ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – វេទិកាជើងឯកយុវជនជជែកពិភាក្សាអំពីបរិស្ថានឆ្នាំ២០២៣ បានចាប់ផ្តើមកាលពីថ្ងៃទី១ និងថ្ងៃ២ ខែមិថុនា ឆ្នាំ២០២៣ ដោយមានការចូលរួមពីមន្រ្តីក្រសួងបរិស្ថាន សាស្រ្តាចារ្យ គ្រូបង្រៀន សិស្សានុសិស្ស ប្រមាណ៣០០អង្គ/នាក់ នៅទីស្នាក់ការ ស.ស.យ.ក. រាជធានីភ្នំពេញ។
ឯកឧត្តម កែន សេរីរដ្ឋា អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថាន មានប្រសាសន៍ថា វេទិកាយុវជនជើងឯកជជែកពិភាក្សាអំពីបរិស្ថាននាពេលនេះ គឺជាសកម្មភាពជាយុទ្ធសាស្រ្តមួយ ដើម្បីឆ្លើយតប ក៏ដូចជាដើម្បីឈានទៅសម្រចឱ្យបាននូវទស្សនវិស័យរបស់អគ្គនាយកដ្ឋាន ដោយមានគោលបំណងសំខាន់ៗចំនួនពីរ គឺទី១៖ ផ្តល់ឱកាសដល់យុវជនខ្មែរធ្វើការសិក្សាស្រាវជ្រាវ និងជជែកពិភាក្សាស៊ីជម្រៅអំពីបរិស្ថាន ដោយស្វែងរកទឡ្ហីករណ៍ ឬសូចនាករថ្មីៗគាំទ្រគោលជំហរ ផ្លាស់ប្តូរចំណេះដឹងគ្នាទៅវិញទៅមក និងទី២៖ជំរុញចលនាយុវជនស្រលាញ់បរិស្ថាន ដោយធ្វើការចែករំលែកនូវចំណេះដឹងទាំងនោះទៅកាន់សាធារណជន តាមរយៈការចាក់ផ្សាយតាមប៉ុស្តិ៍ទូរទស្សន៍ វិទ្យុ Facebook Page YouTube និងប្រព័ន្ធបណ្តាញសង្គមផ្សេងៗ។
ឯកឧត្តម ជួប ប៉ារីស៍ អនុរដ្ឋលេខាធិការ នៃក្រសួងបរិស្ថាន មានប្រសាសន៍ថា យុវជន គឺជាកម្លាំងស្នូលក្នុងការអភិវឌ្ឍប្រទេសឱ្យកាន់តែរីកចម្រើនទៅមុខបន្ដទៀត ហើយយុវជនក៏នឹងក្លាយជាអ្នកអប់រំ អ្នកគ្រប់គ្រង អ្នកដឹកនាំ និងជាអ្នកកាច់ចង្កូតនាវាកម្ពុជានាថ្ងៃខាងមុខ។ ហេតុនេះក្រសួងបរិស្ថាន បានបង្កើតក្រុមយុវជនវិស័យបរិស្ថាន ដែលនេះជាចេតនាមួយចង់ឱ្យយុវជន មិនត្រឹមតែចេះរឿងសេដ្ឋកិច្ច សង្គមប៉ុណ្ណោះទេ ប៉ុន្តែបរិស្ថានផងដែរ។
ឯកឧត្តម ជួប ប៉ារីស៍ អនុរដ្ឋលេខាធិការ នៃក្រសួងបរិស្ថាន
“ក្រសួងបរិស្ថាន ចង់ឃើញយុវជនខ្មែរទៅថ្ងៃអនាគត ក្លាយជាអ្នកដឹកនាំមួយដែលមានការគិតគ្រប់ជ្រុងជ្រោយ គ្រប់វិស័យ ដោយយកវិស័យបរិស្ថានជាវិស័យអាទិភាព”
គួរបញ្ជាក់ឱ្យដឹងថា ការប្រកួតប្រជែងជើងឯកយុវជនជជែកពិភាក្សាអំពីបរិស្ថានឆ្នាំ២០២៣ មានបេក្ខជន-បេក្ខនារី ចូលរួមប្រកួតចំនួន២៤រូប ជាមួយនឹង១២ប្រធានបទ។ ក្នុងប្រធានបទនីមួយៗមានបេក្ខជន-បេក្ខនារី ចំនួន២រូប ដើម្បីធ្វើប្រកួតនិយាយ និងបញ្ចេញសមត្ថភាពថ្វីមាត់ដើម្បីជ្រើសរើសទៅវគ្គបន្ដ។ ចុងក្រោយមានបេក្ខជន-បេក្ខនារី ចំនួន៣រូប ដែលត្រូវប្រកួតគ្នាដើម្បីទទួលជ័យលាភីលេខ១ លេខ២ និងលេខ៣៕
