រទេសជាតិ និងជួយឱ្យបរទេសបានស្គាល់ប្រទេសកម្ពុជាផងដែរ។

កញ្ញា ពិដោ បន្តថា​ អត្តពលិកជនពិការពិតជាត្រូវការកម្លាំងចិត្ត ក៏ដូចជាការគាំទ្រពីយុវជនកម្ពុជា ព្រោះជាការជំរុញទឹកចិត្តមួយឱ្យកីឡាករជនមានពិការភាពមានទឹកចិត្តតស៊ូបន្តទៅមុខទៀត ដែលអាចនាំមេដាយ ក៏ដូចជានាំកេរ្តិ៍ឈ្មោះកម្ពុជាទៅក្នុងគ្រួសារអាស៊ាន ក៏ដូចជាជួយឱ្យកម្ពុជាមានមិត្តភាពល្អជាមួយប្រទេសជិតខាងដែលជាគ្រួសារអាស៊ានផងដែរ។

កញ្ញា វ៉ុន ពិដោរ សមាជិកសភាពសហព័ន្ធយុវជន​កម្ពុជារាជធានីភ្នំពេញ

“ខ្ញុំបានទៅគាំទ្រកីឡាករជនពិការប្រកួត ហើយមានអារម្មណ៍រំភើបខ្លាំងបើទោះជាយើងមិនបានមេដាយមាសច្រើន ក៏យើងនៅតែគាំទ្រអត្តពលិករបស់យើងកាន់តែខ្លាំង ហើយសង្ឃឹមថា ការប្រកួតកីឡាអាស៊ានប៉ារ៉ាហ្គេមលើកក្រោយនៅប្រទេសផ្សេងៗទៀតពួកគាត់នឹងខំប្រឹងទៅមុខទៀតដើម្បីយកមេដាយមាសជូនជាតិ…”

ជាមួយគ្នានេះ កញ្ញា ឡេង សៀវម៉ី ជានិស្សិតឆ្នាំទី២ សិក្សាជំនាញពាណិជ្ជកម្មអន្តជាតិ នៃសាកលវិទ្យាល័យអេស៊ីលីដា ក៏​បានបន្ថែមដែរថា  កីឡាករ កីឡាការិនី ជាពិសេសកីឡាករជនមានពិការភាព ពិតជាត្រូវការគាំទ្រពីប្រជាជន និងយុវជនកម្ពុជា ពីព្រោះវាជាកត្តាធំមួយដែលជួយជំរុញទឹកចិត្ត និងស្មារតីរបស់ពួកគាត់ផ្ទាល់។ ទន្ទឹមគ្នានេះ ក្រោយការប្រកួតបានបញ្ចប់ កីឡាករជនមានពិការភាពបានឱបគ្នា និយាយលើកទឹកចិត្តគ្នា ចាប់ដៃគ្នា នេះហើយគឹបង្ហាញឱ្យឃើញថា ពួកគាត់មានទឹកចិត្តស្រឡាញ់គ្នាទៅវិញទៅមក ដែលចាត់ទុកជាគ្រួសារនៃអាស៊ានតែមួយ។

កញ្ញា ឡេង សៀវម៉ី និស្សិតឆ្នាំទី២ សិក្សាជំនាញពាណិជ្ជកម្មអន្តជាតិ នៃសាកលវិទ្យាល័យអេស៊ីលីដា យ៉ាងណាក៏ដោយការប្រកួតតែងតែមានចាញ់មានឈ្នះពីព្រោះវាជារឿងធម្មតា ផ្ទុយទៅវិញយើងគួរឱ្យ​តម្លៃទៅលើមិត្តភាព និងពេលវេលាល្អៗដែលយើងបានរួមដំណើរមកជាមួយគ្នា ។ 

“ខ្ញុំមានមោទនភាពខ្លាំងសម្រាប់កីឡាករជនមានពិការភាព ព្រោះគាត់បានបញ្ចេញសមត្ថភាពដែលគាត់មាន ដើម្បីដណ្ដើមយកមេដាយមាសជូនជាតិបើទោះជាលទ្ធផលបែបណាក៏សប្បាយចិត្តទទួលយក”

ក្នុងន័យស្មារតីតែមួយ ជាគ្រួសារអាស៊ានទាំងអត្តពលិក និងអ្នកគាំទ្រគួរតែមានភាពចុះសម្រុងសប្បាយរីករាយជាមួយគ្នា ដោយយើងគួរចាំថា អាស៊ានគឺជាធ្លុងមួយដែលបានឱ្យ​តម្លៃយ៉ាងខ្លាំងទៅលើគោលការណ៏ចម្បងទាំងបីរបស់ខ្លួនគឺ សហគមន៍តែមួយ អត្តសញ្ញាណតែមួយ និងចក្ខុវិស័យតែមួយ៕